ଯଦି କେବେ କାଷ୍ଟିଙ୍ଗ କାଉଚ୍ର ସାମ୍ନା କରେ ତେବେ ବିରୋଧ କରିବି : ଆହାନା
ଆହାନା ଓଲିଉଡରେ ନୂଆ କରି ପାଦ ଦେଇଛନ୍ତି। ତାଙ୍କର ପ୍ରଥମ ଫିଲ୍ମ ‘ଭୈରବ’ ରିଲିଜ୍ ହୋଇ ସାରିଥିବା ବେଳେ ଦ୍ୱିତୀୟ ଚଳଚ୍ଚିତ୍ର ‘ବ୍ଲାକମେଲ୍’ର ସୁଟିଂ ଚାଲୁ ରହିଛି । ଏହି ନବାଗତା ନାୟିକାଙ୍କୁ ସମ୍ବାଦ ଡଟ୍ ଇନ୍ ପକ୍ଷରୁ ସାକ୍ଷାତ କରିଥିଲେ ସୁମନ ମହାନ୍ତି ଏବଂ ମୋନାଲିସା ପରିଡ଼ା।
Sambad is now on WhatsApp
Join and get latest news updates delivered to you via WhatsApp
ଆପଣ ଜଣେ ଅଭିନେତ୍ରୀ ହେବେ ବୋଲି କେବେ ଭାବିଥିଲେ କି ?
କେବେ ବି ନୁହେଁ । ମୁଁ ଛୋଟ ବେଳେ କେବେ ବି ଅଭିନୟ କରିନି । ୨ ବର୍ଷ କେବଳ ନାଚ ଶିଖୁଥିଲି । ତା’ପରେ ପାଠପଢ଼ା ପାଇଁ ମୁଁ ନାଚକୁ ଛଡ଼ିଥିଲି । ସବୁବେଳେ ଟିଭିରେ ହିରୋଇନ୍ ମାନଙ୍କୁ ଦେଖି ସବୁ ଝିଅଙ୍କ ଭଳି ମୋର ବି ଇଛା ହୁଏ ଟିଭିରେ ଆସିବା ପାଇଁ । କିନ୍ତୁ ମୁଁ ଜଣେ ହିରୋଇନ୍ ହେବି , ତାହା କେବେ ଭାବି ନ ଥିଲି ।
ଆପଣଙ୍କୁ ପ୍ରଥମ ଫିଲ୍ମ କିପରି ମିଳିଥିଲା ?
ସେଦିନ ମୁଁ କେବେ ବି ଭୁଲି ପାରିବି ନାହିଁ । ଅନୁଗୁଳକୁ ଗୋଟେ ଫଙ୍କ୍ସନ୍ରେ ଯାଇଥିବା ବେଳେ ଜଣେ ମତେ ଦେଖି ନମ୍ବର ମାଗିଥିଲେ। କିନ୍ତୁ ମୁଁ ଦେଇ ନ ଥିଲି । କିଛି ଦିନ ପରେ ସେ ମୋ ନମ୍ବର ପାଇ ‘ଭୈରବ’ର ପ୍ରଯୋଜକଙ୍କ ସହ କଥା କରାଇଥିଲେ । ଏହା ପରେ ସେ ମୋର ଏକ ଇଣ୍ଟରଭ୍ୟୁ ନେବା ପରେ ମୋତେ ଏହି ଫିଲ୍ମ ମିଳିଥିଲା ।
ଫିଲ୍ମ କରିବା ପାଇଁ ଆପଣଙ୍କୁ ଘରୁ ସମର୍ଥନ ମିଳିଥିଲା ?
ହଁ । ମୋ ପରିବାରରେ ସମସ୍ତେ ମୋତେ ସବୁ କାମ ପାଇଁ ସମର୍ଥନ କରନ୍ତି । ଏହି ଫିଲ୍ମର ଅଫର ପାଇବା ପରେ ମୁଁ ଯେତେବେଳେ ଘରେ ଜଣାଇଥିଲି ସମସ୍ତେ ଖୁସି ହୋଇ ଯାଇଥିଲେ । ଡ଼ର ଲାଗିଥିଲା କି ବାପା ଏହା ଜାଣିବା ପରେ କେମିତି ଗ୍ରହଣ କରିବେ । କିନ୍ତୁ ସେ ଏହା ଜାଣିବା ପରେ ବହୁତ ଖୁସି ହୋଇଥିଲେ ।
ପ୍ରଥମେ କ୍ୟାମେରାକୁ ସାମ୍ନା କରିବାକୁ ଆପଣଙ୍କୁ ଡ଼ର ଲାଗି ନଥିଲା ?
ନିଶ୍ଚୟ ଭାବେ ଲାଗିଥିଲା । ପ୍ରଥମ ଦିନ ସୁଟିଂରେ ମୋତେ ଗୋଟେ ସଟ୍ ଦେବା ପାଇଁ ବହୁତ ସମୟ ଲାଗିଥିଲା । କ୍ୟାମେରାର ଆଙ୍ଗେଲ ଜାଣିବା ପାଇଁ ମୋତେ ବହୁତ ଅସୁବିଧା ହୋଇଥିଲା । କିନ୍ତୁ ନିର୍ଦ୍ଦେଶକ, ପ୍ରଯୋଜକ ଏବଂ ଅଭିନେତା ସମସ୍ତେ ମୋତେ ସାହାଯ୍ୟ କରିଥିଲେ ।
ଫିଲ୍ମ ‘ବ୍ଲାକ୍ମେଲ’ରେ ଆପଣଙ୍କୁ କିଭଳି ଚରିତ୍ର ମିଳିଛି?
ମୋ ପୂର୍ବ ଫିଲ୍ମରେ ଥିବା ଚରିତ୍ରଠାରୁ ଏହା ସମ୍ପୁର୍ଣ୍ଣ ଭିନ୍ନ । ସେଥିରେ ମୁଁ ଜଣେ ଗାଉଁଲି ଝିଅର ଚରିତ୍ରରେ ଅଭିନୟ କରିଥିଲି । ଏହି ଫିଲ୍ମରେ ମୋତେ ଗୋଟେ ଷ୍ଟାଇଲିସ୍ ଏବଂ ମଡ଼ର୍ଣ୍ଣ ଲୁକ୍ ଦିଆଯାଇଛି ।
ଏହି ଫିଲ୍ମରେ ଏକ ଗୀତରେ ଆପଣଙ୍କୁ ସିଦ୍ଧାନ୍ତ ମହାପାତ୍ରଙ୍କ ସହ ଦେଖିବାକୁ ମିଳିବ । ତାଙ୍କ ସହ ସ୍କ୍ରିନ୍ ସେୟାର କରିବାର ଅନୁଭୁତି କିପରି ଥିଲା?
ବହୁତ ଡ଼ର ଲାଗିଥିଲା । ପ୍ରଥମେ ପ୍ରଥମେ ଏତେ ବଡ଼ ଅଭିନେତାଙ୍କ ସହ ନାଚିବା ପାଇଁ ମୋତେ ଡ଼ର ଲାଗିଥିଲା । କିନ୍ତୁ ନିର୍ଦ୍ଦେଶକ ଅମିତ୍ ସାର୍ ମୋତେ କହିଥିଲେ କି ଯଦି ସେ ଜଣେ ବଡ଼ କଳାକାର ହୋଇ ନୂଆ ଅଭିନେତ୍ରୀଙ୍କ ସହ କାମ କରିବାକୁ ଡ଼ରୁ ନାହାନ୍ତି ତା’ହେଲେ ତମେ କ’ଣ ପାଇଁ ଡ଼ରୁଛ । ଏହା ପରେ ମୋ ଡ଼ର କିଛି କମ୍ ହୋଇଥିଲା ଏବଂ ମୁଁ ଠିକ୍ ଭାବରେ ଡ଼୍ୟାନ୍ସ ଷ୍ଟେପ୍ କରି ପାରିଥିଲି ।
ଡ଼୍ରିମ୍ ରୋଲ୍ କ’ଣ ରହିଛି?
‘ଲାଲ୍ ପାନ୍ ବିବି’ରେ ମହେଶ୍ୱତା ରାୟଙ୍କର ଯେମିତି ଚୁଲ୍ବୁଲି ଏବଂ ନଟ୍ଖଟି ଚରିତ୍ର ଥିଲା ସେ ଭଳି ଚରିତ୍ରରେ ମୁଁ ଅଭିନୟ କରିବାକୁ ସବୁ ବେଳେ ସ୍ୱପ୍ନ ଦେଖି ଆସିଛି ।
ଫିଟ୍ ରହିବା ପାଇଁ କ’ଣ କରନ୍ତି?
ମୁଁ ବହୁତ ଖାଇବା ପାଇଁ ଭଲ ପାଏ । କିନ୍ତୁ ଏ ଲାଇନ୍କୁ ଆସିବା ପରେ ଫିଟ୍ ରହିବାକୁ ତ ପଡ଼ିବ । ପଢ଼ା ଏବଂ ଅଭିନୟ ପାଇଁ ମୋତେ ଅଧିକ ସମୟ ମିଳୁ ନ ଥିବାରୁ ଦିନକୁ ଗୋଟେ ଘଣ୍ଟା ପାଇଁ ମୁଁ ଜିମ୍ ଯାଉଛି ।
ଏହି ଲାଇନ୍ରେ ଆପଣ ନୂଆ । ନବାଗତ ନାୟିକା ହିସାବରେ ଆପଣ କେବେ କାଷ୍ଟିଙ୍ଗ କାଉଚ୍ର ଶିକାର ହୋଇଛନ୍ତି?
ନା । ଏ ପର୍ଯ୍ୟନ୍ତ ମୁଁ କାଷ୍ଟିଙ୍ଗ କାଉଚ୍କୁ ସାମ୍ନା କରିନାହିଁ । ମୋର ଦୁଇଟି ଫିଲ୍ମରେ ଥିବା ଅଭିନେତା ଏବଂ ନିର୍ଦ୍ଦେଶକମାନେ ବହୁତ ଭଲ । ମୁଁ ସେଭଳି ପରିସ୍ଥିତିର ସାମା୍ନ କରିନି । ଯଦି ଭବିଷ୍ୟତରେ କେବେ ସାମ୍ନା କରେ ତେବେ ମୁଁ ଏହାର ବିରୋଧ ନିହାତି ଭାବରେ କରିବି ।
ବଲିଉଡ଼ରେ କେଉଁ ଅଭିନେତା ଏବଂ ଅଭିନେତ୍ରୀ ଆପଣଙ୍କର ପସନ୍ଦ?
ହ୍ରିତିକ୍ ରୋଶନ୍ , ଦୀପିକା ପାଦୁକୋନ
ଓଲିଉଡ଼ରେ କେଉଁ ଅଭିନେତା ଏବଂ ଅଭିନେତ୍ରୀ ଆପଣଙ୍କର ସବୁଠୁ ପ୍ରିୟ?
ବାବୁସାନ, ରଚନା ବାନାର୍ଜୀ
ମନର ମଣିଷ ପାଇଁ କିଛି ଭାବିଛନ୍ତି ଆପଣ?
ସେମିତି କିଛି ଭାବିନିି ଏ ପର୍ଯ୍ୟନ୍ତ । କିନ୍ତୁ ମୋ ପ୍ରଫେସନକୁ ଯିଏ ବୁଝିପାରୁଥିବ ଏବଂ ମୋତେ ସମର୍ଥନ କରୁଥିବା ଭଳି ପୁଅ ମୁଁ ଚାହୁଁଛି ।