ସବୁଠି ତୃପ୍ତି ମିଳିବ
କଥାଟିଏ - ଯାଯାବର
ପ୍ରସିଦ୍ଧ ଜେନ୍ ଗୁରୁ ନେନେ ସବୁଠି ଆନନ୍ଦରେ ରହିପାରୁଥିଲେ। ଆଶ୍ରମରେ ଏକାନ୍ତରେ ଯେମିତି ପରମ ତୃପ୍ତିର ସହିତ ବସି ରହୁଥିଲେ, ବଜାରର କୋଳାହଳରେ ବି ସେମିତି ଆନନ୍ଦ ଗଦଗଦ ଭାବ ସହିତ ଘଣ୍ଟା ଘଣ୍ଟା ଧରି ରହିପାରୁଥିଲେ। ସେ ସନ୍ନ୍ୟାସୀ ହୋଇଯାଇଥିଲେ କିନ୍ତୁ ବେଳେ ବେଳେ କେହି ଲୋଡ଼ିଲେ ସେମାନଙ୍କ ପରିବାରରେ ଯାଇ ରହୁଥିଲେ, ସେମାନଙ୍କ ଘର କାମରେ ସାହାଯ୍ୟ କରୁଥିଲେ। କିନ୍ତୁ ସଦାବେଳେ ସେ ରହୁଥିେଲ ତୃପ୍ତ ଓ ଆନନ୍ଦିତ।
Sambad is now on WhatsApp
Join and get latest news updates delivered to you via WhatsApp
ଏହା କେମିତି ସମ୍ଭବ ହେଉଛି ବୋଲି ଆଶ୍ରମକୁ ନୂଆ ଆସିଥିବା ଜଣେ ବ୍ୟକ୍ତି ପଚାରିଲେ। ସାଂସାରିକ ଜୀବନରେ ପ୍ରକୃତ ତୃପ୍ତି ମିଳିବ ନାହିଁ ବୋଲି ଜାଣି ସେହି ବ୍ୟକ୍ତି ସଂସାର ଛାଡ଼ି ଆଶ୍ରମକୁ ପଳାଇ ଆସିଥିଲେ।
ନେନେ ତାଙ୍କୁ କହିଲେ- ଆପଣ ଯାହା ଚାହୁଁଥିଲେ ତାହା ପାଇପାରିଲେ ନାହିଁ ବୋଲି ସଂସାରରୁ ପଳାୟନ କଲେ। ଆପଣ ଭାବୁଛନ୍ତି ଆଶ୍ରମରୁ ତାହା ମିଳିବ। ଏଠାରେ ତାହା ନ ମିଳିଲେ ଆପଣ ଜଙ୍ଗଲକୁ ପଳାୟନ କରି ପାରନ୍ତି। ସେଠାରେ ତାହା ନ ପାଇଲେ କେଉଁ ଗୁମ୍ଫା କନ୍ଦରରେ ପଶି ପାରନ୍ତି। ଏ ସବୁ ପଳାୟନ ଏକା ଭଳି। ଏହା କେବଳ ବହିର୍ଜଗତ୍ରେ ଗୋଟିଏ ସ୍ଥାନରୁ ଆଉ ଏକ ସ୍ଥାନକୁ ଗଲା ଭଳି। ବହିର୍ଜଗତ୍ରେ ସବୁ ସ୍ଥାନ ଏକା ଭଳି। ଆପଣ ସିନା ଜାଗା ବଦଳାଉଛନ୍ତି, ହେଲେ ଆପଣଙ୍କ ଶରୀର ଓ ମନ ତ ସେମିତି ଅଛି। ବରଂ ଆପଣ ଜାଗା ନ ବଦଳାଇ ମନକୁ ବଦଳାନ୍ତୁ। ପ୍ରକୃତ ତୃପ୍ତି ମନରେ ଥାଏ। ଦେଖିବେ ସବୁଠି ତୃପ୍ତି ମିଳିବ।