ସଂସଦ ପରିସରରେ ଫିଲ୍ମ 'ଏମର୍ଜେନ୍ସି'ର ସୁଟିଂ କରିବାକୁ ଚାହୁଁଛନ୍ତି କଙ୍ଗନା, ମାଗିଲେ ଅନୁମତି

ନୂଆଦିଲ୍ଲୀ: ବଲିଉଡ ଅଭିନେତ୍ରୀ କଙ୍ଗନା ରାନାୱତ ଆଜିକାଲି ତାଙ୍କର ଆଗାମୀ ଚଳଚ୍ଚିତ୍ର 'ଏମର୍ଜେନ୍ସି'କୁ ନେଇ ଚର୍ଚ୍ଚାରେ ଅଛନ୍ତି। ସୂଚନାନୁସାରେ, ନିକଟରେ ଅଭିନେତ୍ରୀ ସଂସଦ ପରିସରରେ ତାଙ୍କ ଚଳଚ୍ଚିତ୍ରର ସୁଟିଂ ପାଇଁ ଲୋକସଭା ସଚିବାଳୟରୁ ଅନୁମତି ମାଗିଛନ୍ତି। ଏହି ପରିପ୍ରେକ୍ଷୀରେ ଏକ ସୂତ୍ରରୁ ପ୍ରକାଶ ଯେ ତାଙ୍କ ଚିଠି ଉପରେ ବିଚାର କରାଯାଉଛି, କିନ୍ତୁ ତାଙ୍କୁ ଅନୁମତି ମିଳିବାର ସମ୍ଭାବନା କମ୍ ଅଛି। ରିପୋର୍ଟ ମୁତାବକ ଲୋକସଭା ସଚିବଙ୍କୁ ଲେଖିଥିବା ପତ୍ରରେ ଅଭିନେତ୍ରୀ ଅନୁରୋଧ କରିଛନ୍ତି ଯେ ତାଙ୍କୁ 'ଏମର୍ଜେନ୍ସି' ଆଧାରିତ ଏକ ଫିଲ୍ମ ସୁଟିଂ କରିବାକୁ ଅନୁମତି ଦିଅନ୍ତୁ। ଆଉ କୁହାଯାଉଛି ଯେ ଯେ ସାଧାରଣତଃ ସଂସଦ କମ୍ପ୍ଲେକ୍ସ ଭିତରେ ବେସରକାରୀ ସଂସ୍ଥାଗୁଡ଼ିକୁ ସୁଟିଂ କିମ୍ବା ଭିଡିଓଗ୍ରାଫି କରିବାକୁ ଅନୁମତି ଦିଆଯାଇନଥାଏ। ଯଦି ଏହା କିଛି ସରକାରୀ କାମ ପାଇଁ କରାଯାଉଛି ତେବେ ଏହା ଏକ ଭିନ୍ନ କଥା |

ମୁଖ୍ୟତଃ ଦୂରଦର୍ଶନ ଏବଂ ସଂସଦ ଟିଭିକୁ ସଂସଦ ଭିତରେ କାର୍ଯ୍ୟକ୍ରମ ସୁଟିଂ ପାଇଁ ଅନୁମତି ଦିଆଯାଇଥାଏ । ବ୍ୟକ୍ତିଗତ କାର୍ଯ୍ୟ ପାଇଁ ସଂସଦ ଭିତରେ କାହାକୁ ସୁଟିଂ କରିବାକୁ ଅନୁମତି ଦିଆଯିବାର କୌଣସି ଉଦାହରଣ ନାହିଁ। ସୂଚନା ଥାଉ କି ଯେ ଚଳିତ ବର୍ଷ ଜୁନ୍ ମାସରେ 'ଏମର୍ଜେନ୍ସି'ର ସୁଟିଂ ଆରମ୍ଭ ହୋଇଥିଲା। କଙ୍ଗନା ଏହି ଚଳଚ୍ଚିତ୍ରର ନିର୍ଦ୍ଦେଶନା ସହ ପ୍ରଯୋଜନା ଭାର ମଧ୍ୟ ସମ୍ଭାଳୁଛନ୍ତି | ସେ ଏହି ଚଳଚ୍ଚିତ୍ରରେ ୧୯୭୫ରେ ଦେଶରେ ଜରୁରୀକାଳୀନ ପରିସ୍ଥିତି ଲଗାଇଥିବା ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ଭୂମିକାରେ ନଜର ଆସିବେ। ଏହି ଚଳଚ୍ଚିତ୍ରକୁ ନେଇ କଙ୍ଗନା ଏକ ବିବୃତ୍ତିରେ କହିଛନ୍ତି ଯେ 'ଜରୁରୀକାଳୀନ ପରିସ୍ଥିତି' ଭାରତୀୟ ରାଜନୈତିକ ଇତିହାସର ଏକ ଗୁରୁତ୍ୱପୂର୍ଣ୍ଣ ସମୟକୁ ଦର୍ଶାଇଥାଏ | ତାଙ୍କର ଆଗାମୀ ପ୍ରୋଜେକ୍ଟ ବିଷୟରେ କହିବାକୁ ଗଲେ ଅଭିନେତ୍ରୀଙ୍କୁ 'ଏମର୍ଜେନ୍ସି' ପରେ 'ତେଜସ୍'ରେ ମଧ୍ୟ ଦେଖିବାକୁ ମିଳିବ।