ଅସହାୟ ମହିଳାଙ୍କୁ ସାହାଯ୍ୟର ହାତ ବଢ଼ାଇ ମାନବିକତାର ପରିଚୟ ଦେଲେ ଅଜିତ

ଚେନ୍ନାଇ: ତାମିଲ ସିନେମାର ପ୍ରସିଦ୍ଧ ଅଭିନେତା ଅଜିତ କୁମାର ପୁଣି ଥରେ ପ୍ରଶଂସକଙ୍କ ହୃଦୟ ଜିତିଛନ୍ତି। ସୋସିଆଲ ମିଡିଆରେ ତାଙ୍କୁ ଜୋରଦାର ପ୍ରଶଂସା କରାଯାଉଛି। ବାସ୍ତବରେ ଅଜିତ କୁମାର ଲଣ୍ଡନ ବିମାନବନ୍ଦରରେ ଜଣେ ମହିଳାଙ୍କୁ ସାହାଯ୍ୟ କରିଥିଲେ, ଯିଏ ନିଜ ଛୁଆ ସହିତ ଏକୁଟିଆ ଯାତ୍ରା କରୁଥିଲେ। ଅଜିତ କେବଳ ମହିଳାଙ୍କ ବ୍ୟାଗ ଉଠାଇ ନଥିଲେ ବରଂ ତାଙ୍କ ସହ ଫଟୋ ଉଠାଇଥିଲେ। ସୋସିଆଲ ମିଡିଆରେ ଏକ ପୋଷ୍ଟ ସେୟାର କରି ମହିଳାଙ୍କ ସ୍ୱାମୀ ଅଜିତ କୁମାରଙ୍କୁ ଧନ୍ୟବାଦ ଜଣାଇବା ସହ ପୁରା ଘଟଣା ବିଷୟରେ ବର୍ଣ୍ଣନା କରିଥିଲେ। ବ୍ୟକ୍ତି ଲେଖିଛନ୍ତି, 'ମୋ ପତ୍ନୀ ଗ୍ଲାସ୍ଗୋରୁ ଚେନ୍ନାଇ ଯାତ୍ରା କରୁଥିଲେ । ତାଙ୍କ ସହିତ ଆମର ୧୦ ମାସର ଶିଶୁ ମଧ୍ୟ ଥିଲା | ସେ ଲଣ୍ଡନ ହେଥ୍ରୋରେ ଅଜିତ କୁମାରଙ୍କୁ ଭେଟିବାର ସୁଯୋଗ ପାଇଲେ।

ମୋ ପତ୍ନୀ ଏକ କ୍ୟାବିନ ସୁଟକେସ ସହ ଛୁଆକୁ ନେଇ ଏକୁଟିଆ ଯାତ୍ରା କରୁଥିଲେ। ତେବେ ପତ୍ନୀଙ୍କ ଅସହାୟତା ଦେଖି ଅଜିତ ମୋ ପତ୍ନୀଙ୍କୁ ସାହାଯ୍ୟ କରିଥିଲେ | ବ୍ୟକ୍ତି ଜଣକ ଆହୁରି ମଧ୍ୟ ଲେଖିଛନ୍ତି ଯେ ଯେତେବେଳେ ଅଜିତ ସାହାଯ୍ୟ କରିବାକୁ ଆଗେଇ ଆସିଥିଲେ, ସେତେବେଳେ ମୋ ପତ୍ନୀ ତାଙ୍କୁ (ଅଜିତ କୁମାର) ଅଟକାଇଥିଲେ, ସେତେବେଳେ ସେ ଉତ୍ତର ଦେଇଥିଲେ,' କିଛି ଅସୁବିଧା ନାହିଁ। ମୋର ମଧ୍ୟ ଦୁଇଟି ଛୁଆ ଅଛନ୍ତି | ତେଣୁ ମୁଁ ଜାଣେ ଆପଣଙ୍କୁ କେତେ ଅସୁବିଧା ହେଉଥିବ | ଆପଣ ଛୁଆକୁ ଧରନ୍ତୁ, ମୁଁ ଆପଣଙ୍କ ବ୍ୟାଗ ନେଇଯିବି' | ଅଜିତ ମହିଳାଙ୍କ ସୁଟକେସକୁ ନେଇ କ୍ୟାବିନ କର୍ମଚାରୀଙ୍କୁ ଦେଇଥିଲେ। ଏହାପରେ ଲଗେଜ୍ ମହିଳାଙ୍କ ସିଟ୍ ପାଖରେ ରଖାଯାଇଛି କି ନାହିଁ ତାହା ତଦାରଖ କରିଥିଲେ । ଅଜିତ କୁମାରଙ୍କ ଏହି କାମକୁ ନେଇ ସମସ୍ତେ ପ୍ରଶଂସାରେ ପୋତି ପକାଉଛନ୍ତି |