ଏହା ଭିତରେ ବିଗ୍ ବଜେଟ୍ର ଚଳଚ୍ଚିତ୍ର ‘ନାୟକର ନାଁ ଦେବଦାସ’ ଓ ମିତାଲୀ ଅପା’ ର ନାୟକ ସାଜିଛନ୍ତି ଅସିତ। ହେଲେ ଓଡ଼ିଆ ଚଳଚ୍ଚିତ୍ର ‘ଭୈରବ’ ମାଧ୍ୟମରେ ସେ ପ୍ରଥମେ ଦର୍ଶକଙ୍କ ଦୃଷ୍ଟି ଆକର୍ଷଣ କରିଥିଲେ। ଏହାପରେ ‘ନାୟକର ନାଁ ଦେବଦାସ’ରେ ଦେବଦାସ ଭୂମିକାରେ ଅବତୀର୍ଣ୍ଣ ହେଇ ସେ ଦର୍ଶକଙ୍କୁ ଚକିତ କରିଥିଲେ। ଏବେ ଅସିତଙ୍କ ଅଭିନୀତ ସିନେ-ପ୍ଲେ ‘ସଖାରାମ ବାଇଣ୍ଡର’ର ଟିଜର ରିଲିଜ୍ ହୋଇଛି। ଆଉ କିଛିଦିନ ମଧ୍ୟରେ ଏହା ପ୍ରେକ୍ଷାଳୟକୁ ଆସିବ ବୋଲି ଏହାର ମିଡିଆ ପ୍ଲାନର ଅମରେଶ ସୂଚନା ଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
୧୯୭୨ ମସିହାରେ ମରାଠାର ପ୍ରଖ୍ୟାତ ନାଟ୍ୟକାର ବିଜୟ ତେନ୍ଦୁଲକରଙ୍କ ରଚିତ ନାଟକ ‘ସଖାରାମ ବାଇଣ୍ଡର’ ବିଶ୍ୱ ନାଟକ ଜଗତର ଦୃଷ୍ଟି ଆକର୍ଷଣ କରିଥିଲା। ସଖାରାମ ଏକ ପ୍ରେସ୍ରେ ବହି ବାଇଣ୍ଡର କାମ କରେ। ସେ ଚିରାଚରିତ ସମାଜର ବ୍ୟବସ୍ଥା ପ୍ରତି ବିଦ୍ରୋହାତ୍ମକ ବିଚାର ରଖେ; ଯେପରିକି ମିଥ୍ୟା ଆଚରଣ, ପ୍ରବଞ୍ଚନା ଇତ୍ୟାଦି। ପତି ପରିତକ୍ତ୍ୟା ନାରୀମାନଙ୍କୁ ସେ ଆଶ୍ରୟ ଦିଏ। କେବଳ ଏହି ସର୍ତ୍ତରେ ଯେ ସେ ସହଧର୍ମିଣୀର ସମସ୍ତ କର୍ତ୍ତବ୍ୟ ନିର୍ବାହ ପୂର୍ବକ ହିଁ ତା’ଘରେ ତଥା ତା’ର ପୃଷ୍ଠପୋଷକତାରେ ରହିପାରିବ।
‘ସଖାରାମ ବାଇଣ୍ଡର’ ଓଡ଼ିଆ ଭାଷାରେ ରୂପାନ୍ତର ହୋଇ ଅନେକ ଥର ମଞ୍ଚସ୍ଥ ହେଇଛି। ହେଲେ ଏହି ନାଟକକୁ ନେଇ ଓଡ଼ିଆ ଭାଷାରେ ପ୍ରଥମ ଥର ପାଇଁ ସିନେମା ତିଆରି ହେଇଛି। ଏହାର ନିର୍ଦ୍ଦେଶନା ଦେଇଛନ୍ତି ଅସିତ। ଏଥିରେ ବିଭିନ୍ନ ଭୂମିକାରେ ଅଛନ୍ତି ଅସିତ, ଶ୍ବେତା ଆଚାର୍ଯ୍ୟ, ରେଶ୍ମାଞ୍ଜଳି, ସୁଜିତ ପାଇକରାୟ, ପିଣ୍ଟୁ ନନ୍ଦ। ବ୍ରଜଲକ୍ଷ୍ମୀ ମୁଭିଜ଼୍ ପ୍ରଡକ୍ସନ୍ ହାଉସ୍ ନିବେଦିତ ଏବଂ ଭି-ଟ୍ୟୁନ୍ସର ତତ୍ତ୍ବାବଧାରକ ସୁନୀଲ ପଟ୍ଟନାୟକଙ୍କ ପ୍ରଯୋଜିତ ଏଇ ସିନେ ନାଟକ ସିନେ-ପ୍ଲେର ଅବତାରଣା ଓଡ଼ିଆରେ ପ୍ରଥମ ଥର ପାଇଁ ପ୍ରୟାସ କରାଯାଇଛି।