ରିଲିଜ୍ ହେଲା 'ଭୁଲ ଭୁଲୈୟା-୩'ର ଟ୍ରେଲର, ନଜର ଆସିଲେ ମାଧୁରୀ ଦୀକ୍ଷିତ

ମୁମ୍ବାଇ: ବର୍ତ୍ତମାନ ହରର କମେଡିକୁ ନେଇ ଦର୍ଶକଙ୍କ ମଧ୍ୟରେ କ୍ରେଜ୍ ରହିଛି। କିଛି ଦିନ ତଳେ ରିଲିଜ୍ ହୋଇଥିବା ଫିଲ୍ମ ସ୍ତ୍ରୀ-୨କୁ ଦର୍ଶକଙ୍କ ଭଲପାଇବା ମିଳିଥିବା ବେଳେ ଏବେ ଆଉ ଏକ ହରର କମେଡିକୁ ଅପେକ୍ଷା କରିଛନ୍ତି ଦର୍ଶକ। ଫିଲ୍ମଟି ହେଉଛି  'ଭୁଲ ଭୁଲୈୟା-୩'। କିଛି ଦିନ ତଳେ ବଲିଉଡ ଅଭିନେତା କାର୍ତ୍ତିକ ଆରୟନ 'ଭୁଲ ଭୁଲୈୟା-୩'ର ପ୍ରଥମ ଝଲକ ଦେଖାଇ ନିଜ ଇନଷ୍ଟାଗ୍ରାମରେ ଫିଲ୍ମର ଟିଜର ରିଲିଜ୍ କରିଥିବା ବେଳେ ଦର୍ଶକଙ୍କ ଉତ୍ସାହ ବଢ଼ିଥିଲା। ଆଜି ଫିଲ୍ମର ଟ୍ରେଲର ରିଲିଜ୍ ହୋଇଛି। 

ଟ୍ରେଲରରେ ମାଧୁରୀ ଦୀକ୍ଷିତଙ୍କ ଏଣ୍ଟ୍ରି ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ଟି-ସିରିଜର ୟୁଟ୍ୟୁବ ଚ୍ୟାନେଲ‌ରେ ଟ୍ରେଲର ରିଲିଜ୍ ହୋଇଥିବା ବେଳେ ମାଧୁରୀଙ୍କୁ ଭିନ୍ନ ଅବତାରରେ ଦେଖିବାକୁ ମିଳିଛି। ସେ ଏହି ଚଳଚ୍ଚିତ୍ରରେ ମଞ୍ଜୁଲିକା ଭୂମିକାରେ ନଜର ଆସିବେ । ଏହାର ଅର୍ଥ ହେଉଛି ଏଥର ରୁହ ବାବା ଗୋଟିଏ ନୁହେଁ ବରଂ ଦୁଇ ଜଣ ମଞ୍ଜୁଲିକା ମାଧୁରୀ ଓ ବିଦ୍ୟାଙ୍କ ସହ ମୁକାବିଲା କରିବେ । ଫିଲ୍ମରେ ଉଭୟ ଅଭିନେତ୍ରୀଙ୍କ ନୃତ୍ୟ ମଧ୍ୟ ରହିଛି।

ପ୍ରଥମ ଭାଗରେ ଅଭିନେତ୍ରୀ ବିଦ୍ୟା ବାଲାନ ଏକ ଗୁରୁତ୍ବପୂର୍ଣ୍ଣ ଭୂମିକା ନିଭାଇଥିବା ବେଳେ ଦ୍ବିତୀୟ ଭାଗରେ ତାଙ୍କୁ ଦେଖିବାକୁ ମିଳିନଥିଲା। ହେଲେ ଏବେ ତୃତୀୟ ଭାଗରେ ପୁଣି ଥରେ ବିଦ୍ୟା ବାଲାନଙ୍କୁ କାଷ୍ଟ କରିଛନ୍ତି ନିର୍ମାତା।