ଆଲିଆ, ମହେଶ ଭଟ୍ଟଙ୍କ ଘରେ ଜନ୍ମ ହେଲେ, ଏଥିରେ ତାଙ୍କର ଭୁଲ କ’ଣ? ପ୍ରଶ୍ନ କଲେ ଜୟଦୀପ

ମୁମ୍ବାଇ: ବଲିଉଡରେ ପ୍ରୀୟାପ୍ରୀତି ତୋଷଣକୁ ନେଇ ପ୍ରାୟତଃ ଆଲୋଚନା ହୁଏ। ଏବେ ଅଭିନେତା ଜୟଦୀପ ଅହଲାୱତ ମଧ୍ୟ ଏହି ପ୍ରସଙ୍ଗରେ ନିଜର ମତ ଦେଇଛନ୍ତି। ଏକ ସାକ୍ଷତକାରରେ ସେ କହିଛନ୍ତି ଯେ, ଆଲିଆ ଜଣେ ଚମତ୍କାର ଅଭିନେତ୍ରୀ। ମହେଶ ଭଟ୍ଟଙ୍କ ପରିବାରରେ ଜନ୍ମ ନେବା ତାଙ୍କର ଦୋଷ ନୁହେଁ।

ତାଙ୍କର କହିବା ମୁତାବକ, "ଏହା ଆଲିଆଙ୍କ ଦୋଷ ନୁହେଁ ଯେ ସେ ଜଣେ ବଡ଼ ଷ୍ଟାରଙ୍କ ପରିବାରରେ ଜନ୍ମ ହୋଇଥିଲେ। ଷ୍ଟାର କିଡମାନଙ୍କର ହୁଏତ ନିଜସ୍ୱ ସଂଘର୍ଷ ଥିବ। ଆଲିଆ ଜଣେ ଚମତ୍କାର ଅଭିନେତ୍ରୀ। କଳ୍ପନା କରନ୍ତୁ ଯେତେବେଳେ ତାଙ୍କୁ ପ୍ରତିଦିନ ସୋସିଆଲ ମିଡିଆରେ 'ନେପୋ କିଡ୍, ନେପୋ କିଡ୍' ଭଳି ମନ୍ତବ୍ୟ ପଢିବାକୁ ପଡ଼ୁଥିବ। ସେ କେତେ ଅଦ୍ଭୁତ ଅନୁଭବ କରୁଥିବେ? ଯଦି ସେ ମହେଶ ଭଟ୍ଟଙ୍କ ଘରେ ଜନ୍ମ ହୋଇଛନ୍ତି, ତେବେ ଏହା କ’ଣ ତାଙ୍କର ଦୋଷ?"

ସେ ଆହୁରି କହିଛନ୍ତି, "ଯେଉଁ ପିଲା ଜନ୍ମ ହେବା ପରେ ତିନି କିମ୍ବା ଚାରି ବର୍ଷ ବୟସରୁ ହିଁ ଚଳଚ୍ଚିତ୍ର ଦେଖେ ଏବଂ ସେଗୁଡ଼ିକ ବିଷୟରେ କଥା ହୁଏ, ତେବେ ସେ ସେହି ବୃତ୍ତି ବିଷୟରେ ଭଲ ଭାବରେ ବୁଝିପାରେ। ହେଲେ ଏଥିପାଇଁ ଆମେ କୌଣସି ଷ୍ଟାରକିଡକୁ ଦୋଷ ଦେଇପାରିବା ନାହିଁ।"