ଗୌହର ଖାନ୍‌ଙ୍କ ସହ ସରିଥିଲା ନିର୍ବନ୍ଧ‌; ୩୫୦ ଜଣ ଯୁବତୀଙ୍କୁ ଡେଟ୍‌ କରୁଥିଲେ ସାଜିଦ୍‌!

ମୁମ୍ବ‌ାଇ: ବିଗ୍ ବସ୍-୧୬କୁ ଯିବା ପରେ ବଲିଉଡ ନିର୍ଦ୍ଦେଶକ ସାଜିଦ ଖାନଙ୍କୁ ନେଇ ଗୋଟାଏ ପରେ ଗୋଟାଏ କଥା ଏବେ ଭାଇରାଲ୍‌ ହେବାରେ ଲାଗିଛି। ୧୦ରୁ ଅଧିକ ମହିଳା ତାଙ୍କ ଉପରେ ଯୌନ ଅସଦାଚରଣର ଆରୋପ ଲଗାଇଥିବା ବେଳେ ‌ସେ ନିଜେ ୩୫୦ ଜଣ ଯୁବତୀଙ୍କୁ ଡେଟ୍‌ କରିଥିବା କହୁଥିବା ବେଳର ତାଙ୍କର ଏକ ପୁରୁଣା ଭିଡିଓ ଭାଇରାଲ୍‌ ହେବାରେ ଲାଗିଛି।

ସାଜିଦଙ୍କର ଏକ ପୁରୁଣା ଇଣ୍ଟରଭ୍ୟୁର ଭିଡିଓ ସୋସିଆଲ୍‌ ମିଡିଆରେ ଭାଇରାଲ୍‌ ହେବାରେ ଲାଗିଛି। ସେଥିରେ ସେ ଅଭିନେତ୍ରୀ ଗୌହର ଖାନ୍‌ଙ୍କ ସହ ନିଜର ପ୍ରେମ ସଂପର୍କ କଥାକୁ ସ୍ବୀକାର କରିବା ସହ ତାଙ୍କ ସହ ସାଜିଦଙ୍କର ନିର୍ବନ୍ଧ ବି ହୋଇ ଯାଇଥିବା କଥା କହୁଥିବାର ଶୁଣିବାକୁ ମିଳିଛି। ଗୌହରଙ୍କ ସହ ତାଙ୍କ ସଂପର୍କ ଭାଙ୍ଗିବାର ଦୋଷ ସେ ନିଜକୁ ଦେଇଛନ୍ତି।

ଗୌହରଙ୍କୁ ସେ ଜଣେ ଭଲ ଝିଅ ବୋଲି କହିବା ସହ ତାଙ୍କ ସହ ସଂପର୍କରେ ଥିବା ବେଳେ ସେ ଅନେକ ଝିଅଙ୍କ ସହ କଥାବାର୍ତ୍ତା ହେଉଥିଲେ ବୋଲି ମାନିଛନ୍ତି। ସେ ଆହୁରି ବି କହିଛନ୍ତି ଯେ ଆବଶ୍ୟ ସେ କାହା ସହ କେବେ ଅଭଦ୍ରାମୀ କରନ୍ତି ନାହିଁ, ମାତ୍ର ଯେଉଁ ବି ଝିଅ ସହ ସଂପର୍କରେ ରହନ୍ତି ତାଙ୍କୁ ପ୍ରେମ ନିବେଦନ କରିବା ସହ ବିବାହ ପ୍ରସ୍ତାବ ବି ଦିଅନ୍ତି। ସେ ଏକଦମ ମଜାକିଆ ଅନ୍ଦାଜରେ କହୁଥିବାର ଶୁଣିବାକୁ ମିଳିଛନ୍ତି ଯେ ଯେତେ ଝିଅଙ୍କୁ ମୁଁ ପ୍ରେମ ନିବେଦନ କରିଛି ଏବେ ସୁଦ୍ଧା ମୋର ୩୫୦ ବିବାହ ହୋଇଯିବା କଥା।