ଶକ୍ତିମାନ ହେବା ପାଇଁ ଟାଇଗରଙ୍କ ଯୋଗ୍ୟତା ନାହିଁ: ମୁକେଶ ଖାନ୍ନା

ମୁମ୍ବାଇ: ଟିଭି ଚ୍ୟାନେଲ ଦୂରଦର୍ଶନର ସବୁଠାରୁ ଲୋକପ୍ରିୟ ଟିଭି ସୋ’ ମଧ୍ୟରେ ରହିଛି ଶକ୍ତିମାନ | ମୁକେଶ ଖାନ୍ନାଙ୍କ ଅଭିନୀତ ଏହି ସୁପରହିଟ୍ ଧାରାବାହିକ ୯୦ଦଶକରେ ଦର୍ଶକଙ୍କ ବହୁତ ମନୋରଞ୍ଜନ କରିଥିଲା ​​| କିଛି ଦିନ ତଳେ ମୁକେଶ ଶକ୍ତିମାନକୁ ନେଇ ପୁଣି ଫେରିବେ ବୋଲି ଘୋଷଣା କରିଥିଲେ। ଏବେ ସେ ନିଜ କଥା ରଖି ଭୀଷ୍ମ ଇଣ୍ଟରନ୍ୟାସନାଲ ୟୁଟ୍ୟୁବ ଚ୍ୟାନେଲରେ  ଏକ ସିରିଜ୍ ଆରମ୍ଭ କରିଛନ୍ତି। ଏହି ଶକ୍ତିମାନରେ ମୁକେଶ ଖାନ୍ନା ଆକ୍ସନ ନକରି ପିଲାମାନଙ୍କ ସହିତ ଦେଶର ସାହସୀ ବିପ୍ଳବୀମାନଙ୍କ ବିଷୟରେ କଥା ହେଉଥିବାର ଦେଖିବାକୁ ମିଳିବ । ଏହା ସହ ସେ ୨୦୨୭ରେ ଶକ୍ତିମାନ ଚରିତ୍ରକୁ ନେଇ ଏକ ଫିଲ୍ମ ନିର୍ମାଣ କରିବେ ବୋଲି କହିଛନ୍ତି। ଏଥିପାଇଁ ସେ ହିରୋ ଖୋଜୁଥିବା ବେଳେ ଟାଇଗର ଶ୍ରଫଙ୍କୁ ନେଇ ସେ ବିବାଦୀୟ ବୟାନ ଦେଇଛନ୍ତି।

ତାଙ୍କ କହିବା ମୁତାବକ, "ମୋତେ କ୍ଷମା କରିବେ, କିନ୍ତୁ ଯଦି ଟାଇଗର ଶ୍ରଫ ଜଣେ ପିଲାକୁ ଶକ୍ତିମାନ ହୋଇ ଶୌଚାଳୟକୁ ସଫା ରଖିବାକୁ କହିବେ ତେବେ ପିଲାଟି ବୁଲି ପଡ଼ି ତାଙ୍କୁ କହିବ, ତୁମେ ବସି ପଡ଼। ପିଲାଙ୍କ ମଧ୍ୟରେ ବଡ଼ ପିଲା ହେଉଛନ୍ତି ଟାଇଗର।ତାହା ହେଉଛି ତାଙ୍କର ପ୍ରତିଛବି | ତାଙ୍କର ଏପରି ଯୋଗ୍ୟତା ନାହିଁ ଯେ ସେ ଶକ୍ତିମାନ ହୋଇପାରିବେ। ମୁଁ ଚାହୁନାହିଁ ଯେ, ଯୋଗ୍ୟତା ନଥିବା ବ୍ୟକ୍ତି ଶକ୍ତିମାନ ଚରିତ୍ର କରନ୍ତୁ।"