ପ୍ରଶଂସକଙ୍କ ପାଇଁ ଅର୍ଜୁନ କପୁର କଲେ ଏଭଳି କାମ, ଯାହାକୁ ଜାଣିବା ପରେ ସମସ୍ତେ କରୁଛନ୍ତି ତାଙ୍କୁ ସଲାମ ! ଭାଇରାଲ ହେଉଛି ଭିଡ଼ିଓ
ମୁମ୍ବାଇ : କିଛି ଦିନ ହେବ ବଲିଉଡ୍ ଅଭିନେତା ଅର୍ଜୁନ କପୁର ନିଜର କୌଣସି ଫିଲ୍ମକୁ ନେଇ ଚର୍ଚ୍ଚାରେ ନ ଥିବା ବେଳେ ତାଙ୍କ ବ୍ୟକ୍ତିଗତ ଜୀବନକୁ ନେଇ ଖୁବ୍ ଆଲୋଚନା ହେଉଛି । ଏବେ ସେ ଆଉ ଗୋଟିଏ ଜିନିଷକୁ ନେଇ ଚର୍ଚ୍ଚାର ପରିସରକୁ ଆସିଛନ୍ତି । ଯେଉଁଥି ପାଇଁ ତାଙ୍କୁ ପ୍ରଶଂସକମାନେ ସଲାମ କରିବା ଆରମ୍ଭ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ,ଅର୍ଜୁନ କପୁରଙ୍କ ପାଖକୁ ତାଙ୍କର ଜଣେ ପ୍ରଶଂସକ ଏକ ଇ-ମେଲ୍ ଜରିଆରେ ନିଜ ଭାବନା ବ୍ୟକ୍ତ କରିଥିଲେ- ‘ହାଏ, ମୋ ନାଁ କରଣ ଏବଂ ମୁଁ ଚିକାଗୋରେ ରୁହେ । ମୁଁ ଅର୍ଜୁନ କପୁରଙ୍କର ବହୁତ ବଡ଼ ପ୍ରଶଂସକ । ଅର୍ଜୁନ ଯେତେବେଳେ ଇନ୍ଷ୍ଟାଗ୍ରାମରେ ଲାଇଭ୍ ଆସିଥାନ୍ତି ଏବଂ କିଛି କହିଥାନ୍ତି ମୁଁ କିଛି ବୁଝି ପାରି ନ ଥାଏ । କାହିଁକି ନା ମୁଁ ଶୁଣିବାକୁ ଅସମର୍ଥ । ଆପଣମାନଙ୍କ ମଧ୍ୟରୁ କେହି ତାଙ୍କ ଇଂରାଜୀ ସବ୍ଟାଇଟେଲ ଦେଇ ପାରିବେ କି? ଯାହାଦ୍ୱାରା ମୁଁ ବୁଝି ପାରିବି ସେ କ’ଣ କହୁଛନ୍ତି ।’
କରଣଙ୍କ ଏହି ମେଲ୍ ପାଇବା ପରେ ଅର୍ଜୁନ ଆମେରିକାନ ସାଙ୍କେତିକ ଭାଷା ଶିଖି କରଣଙ୍କୁ ଜବାବ ଦେଇଥିଲେ । ଏଥି ସହ ସେ ଏକ ଭିଡ଼ିଓ ତିଆରି କରି ଇନ୍ଷ୍ଟାରେ କରଣଙ୍କ ପାଇଁ ପୋଷ୍ଟ କରିଥିଲେ । ଯେଉଁଥିରେ କହିଥିଲେ, କରଣ ମୋ ଫିଲ୍ମ ଦେଖିବା ସହ ମୋତେ ସମର୍ଥନ କରିବା ପାଇଁ ଧନ୍ୟବାଦ୍ । ତୁମେ ମୋତେ ପସନ୍ଦ କର ସେଇଟା ମୋ ପାଇଁ ବହୁତ ବଡ଼ କଥା । ସେଥିପାଇଁ ଏହି ଭିଡ଼ିଓ ତୁମକୁ ମୋ ଭଲ ପାଇବା ଜଣାଇବା ପାଇଁ ଏକ ଛୋଟ ମାଧ୍ୟମ ବୋଲି ସେ ଲେଖିଥିବା ଦେଖା ଯାଇଛି ।