ମହିଳାଙ୍କୁ ହତ୍ୟା ଧମକ ଦେବାରୁ ଅଭିନେତା ସାହିଲଙ୍କ ବିରୋଧରେ ଏତଲା ରୁଜୁ

ମୁମ୍ବାଇ: ବିବାଦରେ ବଲିଉଡ ଅଭିନେତା ସାହିଲ ଖାନ। ଜଣେ ୪୩ବର୍ଷୀୟ ମହିଳାଙ୍କୁ ହତ୍ୟା ଓ ତାଙ୍କୁ ନେଇ ଅପମାନଜନକ ପୋଷ୍ଟ କରିବାର ଧମକ ଦେଇଥିବାରୁ ଏବେ ସାହିଲଙ୍କ ବିରୋଧରେ ଏତଲା ରୁଜୁ ହୋଇଛି। ଅଭିନେତାଙ୍କ ବିରୋଧରେ ମୁମ୍ବାଇର ଓସିୱାରା ପୁଲିସ ଷ୍ଟେସନରେ ଧାରା ୫୦୦, ୫୦୧, ୫୦୯, ୫୦୪, ୫୦୬ ଏବଂ ୩୪ ଅନୁଯାୟୀ ଏତଲା ରୁଜୁ କରାଯାଇଛି।

ତେବେ ଏହା ପ୍ରଥମ ଥର ନୁହେଁ, ଏହା ପୂର୍ବରୁ ସେପ୍ଟେମ୍ବର ୨୦୨୧ରେ, ମଡେଲ ଏବଂ ଫିଟନେସ୍ ପ୍ରଶିକ୍ଷକ ମନୋଜ ପାଟିଲଙ୍କୁ ହଇରାଣ କରିବା ତଥା ଆତ୍ମହତ୍ୟା କରିବାକୁ ଉସୁକାଇଥିବାରୁ ତାଙ୍କ ବିରୋଧରେ ଏତଲା ରୁଜୁ କରାଯାଇଥିଲା। ଏହା ବ୍ୟତୀତ ଖାନ ୨୦୧୪ରେ ବଲିଉଡ ଅଭିନେତ୍ରୀ ସନା ଖାନଙ୍କ ପ୍ରେମିକ ଇସମାଇଲ ଖାନଙ୍କ ସହ ଜିମରେ ମାରପିଟ କରିବା ନେଇ ବିବାଦରେ ଛନ୍ଦି ହୋଇଥିଲେ।

୨୦୧୯ରେ ସାହିଲଙ୍କର ଏକ ଅଶ୍ଲୀଳ ଫଟୋ ଭାଇରାଲ ହେବା ପରେ ସେ ଚର୍ଚ୍ଚାକୁ ଆସିଥିଲେ। ଅଶ୍ଲୀଳ କ୍ୟାପ୍‌ସନ ସହ ଏହାକୁ ଭାଇରଲ କରାଯାଇଥିବା ବେଳେ ପରେ ଏଭଳି କରିଥିବା ଲୋକମାନଙ୍କ ବିରୋଧରେ ମାମଲା ରୁଜୁ କରିଥିଲେ ଅଭିନେତା ସାହିଲ ଖାନ୍‌ । ଅଭିଯୋଗ ପତ୍ରରେ, ଜାବିର ଅହମ୍ମଦ, ଜେ କେ ପିଟର ଏବଂ କରଣଧୀର ମୋର ଫଟୋକୁ ଏଡିଟ୍‌ କରି ଅଶ୍ଲୀଳ କ୍ୟାପ୍‌ସନ ସହ ଇନ୍‌ଷ୍ଟାରେ ସେୟାର କରିଥିଲେ ବୋଲି ଲେଖିଥିଲେ ସାହିଲ ।

ଅଶ୍ଲୀଳ ଫଟୋ ଭାଇରାଲ ହେବା ପରେ ସାହିଲ ବେଶ୍ୟାବୃତ୍ତିରେ ସାମିଲ ଥିବା କଥା ଲୋକେ ଉଠାଇଥିଲେ । ଫଟୋକୁ ନେଇ ଭିନ୍ନ ଭିନ୍ନ ପ୍ରକାରର ଅଶ୍ଲୀଳ କମେଣ୍ଟ ଆସୁଥିବା ଦେଖି ସାହିଲ ଏତଲା ରୁଜୁ କରିବାକୁ ବାଧ୍ୟ ହୋଇଥିଲେ ।