ସାବରମତୀ ଆଶ୍ରମରେ ପହଞ୍ଚି ସୂତା କାଟିଲେ ସଲମାନ
ମୁମ୍ବାଇ: ବଲିଉଡ୍ ସୁପରଷ୍ଟାର ସଲମାନ୍ ଖାନଙ୍କ ଫିଲ୍ମ ‘ଅନ୍ତିମ ଦ ଫାଇନାଲ୍ ଟ୍ରୁଥ୍’ ରିଲିଜ୍ ହୋଇସାରିଛି । ସିନେମା ହଲରେ ଫିଲ୍ମକୁ ନେଇ ଦର୍ଶକଙ୍କ ମନରେ ଉତ୍ସାହ ମଧ୍ୟ ଦେଖିବାକୁ ମିଳିଛି । ତେବେ ବର୍ତ୍ତମାନ ସୁଦ୍ଧା ଫିଲ୍ମ ବକ୍ସ ଅଫିସରେ ସେତେ ଭଲ ରୋଜଗାର କରିପାରି ନଥିବା ସୂଚନା ରହିଛି ।
ଅନ୍ୟପଟେ ‘ଅନ୍ତିମ’ ଫିଲ୍ମର ପ୍ରମୋସନ ପାଇଁ ଏବେ ଲାଗିପଡିଛନ୍ତି ସଲମାନ ଖାନ । ସୋମବାର ସଲମାନ ଗୁଜରାଟରେ ନିଜର ଫିଲ୍ମର ପ୍ରମୋସନ ଚଳାଇଥିବାବେଳେ, ସାବରମତୀ ଆଶ୍ରମରେ ପହଞ୍ଚିଥିଲେ ।
Sambad is now on WhatsApp
Join and get latest news updates delivered to you via WhatsApp
ଏହି ସମୟରେ ସଲମାନ ସାବରମତୀ ଆଶ୍ରମରେ କିଛି ସମୟ କାଟିବା ସହିତ ସେଠାରେ ସୁତା କାଟିଥିବା ମଧ୍ୟ ଦେଖିବାକୁ ମିଳିଥିଲା, ଯାହାର ଫଟୋ ଏବେ ସୋସିଆଲ୍ ମିଡିଆରେ ବେଶ ଭାଇରାଲ ହେବାରେ ଲାଗିଛି । ଭାଇରାଲ ହେଉଥିବା ଫଟୋରେ ବଲିଉଡ୍ ଭାଇଜାନ୍ ସଲମାନ୍ ଅରଟ ଧରି ସୂତା କାଟୁଥିବା ନଜର ଆସୁଛନ୍ତି । ଖାଲି ସେତିକି ନୁହେଁ, ଏହି ସମୟରେ ତାଙ୍କ ସହିତ କିଛି ଫ୍ୟାନ୍ସ ମଧ୍ୟ ନଜର ଆସିଛନ୍ତି । ତେବେ ସଲମାନ ଆଜି ତାଙ୍କ ବଡିଗାର୍ଡ ଶେରାଙ୍କ ସହିତ ଗୁଜରାଟର ଗାନ୍ଧୀ ଆଶ୍ରମରେ ପହଞ୍ଚିଥିଲେ । ସଲମାନ ସେଠାରେ ପହଞ୍ଚିବା ପରେ ସେଠାରେ ଲୋକଙ୍କ ପ୍ରବଳ ଭିଡ ଦେଖିବାକୁ ମିଳିଥିଲା ।
ଏହା ପୂର୍ବରୁ ସଲମାନ ଖାନ୍ ବିଭିନ୍ନ ରିୟାଲିଟି ସୋରେ ମଧ୍ୟ ‘ଅନ୍ତିମ’ର ପ୍ରମୋସନ କରିସାରିଛନ୍ତି । ଏବେ ସେ ଦେଶର ବିଭିନ୍ନ ସହର ବୁଲି ଫିଲ୍ମର ପ୍ରମୋସନ କରୁଛନ୍ତି । ଅହମ୍ମଦାବାଦ ପରେ ସଲମାନ ହାଇଦ୍ରାବାଦ ମଧ୍ୟ ଯାଇପାରନ୍ତି ବୋଲି ସୂଚନା ମିଳୁଛି । ଅନ୍ୟପଟେ ଫିଲ୍ମ କଥା ଦେଖିବାକୁ ଗଲେ, ଗତ ଦୁଇ ଦିନ ଭିତରେ ଅନ୍ତିମ ବକ୍ସ ଅଫିସରେ ମାତ୍ର ୧୦ କୋଟି ଟଙ୍କା ରୋଜଗାର କରିପାରିଛି ।