ଅମିତାଭଙ୍କୁ ଆକର୍ଷିତ କଲା ବୃଦ୍ଧଙ୍କ ମୁଣ୍ଡର ସୌରଶକ୍ତି ଚାଳିତ ପଙ୍ଖା

ଜଣେ ବୃଦ୍ଧ ମୁଣ୍ଡରେ ସୌରଶକ୍ତି ଚାଳିତ ପଙ୍ଖା ଲଗାଇଥିବା ଦୃଶ୍ୟ ବିଗ୍ ବି ଅମିତାଭ ବଚ୍ଚନଙ୍କୁ ବିଶେଷ ଭାବେ ଆକର୍ଷିତ କରିଛି। ସେହି ଭିଡ଼ିଓକୁ ମେଗାଷ୍ଟାର ସାମାଜିକ ଗଣମାଧ୍ୟମରେ ପୋଷ୍ଟ କରିଛନ୍ତି। ବୃଦ୍ଧ ଜଣକ ସାଧୁ ବେଶରେ ଥିଲେ ମଧ୍ୟ ବେଶ୍‌ ସମ୍ଭ୍ରାନ୍ତ ଲାଗୁଛନ୍ତି। ଶରୀରରେ ଗେରୁଆ ପୋଷାକ ପିନ୍ଧିବା ସହ ହାତରେ ଘଣ୍ଟା ଲଗାଇଛନ୍ତି। ତେବେ ବିଶେଷ ଆକର୍ଷଣର ବିଷୟ ହେଲା ବୃଦ୍ଧ ଜଣକ ମୁଣ୍ଡରେ ହେଲମେଟ୍‌ ଉପରେ ଏକ ‌ସୌରଶକ୍ତି ପ୍ୟାନେଲ ଲାଗିଥିବା ପଙ୍ଖା ଲଗାଇଛନ୍ତି। ନିଜ ଶରୀରକୁ ଥଣ୍ଡା ରଖିବା ବା ଗରମରୁ ସୁରକ୍ଷା ଦେବା ପାଇଁ ସେ ଏଭଳି ଅଭିନବ ପନ୍ଥା ଆପଣାଇଛନ୍ତି।

ମୁଣ୍ଡ ଉପରେ ସେ ଯେଉଁ ପଙ୍ଖା ଲଗାଇଛନ୍ତି ତାହାର ସାମ୍ନା ପଟ ମୁହଁ ଆଡ଼କୁ ଥିବାବେଳେ ସୌର ପ୍ୟାନେଲଟି ପିଠିପଟକୁ ରହିଛି। ଏଥିରେ ଆକର୍ଷିତ ହୋଇ ଅମିତାଭ ଟ୍ବିଟରରେ ଲେଖିଛନ୍ତି ‘ଭାରତ ଉଦ୍ଭାବନର ଜନନୀ। ଭାରତ ମାତା କୀ ଜୟ।’ ଏଥିସହିତ ବିଗ୍ ବି ସୋମବାର ତାଙ୍କର ପରବର୍ତ୍ତୀ ସିନେମା ସଂପର୍କରେ ଘୋଷଣା କରିଛନ୍ତି। କୋର୍ଟରୁମ୍ ଡ୍ରାମା ଥ୍ରିଲର ଭାବେ ‘ସେକ୍ସନ ୮୪’ ନାମରେ ନୂଆ ସିନେମା ଆସିବ। ଏଥିରେ ଡାଏନା ପେଣ୍ଟି ଅଭିନୟ କରିଛନ୍ତି। ଏହା ସହ ପ୍ରଭାସ ଓ ଦୀପିକା ପାଦୁକୋନଙ୍କୁ ନେଇ ସେ ‘ପ୍ରୋଜେକ୍ଟ କେ’ ଚଳାଇଛନ୍ତି। ହାଇଦ୍ରାବାଦରେ ପ୍ରୋଜେକ୍ଟ କେ ର ସୁଟିଂ ବେଳେ କିଛିଦିନ ତଳେ ସେ ଆହତ ହୋଇଥିଲେ।