ବିବାହ ବାର୍ଷିକ ପାଳନ କରିବାକୁ ବିଦେଶ ଯାଇଥିବା ଦିବ୍ୟଙ୍କା ଓ ତାଙ୍କ ସ୍ବାମୀ ହେଲେ ଲୁଟର ଶିକାର

ନୂଆଦିଲ୍ଲୀ: ଟେଲିଭିଜନ ଅଭିନେତ୍ରୀ ଦିବ୍ୟଙ୍କା ତ୍ରିପାଠୀ ତାଙ୍କ ସ୍ବାମୀଙ୍କ ସହିତ ବିଦେଶ ଯାଇଥିବା ବେଳେ ଠକେଇର ଶିକାର ହୋଇଛନ୍ତି।

ନିକଟରେ ହୋଇଥିବା ଏକ ସ‌ାକ୍ଷାତକାରରେ ଦିବ୍ୟଙ୍କ‌ାଙ୍କ ସ୍ବାମୀ ସମ୍ପୂର୍ଣ୍ଣ ଘଟଣା ବିଷୟରେ ଆଲୋଚନା କରି କହିଛନ୍ତି, ‘୮ମ ବିବାହ ବାର୍ଷିକ ପାଳନ କରିବା ପାଇଁ ଆମେ ୟୁରୋପ ଯାତ୍ରା କରିଥିଲୁ। ଏହି ଯାତ୍ରା ଆମର ଭଲରେ ଯାଉଥିଲା। ଗତକାଲି ଆମେ ଫ୍ଲୋରେନ୍ସରେ ରହିବାକୁ ଆସିଥିଲୁ। ଯେଉଁ ହୋଟେଲରେ ରହିବାର ଥିଲା ତାହାକୁ ଆମେ ଦେଖିବାକୁ ଯାଉଥିଲୁ।

ତେଣୁ ପାର୍କିଂରେ କାର ଛାଡ଼ି ଦେଇଥିଲୁ। ହୋଟେଲ ଦେଖି କାରରୁ ଜିନିଷ ନେବାକୁ ଯାଉଥିବା ବେଳେ ଆମେ ତାହାର ଦୃଶ୍ୟ ଦେଖି ଚକିତ ହୋଇ ଯାଇଥିଲୁ। କାରଣ କାରର ଦ୍ବାର ଭଙ୍ଗା ଯାଇଥିଲା। ଚାରିପାର୍ଶ୍ବର କାଚ ଭାଙ୍ଗି ଦିଆଯାଇଥିଲା। କାର ଭିତରେ ଥିବ‌ା ଜରୁରୀ ଓ ମୂଲ୍ୟବାନ ସାମଗ୍ରୀ ଚୋରି ହୋଇଯାଇଥିଲା।

ଆମେ ସ୍ଥାନୀୟ ପୁଲିସକୁ ଏଘଟଣା ବିଷୟରେ ଜଣାଇଥିଲୁ। ସେମାନେ ସିସିଟିଭି ଫୁଟେଜ ବିନା ମାମଲା ରୁଜୁ କରି ପାରିବେ ନାହିଁ ବୋଲି ରୋକଠୋକ ମନା କରି ଦେଇଥିଲେ। ସନ୍ଧ୍ୟା ୬ଟା ସୁଦ୍ଧା ପୁଲିସ ଷ୍ଟେସନ ବନ୍ଦ ହୋଇଯାଇଥିଲା।

ଦିବ୍ୟଙ୍କା ଇନଷ୍ଟାଗ୍ରାମରେ ଏକ ‌ପୋଷ୍ଟ ସେୟାର କରି ଲେଖିଛନ୍ତି, ‘ମୁଁ ଏବଂ ବିବେକ ଠିକ ଅଛୁ।  କିନ୍ତୁ ଆମର ପାସପୋର୍ଟ, କିଛି ଜରୁରୀ  ଓ ମୂଲ୍ୟବାନ ସମାଗ୍ରୀ ଚୋରି ହୋଇଯାଇଛି।’