ଭୁବନେଶ୍ୱର: ଭୁବନେଶ୍ବର ମହାନଗର ନିଗମ(ବିଏମ୍‌ସି) ପ୍ଲାନିଂ ସେକ୍ସନ୍‌ର ୨ ଅଧିକାରୀଙ୍କୁ ଭୁବନେଶ୍ବର ଉନ୍ନୟନ ସଂସ୍ଥା(ବିଡିଏ)ର ଟାଉନ୍‌ ପ୍ଲାନିଂ ବିଭାଗରେ ଅତିରିକ୍ତ ଦାୟିତ୍ବ ମିଳିଛି। ଏନେଇ ରାଜ୍ୟ ଗୃହନିର୍ମାଣ ଓ ନଗର ଉନ୍ନୟନ ବିଭାଗ ପକ୍ଷରୁ ସ୍ବତନ୍ତ୍ର ଚିଠି କରାଯାଇଛି। ଗତମାସ ୨୮ ତାରିଖରୁ ଏହି ଚିଠି କରାଯାଇଛି। କିନ୍ତୁ ଅଧିକାରୀଦ୍ବୟ ବିଡିଏରେ ଦାୟିତ୍ବ ନେଇନାହାନ୍ତି। 
ବିଏମ୍‌ସି ପ୍ଲାନିଂ ସେକ୍ସନ୍‌ର ଆସିଷ୍ଟାଣ୍ଟ ଟାଉନ୍ ପ୍ଲାନର୍ ସୌରଭ ମହାପାତ୍ରଙ୍କୁ ରାଜ୍ୟ ଗୃହନିର୍ମାଣ ଓ ନଗର ଉନ୍ନୟନ ବିଭାଗର ଆଦେଶ ସଂଖ୍ୟା-୧୨୧୦୩ ଓ ଆସିଷ୍ଟାଣ୍ଟ ଟାଉନ୍ ପ୍ଲାନର୍ ସସ୍ମିତା ଗୁରୁଙ୍କୁ ଆଦେଶ ସଂଖ୍ୟା- ୧୨୦୯୯ରେ ବିଡିଏର ଟାଉନ୍ ପ୍ଲାନିଂ ସେକ୍ସନ୍‌ର ଭାଲ୍ୟୁଏସନ୍ ଅଧିକାରୀ ଭାବେ ଅତିରିକ୍ତ ଦାୟିତ୍ବ ମିଳିଛି। ସୌରଭ ମହାପାତ୍ରଙ୍କୁ ବିଡିଏ ଟାଉନ୍ ପ୍ଲାନିଂ ଯୋଜନା ନମ୍ବର ୧ ଓ ୨ର ଭାଲ୍ୟୁଏସନ୍ ଅଧିକାରୀ ଭାବେ ଅତିରିକ୍ତ ଦାୟିତ୍ବ ମିଳିଛି। ସେହିଭଳି ସସ୍ମିତା ଗୁରୁଙ୍କୁ ବିଡିଏ ଟାଉନ୍ ପ୍ଲାନିଂ ଯୋଜନା ନମ୍ବର-୩ ଓ ୪ର ଭାଲ୍ୟୁଏସନ୍ ଅଧିକାରୀ ଭାବେ ଅତିରିକ୍ତ ଦାୟିତ୍ବ ମିଳିଛି। କିନ୍ତୁ ଦୁଇ ଅଧିକାରୀ ଅଦ୍ୟାବଧି ଅତିରିକ୍ତ ଦାୟିତ୍ବ ଗ୍ରହଣ କରିନାହାନ୍ତି। ଫଳରେ ବିଡିଏର ଟାଉନ୍‌ ପ୍ଲାନିଂ ଯୋଜନା ପ୍ରଭାବିତ ହେଉଥିବା କୁହାଯାଉଛି। ଭୁବନେଶ୍ବରର ବିକାଶ ପାଇଁ ଗୁଜରାଟ ମଡେଲ୍ ଟାଉନ୍ ପ୍ଲାନିଂ ଯୋଜନା ଗ୍ରହଣ କରାଯାଇଛି। ବିଡିଏ ଏହି କାମ ବୁଝୁଛି। କିନ୍ତୁ ବିଡିଏରେ ଆବଶ୍ୟକ ସଂଖ୍ୟକ ଟାଉନ୍ ପ୍ଲାନିଂ ଅଧିକାରୀ ନ ଥିବାରୁ ଏହି ଯୋଜନା ଆଗେଇପାରୁନି ବୋଲି ବିଡିଏର ଅଧିକାରୀମାନେ କହିଛନ୍ତି। ଏଣୁ ଯେତେଶୀଘ୍ର ଏହି ଦୁଇ ଅଧିକାରୀ କାର୍ଯ୍ୟରେ ଯୋଗଦେବେ, ସେତେ ଭଲ ବୋଲି ସେମାନେ କହିଛନ୍ତି। 
ଏ ସମ୍ପର୍କରେ ବିଏମ୍‌ସି ଅତିରିକ୍ତ କମିସନର୍ ଶୁଭେନ୍ଦୁ କୁମାର ସାହୁ କହିଛନ୍ତି ଯେ ବିଏମ୍‌ସିରେ ମଧ୍ୟ ଟାଉନ୍ ପ୍ଲାନିଂ ଅଧିକାରୀ ପଦବି ଅଭାବ ରହିଛି। ଏଭଳି ସ୍ଥିତିରେ ଯଦି ଏହି ଦୁଇ ଟାଉନ୍ ପ୍ଲାନିଂ ଅଧିକାରୀ ବିଡିଏରେ ଅତିରିକ୍ତ ଦାୟିତ୍ବ ନେବେ, ଏପଟେ ବିଏମ୍‌ସିର ଟାଉନ୍ ପ୍ଲାନିଂ କାମ ଅଟକିଯିବ। ତେଣୁ ଏ ଦିଗରେ ଏକ ସ୍ଥାୟୀ ସମାଧାନ ପାଇଁ ବିଚାରବିମର୍ଶ ଚାଲିଛି ବୋଲି ଶ୍ରୀ ସାହୁ କହିଛନ୍ତି।