ଚତୁର୍ଥ ଥର ଏହି ଅଭିନେତ୍ରୀଙ୍କୁ ବିବାହ କରିବାକୁ ଯାଉଛନ୍ତି ମହେଶ ବାବୁଙ୍କ ଭାଇ!

ହାଇଦ୍ରାବାଦ: ସାଉଥ ଅଭିନେତା ନରେଶ ବାବୁ ଏବଂ କନ୍ନଡ ଅଭିନେତ୍ରୀ ପବିତ୍ରା ଲୋକେଶ ସେମାନଙ୍କ କାମ ବ୍ୟତୀତ ଅନ୍ୟ କେତେକ କାରଣରୁ ଚର୍ଚ୍ଚାରେ ରହିଥାନ୍ତି। ଉଭୟ କିଛି ଦିନ ଧରି ପରସ୍ପରକୁ ଡେଟ୍ କରୁଥିଲେ ବୋଲି ଖବର କ୍ରମାଗତ ଭାବରେ ଗଣମାଧ୍ୟମରେ ପ୍ରକାଶ ପାଇଥିବାବେଳେ ବର୍ତ୍ତମାନ ନରେଶ ବାବୁ ତାଙ୍କ ସୋସିଆଲ ମିଡିଆ ଆକାଉଣ୍ଟରୁ ଏକ ଭିଡିଓ ସେୟାର କରିଛନ୍ତି ଯାହା ପ୍ରଶଂସକଙ୍କୁ ଚକିତ କରିଛି। ଏହି ଭିଡିଓରେ ସେ ପବିତ୍ରାଙ୍କୁ ବିବାହ କରିବେ ବୋଲି ଘୋଷଣା କରୁଥିବା ନଜର ଆସିଛନ୍ତି। ଭିଡିଓରେ ଦେଖିବାକୁ ମିଳିଛି ଯେ ନରେଶ ଏବଂ ପବିତ୍ରା କେକ୍ କାଟି ପରସ୍ପରକୁ ଖାଇବାକୁ ଦେଉଛନ୍ତି ଏବଂ ନୂଆବର୍ଷକୁ ସ୍ୱାଗତ କରୁଛନ୍ତି।

ଭିଡିଓ ଶେଷରେ, 'ଶୀଘ୍ର ବିବାହ ହେବାକୁ ଯାଉଛି ସହ #ପବିତ୍ରାନରେଶ ଲେଖା ହୋଇଥିବାର ଦେଖିବାକୁ ମିଳିଛି | ଭିଡିଓ ସେୟାର କରି ସେ ଲେଖିଛନ୍ତି ଯେ, 'ନୂତନ ବର୍ଷ, ନୂତନ ଆରମ୍ଭ ଆପଣଙ୍କର ଆଶୀର୍ବାଦ ଆବଶ୍ୟକ | ଆମ ତରଫରୁ ଆପଣ ସମସ୍ତଙ୍କୁ # ହାପି ନ୍ୟୁଇଅର୍' | ନରେଶଙ୍କ ଏହି ଭିଡିଓ ପ୍ରଶଂସକଙ୍କୁ ଦ୍ୱନ୍ଦ୍ୱରେ ପକାଇଛି। ୟୁଜର୍ସ ପ୍ରଶ୍ନ କରୁଛନ୍ତି ଯେ ତୁମେ ଦୁହେଁ ପ୍ରକୃତରେ ବିବାହ କରିବାକୁ ଯାଉଛ ନା ଏହା ଏକ ଆଗାମୀ ସୋ କିମ୍ବା ଫିଲ୍ମର ପ୍ରୋମୋ |

ଉଲ୍ଲେଖ ଥାଉ କି ବ୍ୟକ୍ତିଗତ କାରଣରୁ ନରେଶ ବାବୁ ତାଙ୍କର ତିନିଜଣ ପୂର୍ବତନ ପତ୍ନୀଙ୍କ ସହ ସମ୍ପର୍କ ଭାଙ୍ଗିଛନ୍ତି ଏବଂ ସେ ବର୍ତ୍ତମାନ ଏକାକୀ ରହୁଛନ୍ତି। ପବିତ୍ରା ଲୋକେଶଙ୍କ ବିଷୟରେ କହିବାକୁ ଗଲେ ସେ ତାଙ୍କର ପ୍ରଥମ ସ୍ୱାମୀ ସୁଚେନ୍ଦ୍ର ପ୍ରସାଦଙ୍କଠାରୁ ଅଲଗା ରହୁଛନ୍ତି | ବର୍ତ୍ତମାନ ନରେଶଙ୍କ ସହ ବିବାହ କରିବା ପାଇଁ ସେ ପ୍ରଥମ ସ୍ୱାମୀଙ୍କୁ ଛାଡପତ୍ର ଦେଇଛନ୍ତି କି ନାହିଁ ତାହା ଜଣାପଡିନାହିଁ।