ମୁମ୍ବାଇ: ମନୋରଞ୍ଜନ ଜଗତରୁ କ୍ରମାଗତ ଭାବରେ ହୃଦୟ ବିଦାରକ ଖବର ଦେଖିବାକୁ ମିଳୁଛି। ଗୁରୁବାର ଦିନ ଶ୍ରେୟାସ୍ ତାଲପଡେଙ୍କ ହୃଦଘାତର ଖବର ଚିନ୍ତାର ବିଷୟ ପାଲଟିଥିବା ବେଳେ ଦିନେଶ ଫଡ୍‌ନୀଶ ଓ ଜୁନିୟର୍‌ ଫଡ୍‌ନିଶଙ୍କ ମୃତ୍ୟୁର ଦୁଃଖ ଏଯାଏ ମନରୁ ଯାଇନାହିଁ। ଏହି ସମୟରେ ବ୍ରାଜିଲରେ ଏକ ଲାଇଭ ଇଭେଣ୍ଟରେ ଜଣେ ଗାୟକଙ୍କ ମୃତ୍ୟୁ ଘଟିଛି।

Advertisment

୩୦ ବର୍ଷୀୟ ଗାୟକ ପେଡ୍ରୋ ହେନ୍ରିକ୍ ବ୍ରାଜିଲର ଏକ ଧାର୍ମିକ କାର୍ଯ୍ୟକ୍ରମରେ ପ୍ରଦର୍ଶନ କରୁଥିବା ବେଳେ ଗୀତ ଗାଇବା ସମୟରେ ହଠାତ୍ ମଞ୍ଚ ଉପରେ ପଡ଼ିଯାଇଥିଲେ। ପରେ ତାଙ୍କର ମୃତ୍ୟୁ ହୋଇଥିଲା। ଏହି ଘଟଣାଟି ସୋସିଆଲ ମିଡିଆରେ ଭାଇରାଲ ହେଉଥିବା ଭିଡିଓରେ ଦେଖିବାକୁ ମିଳିଛି।

ଏଣ୍ଡ ୱୋକେନେସ୍ ମାଇକ୍ରୋ ବ୍ଲଗିଂ ୱେବସାଇଟ୍ 'ଏକ୍ସରେ' ରେ ଏହି ଘଟଣାର ଚକିତ କରିବା ପରି ଏକ ଭିଡିଓ ସେୟାର କର‌ାଯାଇଛି। ଏଥିରେ ପେଡ୍ରୋ ହେନ୍ରିକ୍ ମଞ୍ଚର କଡ଼ରେ ଠିଆ ହୋଇଥିବା ବେଳେ ଗୀତ ଗାଉ ଗାଉ ପଡ଼ି ଯାଉଥିବାର ଦେଖାଯାଏ। ସାମ୍ନାରେ ଉପସ୍ଥିତ ଦର୍ଶକଙ୍କ ସହ ସେ ମଜା ମଧ୍ୟ କରୁଥିଲେ। କିନ୍ତୁ ତା’ପରେ ଗୀତ ଗାଇବାବେଳେ ସେ ଏକ ଲମ୍ବା ନୋଟ୍ ନେଇ ହଠାତ୍ ଅଟକି ଗଲେ। କେହି କିଛି ବୁଝିବା ପୂର୍ବରୁ ପେଡ୍ରୋ ଭାରସାମ୍ୟ ହରାଇ ମଞ୍ଚ ଉପରେ ପଡ଼ି ଚେତାଶୂନ୍ୟ ହୋଇଗଲେ। ତାଙ୍କୁ ତୁରନ୍ତ ନିକଟସ୍ଥ କ୍ଲିନିକକୁ ନିଆଯାଇଥିଲା, କିନ୍ତୁ ସେଠାରେ ଥିବା ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ।
ମିଡିଆ ରିପୋର୍ଟ ଅନୁଯାୟୀ, ଗାୟକଙ୍କ ବନ୍ଧୁ କହିଥିଲେ ଯେ ସୋ’ ପୂର୍ବରୁ ପେଡ୍ରୋ ହେନ୍ରିକ୍ ବହୁତ ଥକି ଯାଇଥିଲେ। ତେବେ ଗାୟକଙ୍କର ହୃଦ୍‌ଘାତ ହେତୁ ମୃତ୍ୟୁ ହୋଇଥିବା ଜଣାପଡ଼ିଛି।