ଏ ବର୍ଷ ଅର୍ଚ୍ଚିତା ବନିଥିଲେ, ଆଗରୁ ଅନୁ ଚୌଧୁରୀ ବନିଥାନ୍ତେ , ଦ୍ଵିତୀୟ ଥର ଲାଗି ବନିଲେ ଓଲିଉଡର ମହାନାୟିକା ମହାଶ୍ୱେତା

ଭୁବନେଶ୍ବର:  ଓଲିଉଡର ମହାନାୟିକା ମହାଶ୍ୱେତା କିଛି ଦିନ ବ୍ୟବଧାନରେ ପୁଣି ଥରେ ଅଭିନୟକୁ ଫେରିଛନ୍ତି। ଅବଶ୍ୟ ତାଙ୍କୁ ଗତବର୍ଷ ମୁକ୍ତିଲାଭ କରିଥିବା ଓଡ଼ିଆ ସିନେମା ‘ସାଥୀ ତୁ ଫେରିଆ’ରେ ଦର୍ଶକ ଶେଷ ଥର ଲାଗି ବଡ଼ ପରଦାରେ ଦେଖିବାକୁ ପାଇଥିଲେ।

ହେଲେ ଏବେ ସେ କୌଣସି ବଡ଼ ପରଦାର ସିନେମା ଜରିଆରେ ପ୍ରତ୍ୟାବର୍ତ୍ତନ କରୁନାହାନ୍ତି। ମହାଶ୍ୱେତା ଏବେ ଏକ ଟେଲି ପ୍ରଡକ୍ସନ୍‌ସର ଫିଲ୍ମରେ କାମ କରୁଥିବା ଜଣାଯାଇଛି। ହଁ ମହାଶ୍ୱେତାଙ୍କର ଏହି ସିନେମାରେ ପୁଣି ଏଭଳି ଏକ ଶୀର୍ଷକ  ଭୂମିକାରେ ଆସୁଛନ୍ତି, ଯେଉଁ ଭୂମିକା ଲାଗି ୧୯୮୮ ମସିହାରେ ଖୁବ୍‌ ଚର୍ଚ୍ଚିତା ହୋଇଥିଲେ ସେ।

୧୯୮୮ରେ ମହାଶ୍ୱେତାଙ୍କ ଅଭିନୀତ ଏକ ଓଡ଼ିଆ ସିନେମା ସୁପରହିଟ୍‌ ହୋଇଥିଲା। ଏହି ସିନେମାରେ ଟାଇଟଲ୍‌ ହେଲା ‘ଲାଲପାନ ବିବି’। ଏହି ଫିଲ୍ମର କାହାଣୀ,ଚିତ୍ରନାଟ୍ୟ ,ସଂଳାପ ଓ ନିର୍ଦ୍ଦେଶନା ଦାୟିତ୍ୱରେ ଥିଲେ ପ୍ରଶାନ୍ତ ନନ୍ଦ। ‘ଲାଲପାନ ବିବି’ରେ ମହାଶ୍ୱେତାଙ୍କୁ ଦର୍ଶକ ଡବଲ ରୋଲରେ  ଦେଖିବାକୁ ପାଇଥିଲେ। ଏଥିରେ ମହାଶ୍ୱେତାଙ୍କ ଦମଦାର୍‌ ଅଭିନୟ ଦର୍ଶକଙ୍କୁ ମନ୍ତ୍ରମୁଗ୍ଧ କରିଥିଲା।

ଏହି ସମାନ ଟାଇଟଲରେ କିଛି ବର୍ଷତଳେ ପୁଣି ଏକ ସିନେମା କାମ ଆରମ୍ଭ ହୋଇଥିଲା। ଏଥିରେ ଲାଲପାନ ବିବି ବନିଥାନ୍ତେ ଓଡ଼ିଆ ସିନେଜଗତର ଆଗଧାଡ଼ିର ନାୟିକା ଅନୁ ଚୌଧୁରୀ। ଏଥିରେ ଅନୁ ଚୌଧୁରୀଙ୍କର ଥିବା ଗେଟଅପକୁ ନେଇ ବି ଖୁବ୍ ଚର୍ଚ୍ଚା ହୋଇଥିଲା। ବିଶେଷ କରି ସୋସିଆଲ ମିଡିଆରେ ଏହି ଫଟୋଟି ଭାଇରାଲ ହୋଇଥିଲା।ଏଥିରେ ଅନୁ ଚୌଧୁରୀଙ୍କ ଦେହରେ ଲୁଙ୍ଗି ଏବଂ ସାର୍ଟ ପିନ୍ଧିଥିବାର ଦେଖିବାକୁ ମିଳିଥିଲା।  ଏହାର ସୁଟିଂ କିନ୍ତୁ ଆରମ୍ଭ ହୋଇ ପାରି ନଥିଲା। ଫଳତଃ ବଡ଼ ପରଦାରେ ଅନୁ ଚୌଧୁରୀ ଲାଲପାନ ବିବି  ବନିପାରି ନଥିଲେ।

ତାପରେ ଓଲିଉଡର ଗ୍ଲାମରସ୍‌ ହିରୋଇନ୍‌ ଅର୍ଚ୍ଚିତା କିନ୍ତୁ ପରଦାରେ ଲାଲପାନ ବିବି ବନିଥିଲେ। ହଁ, ସେ କେ.ମୁରଲୀ କ୍ରୀଷ୍ଣାଙ୍କ ନିର୍ଦ୍ଦେଶିତ ଓଡ଼ିଆ ସିନେମା ‘ଚମ୍ପିଆନ୍‌’ରେ ଏହି ନାଆଁରେ ନଜର ଆସିଥିଲେ। ‘ଚମ୍ପିଆନ୍‌’ର କାହାଣୀ ଅନୁଯାୟୀ ଅର୍ଚ୍ଚିତାଙ୍କୁ ଯାତ୍ରା ଜଗତରେ କାମ କରିବାକୁ ପଡ଼େ। ଯଲିଉଡ୍‌ର ସେ ପରିଚିତ ହୁଅନ୍ତି ଲାଲପାନ ବିବି ହିସାବରେ।