୪ ମାସର ପ୍ରସ୍ତୁତି ପରେ‌ ସେଟ୍‌ରେ ଆଲିଆ

ଦୀର୍ଘ ଦିନର ପ୍ରତୀକ୍ଷାର ଅବସାନ ଘଟିଛି । ଶେଷରେ ‘ଆଲ୍‌ଫା’ ସିନେମା ପାଇଁ ସୁଟିଂ ଆରମ୍ଭ କରିଛନ୍ତି ଅଭିନେତ୍ରୀ ଆଲିଆ ଭଟ୍ଟ। ଜାଣିବାକୁ ମିଳିଛି ଯେ ଆଲିଆ ତାଙ୍କର ଏହି ଚରିତ୍ର ପାଇଁ ନିଜକୁ ଦୀର୍ଘ ୪ ମାସ ଧରି ପ୍ରସ୍ତୁତ କରୁଥିଲେ। ଏହାର ସଂକ୍ଷିପ୍ତ ଟିଜରରେ ଆଲିଆଙ୍କର ଏକ ସଂଳାପ ରହିଛି। ଯେଉଁଥିରେ ତାଙ୍କୁ ‘ସବୁ ସହର ଗୋଟିଏ ଜଙ୍ଗଲ୍ ଭଳି। କେବଳ ଜଣେ ଜଙ୍ଗଲ୍‌ ଉପରେ ରାଜ୍‌ କରିବ..ସେ ହେଉଛି ଆଲ୍‌ଫା’ କହୁଥିବାର ଶୁଣିବାକୁ ମିଳୁଛି।

ଆଲିଆଙ୍କର ଏକ ଫଟୋ ସୋସିଆଲ୍‌ ମିଡିଆରେ ଭାଇରାଲ୍‌ ହୋଇ ଚାଲିଛି। ଉକ୍ତ ଫଟୋରେ ଆଲିଆ ଏକ ଧଳା ସାର୍ଟ ଏବଂ ନୀଳ ପ୍ୟାଣ୍ଟ ପିନ୍ଧିଛନ୍ତି। ଏହା ସହିତ ତାଙ୍କ ନାମ ଛପା ଯାଇଥିବା ଏକ ଛତାକୁ ଜଣେ ବ୍ୟକ୍ତି ତାଙ୍କ ମୁଣ୍ଡ ଉପରେ ଧରିଥିବାର ବି ଦେଖିବାକୁ ମିଳିଛି। ଏହି ଫଟୋଟି ସେ ସୁଟିଂ ସେଟ୍‌କୁ ଯାଉଥିବା ବେଳର ବୋଲି ସୂଚନା ରହିଛି। ତେବେ ସୁଟିଂ ସେଟ୍‌ରୁ ‌ଯେପରି କୌଣସି ଫଟୋ ପ୍ରଘଟ ନହୁଏ ସେଥିପାଇଁ ନିର୍ମାତା ସ୍ବତନ୍ତ୍ର ଧ୍ୟାନ ଦେଇଛନ୍ତି।

ଆଲିଆ ଚଳିତ ମାସ ପ୍ରଥମ ସପ୍ତାହରେ ‘ଆଲ୍‌ଫା’ ଫିଲ୍ମ ପାଇଁ ସୁଟିଂ କାର୍ଯ୍ୟ ଆରମ୍ଭ କରିଛନ୍ତି। ଫିଲ୍ମରେ ତାଙ୍କର ପାଞ୍ଚରୁ ଛଅଟି ପ୍ରମୁଖ ଆକ୍ସନ୍ ସିନ୍‌ ରହିଛି। ୟଶରାଜ୍‌ ଫିଲ୍ମସ୍‌ ଓ ସ୍ପାଏ ୟୁନିଭର୍ସର ଏହି ସିନେମା ଉପରେ ସଭିଙ୍କ ନଜର ରହିଛି। ‘ଆଲ୍‌ଫା’ର ନିର୍ଦ୍ଦେଶନା ଦେଉଛନ୍ତି ଶିବ ରାୱେଲ୍‌। ନେଟ୍‌ଫ୍ଲିକ୍ସ ସିରିଜ୍‌ ‘ଦ ରେଲୱେ ମେନ୍‌’ ପାଇଁ ରାୱେଲ୍‌ ବେଶ୍‌ ଜଣାଶୁଣା। ଏହାପରେ ଏବେ ତାଙ୍କର ଏହି ସିନେମାକୁ ଅପେକ୍ଷା ରହିିଛି। ଏଥିରେ ଆଲିଆଙ୍କ ସହ ସର୍ବରୀ ୱାଗ୍ ପ୍ରମୁଖ ଭୂମିକାରେ ଅଛନ୍ତି।