ରିଲିଜ୍ ପୂର୍ବରୁ କୌଣସି ଚର୍ଚ୍ଚା ହେଉନଥିଲା, ହେଲେ ରିଲିଜ୍ ପରେ କମାଲ କଲା ଫିଲ୍ମ 'ଉଞ୍ଚାଇ'

ମୁମ୍ବାଇ: ଶୁକ୍ରବାର ଦିନ ପ୍ରେକ୍ଷାଳୟରେ ବଲିଉଡର ବରିଷ୍ଠ ଅଭିନେତା ଅମିତାଭ ବଚ୍ଚନ, ବୋମନ ଇରାନୀ, ଅନୁପମ ଖେର ଏବଂ ଡାନିଙ୍କ ଅଭିନୀତ ଚଳଚ୍ଚିତ୍ର 'ଉଞ୍ଚାଇ' ମୁକ୍ତିଲାଭ କରିଥିଲା। ରିଲିଜ୍ ପୂର୍ବରୁ ଫିଲ୍ମକୁ ନେଇ ସେତେଟା ଚର୍ଚ୍ଚା ନଥିବା ବେଳେ ରିଲିଜ ପରେ ଦର୍ଶକ ଫିଲ୍ମର ପ୍ରଶଂସା କରିଛନ୍ତି। ଫିଲ୍ମ ଦେଖି ଫେରୁଥିବା ଦର୍ଶକ ଏହାର ପ୍ରଶଂସା କରିଥିବା ବେଳେ ପ୍ରଥମ ଦିନରେ ଫିଲ୍ମଟି ଭଲ ଆୟ କରିଥିବା ଜଣାପଡ଼ିଛି। ଏମିତି କି କନ୍ନଡ ବ୍ଲକବଷ୍ଟର 'କାନ୍ତାରା'କୁ ମଧ୍ୟ 'ଉଞ୍ଚାଇ' ପଛର ପକାଇଥିବା ଜଣାପଡ଼ିଛି।

ସୂଚନା ମୁତାବକ, କନ୍ନଡ ବ୍ଲକବଷ୍ଟର 'କାନ୍ତାରା'(ହିନ୍ଦୀ) ପ୍ରଥମ ଦିନରେ ୧.୨୭କୋଟି ଟଙ୍କା ଆୟ କରିଥିବା ବେଳେ ବିଗ୍ ବିଙ୍କ ଅଭିନୀତ 'ଉଞ୍ଚାଇ' ପ୍ରଥମ ଦିନରେ ୧.୮୧ କୋଟି ଟଙ୍କା ଆୟ କରିଛି।

ଉଲ୍ଲେଖଯୋଗ୍ୟ,  'ଉଞ୍ଚାଇ'ର ନିର୍ଦ୍ଦେଶନା ଦେଇଛନ୍ତି ସୁରଜ ବଡଜାତ୍ୟା, ଯିଏ ପୂର୍ବରୁ' ମେନ୍ ପ୍ୟାର୍ କିୟା ',' ହମ୍ ଆପକେ ହେନ୍ କୌନ୍ 'ଏବଂ' ପ୍ରେମ ରତନ ଧନ ପାୟୋ 'ଭଳି ସୁପରହିଟ୍ ଚଳଚ୍ଚିତ୍ର ନିର୍ମାଣ କରିଛନ୍ତି। 'ଉଞ୍ଚାଇ' ହେଉଛି ତିନିଜଣ ବୃଦ୍ଧ ବନ୍ଧୁଙ୍କ କାହାଣୀ, ଯେଉଁମାନେ ଦେହାନ୍ତ ହୋଇଥିବା ବନ୍ଧୁଙ୍କ ଶେଷ ଇଚ୍ଛା ପୂରଣ କରିବା ପାଇଁ ଏଭରେଷ୍ଟ ବେସ୍ କ୍ୟାମ୍ପକୁ ଯାତ୍ରା କରନ୍ତି। ନିଜର ଅନେକ ହିଟ୍ ଚଳଚ୍ଚିତ୍ର ପରି ନିର୍ମାତାମାନେ ପ୍ରଥମ ଦିନରେ ସୀମିତ ପରଦାରେ   'ଉଞ୍ଚାଇ'ର ମୁକ୍ତିଲାଭ କରିଥିଲେ, କିନ୍ତୁ ଏହା ସତ୍ତ୍ବେ ଫିଲ୍ମଟି ଏକ ଭଲ ପ୍ରଦର୍ଶନ କରିଥିବା ଦେଖିବାକୁ ମିଳିଛି।