ମୁମ୍ବାଇ: ୨୦ମାସ ପରେ ଜାନୁଆରି ୨୪ରେ ଟ୍ବିଟରକୁ ଫେରିଥିଲେ ବଲିଉଡ ଅଭିନେତ୍ରୀ କଙ୍ଗନା ରାଣାୱତ୍। ମେ’ ୨୦୨୧ରେ ତାଙ୍କର ଟ୍ବିଟର ଆକାଉଣ୍ଟକୁ ଅଚଳ କରିଦିଆଯାଇଥିବା ବେଳେ ଗତ ମାସରେ ଏହାକୁ ପୁଣି ଥରେ ସକ୍ରିୟ କରାଯାଇଥିଲା। ଆକାଉଣ୍ଟ ସକ୍ରିୟ ହେବା ପରେ ତୁରନ୍ତ କଙ୍ଗନା ଏକ ଟ୍ବିଟ କରିଥିଲେ। ନିଜର ଆଗାମୀ ଫିଲ୍ମ ‘ଏମର‌ଜେନ୍ସି’ର ସୁଟିଂ ଶେଷ ହେବା ଖବର ଦେଇ ଏହାର ରିଲିଜ୍ ତାରିଖ ଘୋଷଣା କରିଥିଲେ କଙ୍ଗନା। ତେବେ ବିବାଦୀୟ ବୟାନ ପାଇଁ ତାଙ୍କ ଟ୍ବିଟର ଆକାଉଣ୍ଟ ଅଚଳ କରାଯାଇଥିଲେ ବି କଙ୍ଗନା ନିଜ ମନ କଥା ଲେଖିବା ବନ୍ଦ କରିନଥିଲେ। ଇନଷ୍ଟାରେ ସେ ନିଜ ମନ କଥା ସେୟାର କରୁଥିଲେ।

Advertisment

ଏବେ ଟ୍ବିଟର ଆକାଉଣ୍ଟ ସକ୍ରିୟ ହେବା ପରେ ସେ ପୁଣି ଥରେ ନିଜର ପୁରୁଣା ଜୋନକୁ ଫେରିଛନ୍ତି। ପ୍ରତି ପ୍ରସଙ୍ଗରେ ନିଜର ମତ ରଖିବା ସହ ସୋମବାର ସେ ପୁଣି ଥରେ ବଲିଉଡ ମାଫିଆଙ୍କୁ ଟାର୍ଗେଟ କରିଥିବା ଦେଖାଯାଇଛି। ସୂଚନା ମୁତାବକ, କଙ୍ଗନାଙ୍କ ମା’ ଘର ଫାର୍ମରେ କାମ କରୁଥିବାର ଫଟୋ ଦେଖି ଜଣେ ପ୍ରଶଂସକ ତାଙ୍କୁ ପ୍ରଶଂସା କରିଥିଲେ। ଏହାର ଜବାବରେ କଙ୍ଗନା ଲେଖିଥିଲେ, “ଦୟାକରି ମନେରଖନ୍ତୁ ଯେ ମୋ ମା’ ଧନୀ ନୁହଁନ୍ତି। ମୁଁ ରାଜନେତା, ଅମଲାତନ୍ତ୍ର ଏବଂ ବ୍ୟବସାୟୀଙ୍କ ପରିବାରରୁ ଆସିଛି। ମୋ ମା’ ୨୫ବର୍ଷରୁ ଅଧିକ ସମୟ ଧରି ଶିକ୍ଷକତା କରିଥିଲେ। ତେଣୁ ଫିଲ୍ମ ଇଣ୍ଡଷ୍ଟ୍ରିକୁ ବୁଝିବାକୁ ପଡ଼ିବ ଯେ, ମୋର ଏଭଳି  ମାନସିକତା କେଉଁଠାରୁ ଆସିଛି ଏବଂ ମୁଁ ସେମାନଙ୍କ ଭଳି କାହା ବିବାହରେ ଯାଇ ନାଚିପାରିବି ନାହିଁ। ”

ଅନ୍ୟ ଏକ ଟ୍ବିଟରେ ସେ ଲେଖିଥିଲେ ଯେ ଭିକାରୀ ଫିଲ୍ମ ମାଫିଆ ମୋ ସଚ୍ଚୋଟ ପଣିଆକୁ ମୋ ଅହଙ୍କାର ବୋଲି କହିଥିଲେ। କାରଣ ମୁଁ ଅନ୍ୟମାନଙ୍କ ଭଳି ଆଇଟମ ଗୀତରେ ନାଚିଲି ନାହିଁ, କାହା ବିବାହରେ ନାଚିଲି ନାହିଁ, ହିରୋମାନଙ୍କ ରୁମକୁ ଯିବାକୁ ମନା କଲି। ଏସବୁ ନକରିବାରୁ ସେମାନେ ମୋତେ ପାଗଳ ବୋଲି ଘୋଷଣା କରିଦେଲେ।