ଅମିତାଭଙ୍କ ଭାଉଜ ଭୂମିକାରେ ଅଭିନୟ କରି ଲୋକପ୍ରିୟତା ସାଉଁଟିଥିଲେ ସୀମା, ଦୁଇପୁଅ ବି କାମ କରୁଛନ୍ତି ସିନେଶିଳ୍ପରେ

ନୂଆଦିଲ୍ଲୀ: ସିନେମା ଦୁନିଆରୁ ଏକ ଦୁଃଖଦ ଖବର ସାମ୍ନାକୁ ଆସିଛି। ଲୋକପ୍ରିୟ ଅଭିନେତ୍ରୀ ସୀମା ଦେଓଙ୍କ ପରଲୋକ ହୋଇଛି। ସୀମା ୮୧ବର୍ଷ ବୟସରେ ଶେଷନିଶ୍ବାସ ତ୍ୟ‌ାଗ କରିଛନ୍ତି। ସୀମାଙ୍କ ମୃତ୍ୟୁ ଖବର ଶୁଣିବା ପରେ ସିନେମାଜଗତ ସହ ଯୋଡ଼ି ହୋଇ ରହିଥିବା ପ୍ରତ୍ୟେକଟି କଳାକାର ଶୋକବ୍ୟକ୍ତ କରିଛନ୍ତି।

ସୀମା ଦେଓ ଲୋକପ୍ରିୟ ହିନ୍ଦୀ ସିନେମା ‘ଆନନ୍ଦ’ରେ ଅମିତ‌ାଭ ବଚ୍ଚନଙ୍କ ଭାଉଜ ଭୂମିକାରେ ଅଭିନୟ କରି ଲୋକପ୍ରିୟତା ସାଉଁଟିଥିଲେ। ୧୯୬୦ ମସିହାରେ ସୀମା ଅଭିନୟ ଦୁନିଆରେ ପ୍ରବେଶ କରି ହିନ୍ଦୀ ସହିତ ମରାଠୀର ଅନେକ ସିନେମା ପାଇଁ ବି କାମ କରିଛନ୍ତି। ସୀମା ବଲିଉଡର ଜଣାଶୁଣା ଅଭିନେତା ସ୍ବର୍ଗତଃ ରମେଶ ‌ଦେଓଙ୍କ ସ୍ତ୍ରୀ ହୋଇଥିବା ବେଳେ ତାଙ୍କର ଦୁଇ ପୁଅ ଅଛନ୍ତି। ଜଣକଙ୍କ ନାମ ଅଭିନୟ ଦେଓ ଓ ଅନ୍ୟ ଜଣକଙ୍କ ନାମ ଆଞ୍ଜିକ୍ୟ ଦେଓ। ତାଙ୍କ ଭଳି ପୁଅ ଦୁଇଜଣ ସିନେମାଜଗତରେ ପ୍ରବେଶ କରନ୍ତୁ ବୋଲି ଇଚ୍ଛା  ରଖିଥିଲେ ସୀମା । ବଡ଼ ହୋଇ ମା’ଙ୍କ ଇଚ୍ଛାକୁ ଦେଖି ଦୁଇପୁଅ  ହିନ୍ଦୀ ସିନେଶିଳ୍ପ ସହ ଯୋଡ଼ି ହୋଇଥିଲେ। ଅଭିନୟ ସିନେମ‌ା ନିର୍ମାତା ଥିବା ବେଳେ ଆଞ୍ଜିକ୍ୟ ଜଣେ ଅଭିନୟ କ୍ଷେତ୍ରରେ ସକ୍ରିୟ ଅଛନ୍ତି।

ସୀମା ଅନେକ ଦିନ ହେବ ବୟସାଧିକ୍ୟ ହେତୁ ରୋଗଗ୍ରସ୍ତ ହୋଇପଡ଼ିଥିଲେ। ସେ ତାଙ୍କ ପୁଅ ଅଭିନୟଙ୍କ ସହିତ ମୁମ୍ବାଇରେ ରହୁଥି‌ଲେ। ନିକଟରେ ସେ ଅସୁସ୍ଥ ହୋଇପଡ଼ିଥିବାରୁ ପୁଅ ତାଙ୍କୁ ଚିକିତ୍ସା ପାଇଁ ଡାକ୍ତରଖାନା ନେଇଥିବା ବେଳେ ଆଜି ସୀମା ଦେଓ ଶେଷ ନିଶ୍ବାସ ତ୍ୟାଗ କରିଛନ୍ତି। ସୀମା ‘ମିୟା ବିବି ରାଜି’ ସିନେମାରୁ ଅଭିନୟ ଜୀବନ ଆରମ୍ଭ କରିଥିବା ବେଳେ ‘ଆନନ୍ଦ’, ‘କୋରା କାଗଜ’, ‘ଭ‌ାବି କି ଚୁଡିୟାଁ’ ଭଳି ସିନେମାରେ ସେ କାମ କରି ସାରିଛନ୍ତି।