ଅନ୍ୟ କଳାକାରଙ୍କ ଭଳି ମୁଁ ମୃତ୍ୟୁ ବିକେ ନାହିଁ; କାହିଁକି ଏଭଳି କହିଲେ ଜନ ଆବ୍ରାହିମ

ମୁମ୍ବାଇ: ଜନ୍ ଆବ୍ରାହିମ୍ ବଲିଉଡର ଜଣେ ଲୋକପ୍ରିୟ କଳାକାର। ସବୁବେଳେ‌ ସେ ନିଜ ଫିଲ୍ମ ଓ ଫିଟନେସକୁ ନେଇ ଚର୍ଚ୍ଚାରେ ଥାନ୍ତି। ଅନେକ ବର୍ଷ ଧରି ବଲିଉଡରେ କାମ କରୁଥିବା ଜନ୍ ଏବେ ଏତେ ଅଧିକ ଫିଲ୍ମ କରୁନଥିଲେ ବି ସେ ସକ୍ରିୟ ଅଛନ୍ତି। ସବୁବେଳେ ଫିଲ୍ମରେ ଥିବା ନିଜ ଚରିତ୍ରକୁ ନେଇ ଚର୍ଚ୍ଚାରେ ରହୁଥିବା ଜନ୍ ଏବେ ବଲିଉଡର କଳାକାରଙ୍କୁ ଟାର୍ଗେଟ କରି ଚର୍ଚ୍ଚାକୁ ଆସିଛନ୍ତି।

କଳାକାରମାନେ କିଭଳି ପାନ ମସଲା ଭଳି ବ୍ରାଣ୍ଡର ବିଜ୍ଞାପନ କରି ଲୋକଙ୍କୁ ଭୁଲ ବାଟ ଦେଖାଉଛନ୍ତି, ତାହା ସେ କହିଛନ୍ତି। ଏକ ପଡକାଷ୍ଟରେ ଯୋଗ ଦେଇ ଜନ୍ କହିଛନ୍ତି ଯେ, ଯଦି ମୁଁ ମୋ ଜୀବନକୁ ସଚ୍ଚୋଟତାର ସହିତ ବଞ୍ଚେ, ଏବଂ ଯଦି ମୁଁ ଯାହା ପ୍ରଚାର କରେ ତାକୁ ବ୍ୟବହାର କରେ, ତେବେ ମୁଁ ଅନ୍ୟମାନଙ୍କ ପାଇଁ ଆଦର୍ଶ । କିନ୍ତୁ ଯଦି ମୁଁ ଜନସାଧାରଣଙ୍କ ନିକଟରେ ମୋର ଏକ ନକଲି ଭାବମୂର୍ତ୍ତି ଦେଖାଇ ବ୍ୟକ୍ତିଗତ ଜୀବନରେ ଭିନ୍ନ ବ୍ୟକ୍ତି ପରି ଆଚରଣ କରୁଛି, ତେବେ ଜନସାଧାରଣ ତାହା ଜାଣିଯିବେ। ”

ସେ ଆହୁରି କହିଛନ୍ତି ଯେ, “କିଛି ଲୋକମାନେ ଫିଟନେସ୍ ବିଷୟରେ କହୁଛନ୍ତି ଏବଂ ସେହି ଲୋକମାନେ ପାନ ମସାଲାକୁ ମଧ୍ୟ ସମର୍ଥନ କରୁଛନ୍ତି। ମୁଁ ମୋର ସମସ୍ତ ଅଭିନେତା ବନ୍ଧୁଙ୍କୁ ଭଲ ପାଏ ଏବଂ ସେମାନଙ୍କ ମଧ୍ୟରୁ କାହାକୁ ଅସମ୍ମାନ କରେ ନାହିଁ। ହେଲେ ମୁଁ ଏହା ସ୍ପଷ୍ଟ କରିବାକୁ ଚାହୁଁଛି ଯେ ମୁଁ ନିଜ ବିଷୟରେ କହୁଛି। ମୁଁ ମୃତ୍ୟୁ ବିକ୍ରି କରିପାରିବି ନାହିଁ। କାରଣ ଏହା ନୈତିକତାର ବିଷୟ। ଆପଣ ଜାଣନ୍ତି କି ପାନ ମସାଲା କମ୍ପ‌ାନି ବାର୍ଷିକ ୪୫,୦୦୦ କୋଟି ଟଙ୍କାର କାରବାର କରୁଛନ୍ତି। ଏହାର ଅର୍ଥ ହେଉଛି ସରକାର ମଧ୍ୟ ଏହାକୁ ସମର୍ଥନ କରୁଛନ୍ତି ଏବଂ ସେଥିପାଇଁ ଏହା ବେଆଇନ ନୁହେଁ। ତୁମେ ମୃତ୍ୟୁ ବିକ୍ରି କରୁଛ। ତୁମେ ଏହା ସହିତ କିପରି ବଞ୍ଚିବ?”