‘ରେସ୍-୩’ ପରେ ଏବେ ‘ହାଉସଫୁଲ-୪’ ରେ ନଜର ଆସିବେ ବବି ଦେଓଲ
ମୁମ୍ବାଇ: ଦୀର୍ଘ ୪ବର୍ଷ ପର୍ଯ୍ୟନ୍ତ ଫିଲ୍ମ ଦୁନିଆରୁ ଦୂରେଇ ରହିବା ପରେ ଏବେ ପୁଣି ଫେରୁଛନ୍ତି ବବି ଦେଓଲ । ଏକ ନୂଆ ଲୁକ୍ ଏବଂ ମେକ୍ଓଭର ନେଇ ସେ ପୁଣି ଥରେ ଫିଲ୍ମକୁ ଫେରୁଛନ୍ତି । କିଛି ଦିନ ତଳେ ସେ ସଲମାନ ଖାନ୍ଙ୍କ ସହ ‘ରେସ-୩’ରେ ନଜର ଆସୁଛନ୍ତି ବୋଲି ଖବର ସ୍ପଷ୍ଟ ହେବା ପରେ ଏବେ ସେ ଆଉ ଏକ ବଡ଼ ବ୍ୟାନରର ଫିଲ୍ମ ‘ହାଉସ୍ଫୁଲ-୪’ରେ ଅଭିନୟ କରିବେ ବୋଲି ଜଣା ପଡ଼ିଛି । ଏମିତି ଗୋଟେ ପରେ ଗୋଟେ ବଡ଼ ବ୍ୟାନରର ସିନେମା ମିଳିବା ପରେ ବବି ବହୁତ ଖୁସିଥିବା ଜଣା ପଡ଼ିଛି ।
ତାଙ୍କ କହିବା ଅନୁଯାୟୀ, ‘୪ବର୍ଷ ପୂର୍ବରୁ ଯେତେବେଳେ ମୁଁ ଫିଲ୍ମ ଦୁନିଆ ଛାଡ଼ିଥିଲି, ସେତେବେଳେ ମୁଁ ଆଜି ଯେଉଁଠି ଅଛି ସେଇଠି ପହଞ୍ଚିବି ବୋଲି ଭାବି ନ ଥିଲି । ମୁଁ ସବୁବେଳେ ସାଜିଦ୍ ନାଦିଆଦ୍ଓ୍ଵାଲାଙ୍କ ସହ କାମ କରିବା ପାଇଁ ଇଚ୍ଛା ରଖି ଆସିଥିଲି ଏବଂ ଶେଷରେ ଏହା ‘ହାଉସଫୁଲ୍-୪’ ମାଧ୍ୟମରେ ପୂରା ହେବାକୁ ଯାଉଛି । ଅକ୍ଷୟଙ୍କ ସହ ମୁଁ ଆଗରୁ ୪ଟି ଫିଲ୍ମ କରି ସାରିଛି । ଏତେ ଦିନ ପରେ ପୁଣି ଥରେ ତାଙ୍କ ସହ ସ୍କ୍ରିନ ସେୟାର କରିବାକୁ ଯାଇଥିବାରୁ ମୁଁ ବହୁତ ଖୁସି ।’
Sambad is now on WhatsApp
Join and get latest news updates delivered to you via WhatsApp
୨୦୧୨ରେ ବବିଙ୍କ ଅଭିନୀତ ଶେଷ ଫିଲ୍ମ ‘ପ୍ଲେୟାର’ ରିଲିଜ ହୋଇଥିଲା । ଏହା ପରେ ସେ ଆଉ ପରଦା ଉପରେ ନଜର ଆସି ନ ଥିଲେ । ବଲିଉଡ଼ରେ ତାଙ୍କର କ୍ୟାରିୟର ସମାପ୍ତ ହୋଇଗଲା ବୋଲି ଦର୍ଶକେ ଭାବୁଥିବା ବେଳେ ଏବେ ସେ ପୁଣି ଥରେ ଦର୍ଶକଙ୍କ ମନୋରଞ୍ଜନ କରିବା ପାଇଁ ନିଜର ଯାତ୍ରା ଆରମ୍ଭ କରିଛନ୍ତି । ତେବେ ସେ କେତେ ଦୂର ସଫଳ ହେଉଛନ୍ତି ତାହା ଦେଖିବାକୁ ବାକି ରହିଲା ।