ରିଭ୍ୟୁ ଭଲ, ହେଲେ ଯାଉନାହାନ୍ତି ଦର୍ଶକ; ଜାଣନ୍ତୁ ‘ଲାଲ୍‌ ସିଂହ ଚଢ଼ା’ର ପ୍ରଥମ ଦିନର ରୋଜଗାର କେତେ?

ମୁମ୍ବାଇ: ପ୍ରେକ୍ଷାଳୟ‌ରେ ‌ମୁକ୍ତିଲାଭ କରି ସାରିଛି ଆମୀର ଖାନ୍‌ଙ୍କ ଚଳଚ୍ଚିତ୍ର ‘ଲାଲ୍‌ ସିଂହ ଚଢ଼ା’। ଆମୀର ଖାନ୍‌ଙ୍କ ଏହି ଫିଲ୍ମକୁ ଲୋକେ ବୟକଟ୍‌ କରିଥିବା ବେଳେ ଏହା ପ୍ରଥମ ଦିନରେ କେତେ ରୋଜଗାର କରିଛି ଜାଣନ୍ତି କି? ସୂତ୍ରରୁ ଜାଣିବାକୁ ମିଳିଛି ଯେ ଆମୀରଙ୍କ ଏହି ସିନେମାର ଓପେନିଂ ଖୁବ୍‌ ଖରାପ ହୋଇଛି। ଗତକାଲି ଚଳଚ୍ଚିତ୍ରଟି ରିଲିଜ୍‌ ହୋଇଥିବା ବେଳେ ଏହା ପ୍ରଥମ ଦିନରେ ୧୦.୭୫ କୋଟି ରୋଜଗାର କରିିଛି। ଚଳଚ୍ଚିତ୍ରଟିକୁ ଅଧିକାଂଶ ଭଲ ରିଭ୍ୟୁ ମିଳିଥିଲେ ବି ଦର୍ଶକ ବେଶୀ ଦେଖିବାକୁ ହଲ୍‌କୁ ଯାଇନାହାନ୍ତି।

ଆମୀରଙ୍କ ପୂର୍ବ ଚଳଚ୍ଚିତ୍ର ‘ଠଗ୍‌ସ ଅଫ୍‌ ହିନ୍ଦୁସ୍ତାନ’ ତୁଳନା‌ରେ ଦେଖିଲେ ସିନେମାଟି ଯଥେଷ୍ଟ କମ୍‌ ରୋଜଗାର କରିଛି। ଆମୀରଙ୍କ ପୂର୍ବ ଚଳଚ୍ଚିତ୍ରଟି ରିଲିଜ୍‌ର ପ୍ରଥମ ଦିନରେ ୫୨ କୋଟି ଟଙ୍କା ‌ରୋଜଗାର କରିଥିଲା। ମାତ୍ର ଚଳଚ୍ଚିତ୍ର ତାଙ୍କ କ୍ୟାରିୟର୍‌ର ଏକ ସବୁଠାରୁ ବଡ଼ ଫ୍ଲପ୍‌ ଫିଲ୍ମ ବୋଲି କହିଲେ ଭୁଲ୍‌ ହେବ ନାହିଁ।

ଏହି ବର୍ଷରେ ଯେତେ ସବୁ ସିନେମା ରିଲିଜ୍‌ ହୋଇଛି, ସେଥିମଧ୍ୟରୁ ପ୍ରଥମ ଦିନ ରୋଜଗାର ମଧ୍ୟରେ ‘ଲାଲ୍‌ ସିଂହ ଚଢ଼ା’ ତୃତୀୟ ସ୍ଥାନରେ ରହିଛି। ୧୪.୧୦ କୋଟି ଟଙ୍କା ରୋଜଗାର କରି ପ୍ରଥମରେ ରହିଛି କାର୍ତ୍ତିକ ଆର୍ଯ୍ୟାନଙ୍କ ସିନେମା ‘ଭୁଲ୍‌ ଭୁଲେୟାଁ୨’। ସେହିପରି ଦ୍ବିତୀୟରେ ରହିଛି ଅକ୍ଷୟ କୁମାରଙ୍କ ଅଭିନୀତ ‘ବଚ୍ଚନ ପାଣ୍ଡେ’। ଏହି ଚଳଚ୍ଚିତ୍ରଟି ପ୍ରଥମେ ଦିନରେ ୧୩.୨୦ କୋଟି ରୋଜଗାର କରିଥିଲା। ୪ର୍ଥ ସ୍ଥାନରେ ରହିଛି ଅକ୍ଷୟଙ୍କ ଅଭିନୀତ ଚଳଚ୍ଚିତ୍ର ‘ସମ୍ରାଟ ପୃଥ୍ବିରାଜ’।