ଠିକ୍ ଓ ଭୁଲ୍
କଥାଟିଏ - ଯାଯାବର
ଜଣେ ବିଚାରପତିଙ୍କ ପାଖରେ ଜଣେ ବୃଦ୍ଧା ଅଭିଯୋଗ କଲେ ଯେ ତାଙ୍କ ବୋହୂ ତାଙ୍କ ପ୍ରତି ଖରାପ ବ୍ୟବହାର କରୁଛି।
Sambad is now on WhatsApp
Join and get latest news updates delivered to you via WhatsApp
ବିଚାରକ ବୋହୂଙ୍କୁ ନିଜ ପକ୍ଷ ରଖିବା ଲାଗି କହିଲେ।
ବୋହୂ କହିଲେ- ଆଜ୍ଞା, ମୋ ଶାଶୂ କ୍ଷଣକୋପୀ। ପାନରୁ ଚୂନ ଖସିଲେ ସେ ବିଗିଡ଼ି ଯାଆନ୍ତି, ଗାଳିମନ୍ଦ କରନ୍ତି। ମୁଁ ତେଣୁ ବେଳେ ବେଳେ ରାଗି ଯାଇ କିଛି କହିପକାଏ।
ଏହା ଶୁଣି ବୃଦ୍ଧା କହିଲେ-ସେ ସତ ଲୁଚାଉଛି। ଅସଲ ସତ ଜାଣିବା ଲାଗି ମୋ ପୁଅ ଅର୍ଥାତ୍ ତା’ ସ୍ବାମୀକୁ ଡାକନ୍ତୁ।
ଏଥର ବୃଦ୍ଧାଙ୍କ ପୁଅ ଆସିଲେ। ସେ କହିଲେ- ଆଜ୍ଞା, ମୋ ମା’ଙ୍କ ବୟସ ସତୁରି ଉପରେ ହେଲାଣି। ତେଣୁ ତାଙ୍କୁ କଥା ବାଧେ। କିନ୍ତୁ ମୋ ସ୍ତ୍ରୀ ସେତକ ବୁଝେନାହିଁ। ଅନେକ ସମୟରେ ତାଙ୍କୁ ଭଲ ଖରାପ କରି କହେ।
ଏହା ଶୁଣି ବୋହୂ କହିଲେ- ପୁଅ ତ ମା’ଙ୍କ ପକ୍ଷ ନେବେ। ମୋ ପୁଅକୁ ଡାକନ୍ତୁ ସେ ଅସଲ କଥାଟି କହିବ।
ଏଥର ବୃଦ୍ଧାଙ୍କ ନାତି ଆସିଲା। ସେ କହିଲା- ମୋ ମା’ ସେମିତି ନୁହନ୍ତି। ଘର ଗୋଟା ଯାକର କାମ ସେ କରନ୍ତି। ତାଙ୍କ ଉପରେ ପ୍ରବଳ କାର୍ଯ୍ୟ ଭାର। ତେଣୁ ତାଙ୍କ ଉପରେ ରୁଗୁରୁଗୁ ହେଲେ ସେ ବି ରାଗିଯାଉଥିବେ। ତେଣୁ ଏ କଥାକୁ ବି ଆପଣ ବିଚାର କରିବା ଦରକାର।
ବିଚାରକ କହିଲେ- ହଉ, ବହୁତ ହୋଇଗଲା। କିଏ ଭୁଲ୍ ବା କିଏ ଠିକ୍ ତାହା ବିଚାର କରିବା ଅସମ୍ଭବ। କାରଣ ପ୍ରତ୍ୟେକ ଲୋକ ନିଜ ପକ୍ଷରୁ ବିଚାର କରି ସେ ନିଜେ ଠିକ୍ ଏବ˚ ଅନ୍ୟମାନେ ଭୁଲ୍ ବୋଲି ଭାବେ। ତେଣୁ ଏମିତି ଠିକ୍ ଭୁଲ୍ର ବିଚାର କରିବା କଷ୍ଟକର। ତେବେ, ଏଇ ପରିବାରରେ ଶାଶୂ ଓ ବୋହୂ କେବଳ ଗୋଟିଏ ଦୋଷରେ ଦୋଷୀ; ତାହା ହେଲା ଭାବର ଅଭାବ ଦୋଷ। ଦୁହିଁଙ୍କ ଭିତରେ ଶ୍ରଦ୍ଧା ନ ଥିବାରୁ ଏମିତି ହୋଇଛି। ଯଦି ଶ୍ରଦ୍ଧା ଭାବ ଆସିବ ତେବେ ତୁମେ ପରସ୍ପରର ଦୋଷକୁ ନଜରଅନ୍ଦାଜ କରିବ ଓ ଖୁସିରେ ରହିବ।