ପୁଣି ଫେରିବ ହସୀନ ଦିଲରୁବା

୨୦୨୧ ମସିହାରେ ମୁକ୍ତିଲାଭ କରିଥିବା ‘ହସୀନ ଦିଲରୁବା’ର ପରବର୍ତ୍ତୀ ଭାଗ ‘ଫିର୍ ଆୟୀ ହସୀନ ଦିଲରୁବା’ ପୂର୍ବ କାହାଣୀକୁ ଆଗେଇନେବ। ଅଭିନେତ୍ରୀ ତାପସୀ ପନ୍ନୁ ଏଥିରେ ମଧ୍ୟ ମୁଖ୍ୟ ଚରିତ୍ରରେ ଦେଖାଦେବେ। ନିକଟରେ ଏହାର ସୁଟିଂ ଆରମ୍ଭ ହୋଇଥିବାର ଜଣାପଡ଼ିଛି। ନିର୍ଦେଶକ ଆନନ୍ଦ ଏଲ୍‌. ରାୟ ଟୁଇଟର୍‌ରେ ଏ ନେଇ ଘୋଷଣା କରିଛନ୍ତି। ବ୍ୟଙ୍ଗାତ୍ମକ ଢଙ୍ଗରେ ସେ ତାପସୀଙ୍କ ଉଦ୍ଦେଶ୍ୟରେ ଲେଖିଛନ୍ତି, ‘ତାପସୀ, ତୁମକୁ କହିଥିଲି ନା ନଅଟା ବେଳେ ସିନେମାର ପୋଷ୍ଟର ଛାଡ଼ିବାକୁ, ଏଯାଏଁ ତାହା ଛାଡ଼ି ନାହଁ କାହିଁକି?’

ଏହାର ଉତ୍ତରରେ ତାପସୀ ସିନେମାର ଲେଖିକା କନିକା ଢିଲୋଁଙ୍କୁ ଏ ଭିତରକୁ ଟାଣିଆଣି କହିଛନ୍ତି ଯେ ସେ ପୋଷ୍ଟର୍ ଛାଡ଼ିବାକୁ ଏଯାଏଁ ପ୍ରସ୍ତୁତ ନାହାନ୍ତି, କାରଣ କନିକା ତାଙ୍କ ଚରିତ୍ରକୁ ଯେଉଁ ସ୍ତରକୁ ନେଇଯାଇଛନ୍ତି ତାହା ଶୁଣି ତାଙ୍କ ରକ୍ତଚାପ ବଢ଼ିଯାଇଛି। ତେଣୁ ‘ଫିର୍ ଆୟୀ ହସୀନ ଦିଲରୁବା’ରେ ତାପସୀଙ୍କୁ ଆହୁରି ଚତୁର ତଥା ନିଷ୍ଠୁର ଭୂମିକାରେ ଦେଖିବାକୁ ମିଳିବ ବୋଲି ଅନୁମାନ କରାଯାଉଛି। ଏଥିରେ ପୂର୍ବ ଚଳଚ୍ଚିତ୍ରର ବିକ୍ରାନ୍ତ ମାସି ଓ ହର୍ଷବର୍ଦ୍ଧନ ରାଣେଙ୍କ ଚରିତ୍ରକୁ ମଧ୍ୟ ଦର୍ଶକେ ଦେଖିବାକୁ ପାଇବେ।