ଛାଡ଼ପତ୍ର ହେବା ପରେ ମୁଁ ଯେଉଁ ପୁରୁଷଙ୍କ ସହ କଥା ହେଉଥିଲି, ମୁଁ ତାକୁ ଡେଟ୍ କରୁଛି ବୋଲି ଲୋକେ ଭାବୁଥିଲେ : କଲ୍କି କୋଚେଲୀନ୍
ମୁମ୍ବାଇ : ଫିଲ୍ମ ‘ଡେବ୍ ଡି’ରୁ ବଲିଉଡ୍ରେ ଡେବ୍ୟୁ କରିଥିବା କଲ୍କି ଆଜି ବଲିଉଡ୍ରେ ନିଜର ସ୍ୱତନ୍ତ୍ର ସ୍ଥାନ ତିଆରି କରି ପାରିଛନ୍ତି । ୨୦୧୧ରେ ତାଙ୍କର ଏହି ଫିଲ୍ମ ରିଲିଜ୍ ହୋଇଥିବା ବେଳେ ଫିଲ୍ମରେ ଥିବା ତାଙ୍କ ଚରିତ୍ରକୁ ଖୁବ୍ ପ୍ରଂଶସା କରାଯାଇଥିଲା । ଏହି ଫିଲ୍ମ ତାଙ୍କୁ ପରିଚୟ ଦେଇଥିବା ବେଳେ ଜୀବନସାଥୀ ମଧ୍ୟ ଦେଇଥିଲା । ଫିଲ୍ମର ସେଟ୍ରେ ସେ ନିର୍ଦ୍ଦେଶକ ଅନୁରାଗ କଶ୍ୟପଙ୍କୁ ଭେଟିଥିବା ବେଳେ ତାଙ୍କ ପ୍ରେମରେ ପଡ଼ି ଯାଇଥିଲେ । ଏମିତି କି ୨୦୧୧ ମସିହାରେ ହିଁ ଦୁହେଁ ବିବାହ କରି ନେଇଥିଲେ । କିନ୍ତୁ ଦୁହିଁଙ୍କ ବିବାହ ଖୁବ୍ କମ ଦିନ ପର୍ଯ୍ୟନ୍ତ ତିଷ୍ଠି ରହିଥିଲା । କଲ୍କି ଚେଷ୍ଟା କରି ମଧ୍ୟ ନିଜ ବୈବାହିକ ଜୀବନକୁ ବଞ୍ଚାଇ ପାରି ନ ଥିଲେ । ଅନୁରାଗଙ୍କଠାରୁ ଅଲଗା ହେବା ପରେ ତାଙ୍କୁ ଅନେକ କଥା ଶୁଣିବାକୁ ପଡ଼ିଥିଲା, ଯାହା ବିଷୟରେ ସେ ଏକ ସାକ୍ଷାତକାରରେ ଯୋଗ ଦେଇ ଜଣାଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ତାଙ୍କ କହିବା ଅନୁଯାୟୀ, ଯେତେବେଳେ ମୁଁ ମୋ ସ୍ୱାମୀଙ୍କଠାରୁ ଅଲଗା ହୋଇଥିଲି, ସେତେବେଳେ ମୁଁ ଯେଉଁ ପୁରୁଷ ସହ ବାହାରକୁ ଯାଏ, ଲୋକେ ମୁଁ ତାକୁ ଡେଟ୍ କରୁଛି ବୋଲି ଭାବି ନିଅନ୍ତି । ମୋ ବ୍ୟକ୍ତିଗତ ଜୀବନକୁ ନେଇ ଅନେକ ମିଥ୍ୟା ଖବରର ପ୍ରଚାର ହେବା ଆରମ୍ଭ ହୋଇ ଯାଇଥାଏ । ଏମିତି କି ମୋ ପଡ଼ୋଶୀମାନେ ମଧ୍ୟ ମୁଁ ଆଗକୁ ମୋ ଜୀବନକୁ ନେଇ କ’ଣ କରିବି ସେ ନେଇ ମୋ ମାତା-ପିତାଙ୍କୁ ପଚାରନ୍ତି । ପ୍ରଥମେ ମୁଁ ଏ ସବୁ କଥାକୁ ନେଇ ଚିନ୍ତା କରୁଥିବା ବେଳେ ଧୀରେ ଧୀରେ ମୁଁ ଏ ସବୁ ବିଷୟରେ ଭାବିବା ବନ୍ଦ କରିବା ସହ ଆଗକୁ ବଢ଼ିବା କଥା ଚିନ୍ତା କରିଥିଲି । ଯାହା ପାଇଁ ମୁଁ ଆଜି ଏଇଠି ପହଞ୍ଚିଛି ବୋଲି କଲ୍କି କହିଛନ୍ତି ।