ସେପ୍ଟେମ୍ବର ୬ରେ ଆଇ ଲଭ୍ ୟୁ ୨

ଗଣେଶ ପୂଜା ଅବସରରେ ମୁକ୍ତିଲାଭ କରିବ ସଂଜୟ ନାୟକ (ଟୁଟୁ)ଙ୍କ ପ୍ରଯୋଜିତ ‘ଆଇ ଲଭ୍ ୟୁ ୨’। ନିର୍ମାତାଙ୍କ ସୂଚନା ଅନୁଯାୟୀ, ‘ଆଇ ଲଭ୍ ୟୁ ୨’ ସେପ୍ଟେମ୍ବର ୬ ତାରିଖରେ ସାରା ଓଡ଼ିଶାରେ ମୁକ୍ତିଲାଭ କରିବ।  ଏବେ ନିର୍ମାତା ଫିଲ୍ମର ପ୍ରଚାର କାମ ଜୋରସୋରରେ ଚଳାଇଛନ୍ତି। ଏହାର ହୋର୍ଡିଂ କଟକ-ଭୁବନେଶ୍ବର ଏବଂ ଆଉ କେତେକ ପ୍ରମୁଖ ସହରରେ ଦେଖିବାକୁ ମିଳିଲାଣି।

 ସୁଧାଂଶୁ ମୋହନ ସାହୁଙ୍କ ନିର୍ଦ୍ଦେଶିତ ଏହି ଛବିରେ ନୂଆ ନାୟକନାୟିକାଙ୍କୁ ଦେଖିବାକୁ ପାଇବେ ସିନେପ୍ରେମୀ। ଏଥିରେ ନାୟକ ସଂଜୟ ଓ ଗୀତା ଭୂମିକାରେ ଯଥାକ୍ରମେ ଆଦିତ୍ୟ ଓ ଅପ୍‌ସରା ରାଣୀ ଅଭିନୟ କରିଛନ୍ତି। ଏହାଛଡ଼ା ବବି ମିଶ୍ର, ସନ୍ତୁ, ସୁନୀଲ କୁମାର ଓ ମିତାଲି ସରଘରିଆ ବି ନଜର ଆସିବେ। ‘ଆଇ ଲଭ୍ ୟୁ ୨’ରେ ଆଦିତ୍ୟ ଓ ଅପ୍ସରାଙ୍କ ଯୋଡ଼ି ସଙ୍ଗକୁ ସୁନୀଲ-ମିତାଲିଙ୍କ ଯୋଡ଼ି ବି ଅଛନ୍ତି। ପ୍ରିୟବ୍ରତ ପଣ୍ଡା ଏହାର ଚିତ୍ରନାଟ୍ୟ ଓ ସଂଳାପ ରଚନା କରିଛନ୍ତି। ପ୍ରେମ ଆନନ୍ଦ ଏହାର ସଙ୍ଗୀତକାର ଏବଂ ଦୀପକ କୁମାର ଫିଲ୍ମର ସିନେମାଟୋଗ୍ରାଫର୍।

ଏହି ସିନେମାରେ ଦର୍ଶକ ରୋମାନ୍ସ ସଙ୍ଗକୁ କମେଡି ଓ ଆକ୍ସନର ଧମାକା ବି ଦେଖିବାକୁ ପାଇବେ। ଏହାର ଅଧିକାଂଶ ସୁଟିଂ କଶ୍ମୀରର ବିଭିନ୍ନ ଲୋକେସନ୍‌ରେ କରାଯାଇଛି। ‘ଆଇ ଲଭ୍ ୟୁ ୨’ର ଟିଜର୍‌କୁ ଯେଉଁଭଳି ଦର୍ଶକ ପସନ୍ଦ କରିଛନ୍ତି, ସିନେମାକୁ ଅନୁରୂପ ଭଲପାଇବା ଦେବେ ବୋଲି ଆଶା ରଖିଛନ୍ତି ପ୍ରଯୋଜକ।