ପୁଅ-ବୋହୂଙ୍କୁ ବିବାହରେ ଏତେ କୋଟିର ଉପହାର ଦେବେ ନାଗାର୍ଜୁନ

ନୂଆଦିଲ୍ଲୀ: ସାଉଥ ଷ୍ଟାର ନାଗା ଚୈତନ୍ୟ ଏବଂ ଶୋଭିତା ଧୁଲିପାଲା ଏବେ ଚର୍ଚ୍ଚାରେ ଅଛନ୍ତି। ଏହି ଦମ୍ପତି ସେମାନଙ୍କ ସମ୍ପର୍କକୁ ବହୁତ ଲୁଚାଇ ରଖିଥିବା ବେଳେ କିଛି ଦିନ ତଳେ ନିର୍ବନ୍ଧ କରି ନିଜ ସମ୍ପର୍କ ବିଷୟରେ ସମସ୍ତଙ୍କୁ ଜଣାଇଥିଲେ। ଅଗଷ୍ଟ ମାସ ଆରମ୍ଭରେ, ସେମାନେ ନିର୍ବନ୍ଧ କରି ପରସ୍ପରକୁ ଭଲ ପାଉଥିବା ବିଷୟରେ ସାର୍ବଜନୀନ କରିଥିଲେ। ନିର୍ବନ୍ଧ ପରେ ଦମ୍ପତି ଡିସେମ୍ବର ୪ରେ ବିବାହ କରିବାକୁ ଯାଉଥିବା ଜଣାପଡ଼ିଛି।

ବିବାହ ପୂର୍ବରୁ ଏବେ ବିବାହର ରୀତିନୀତି ଆରମ୍ଭ ହୋଇଛି। ଶୋଭିତାଙ୍କ ଦେହରେ ହଳଦୀ ଲାଗିସାରିଥିବା ବେଳେ ଖୁବଶୀଘ୍ର ମେହେନ୍ଦୀ ଓ ସଙ୍ଗୀତ ହେବ ବୋଲି ଜଣାପଡ଼ିଛି। ଏମଧ୍ୟରେ ପୁଅ-ବୋହୂଙ୍କୁ ବିବାହରେ ନାଗାର୍ଜୁନ କ’ଣ ଉପହାର ଦେବେ ତାହା ସାମ୍ନାକୁ ଆସିଛି। କୁହାଯାଉଛି ଯେ, ପୁଅ-ବୋହୂଙ୍କୁ ବିବାହରେ ନାଗାର୍ଜୁନ ୨.୫କୋଟି ମୂଲ୍ୟର ଏକ କାର୍ ଦେବେ। କାରଟି ହେଉଛି ଲେକ୍ସସ୍ ଏଲଏମ ଏମପିଭି ମଡେଲର। ହାଇଦ୍ରାବାଦରେ ଥିବା ଆରଟିଏ ଅଫିସକୁ ଅଭିନେତା ନମ୍ବର ରେଜିଷ୍ଟର କରାଇବାକୁ ଯିବା ପରେ ଏହି ଚର୍ଚ୍ଚା ଆରମ୍ଭ ହୋଇଛି। ତେବେ ଏନେଇ କୌଣସି ସ୍ପଷ୍ଟିକରଣ ମିଳିନାହିଁ।

ତେବେ ନାଗା ଚୈତନ୍ୟଙ୍କ ଏହା ହେଉଛି ଦ୍ୱିତୀୟ ବିବାହ। ଏହାପୂର୍ବରୁ ସେ ଗୋଆରେ ସାଉଥ୍ ସୁପରଷ୍ଟାର ସାମନ୍ଥା ରୁଥ ପ୍ରଭୁଙ୍କୁ ବିବାହ କରିଥିଲେ। ହେଲେ ପରେ ସେମାନେ ପରସ୍ପରକୁ ଛାଡ଼ପତ୍ର ଦେଇ ଅଲଗା ହୋଇଯାଇଥିଲେ। ଛାଡ଼ପତ୍ର ପରେ ଚୈତନ୍ୟ, ଶୋଭିତାଙ୍କ ପ୍ରେମରେ ପଡ଼ିଲେ ନା ସାମନ୍ଥାଙ୍କ ସହ ଥିବା ବେଳେ ତାଙ୍କୁ ଧୋକା ଦେଇ ସେ ଶୋଭିତାଙ୍କୁ ଭଲପାଉଥିଲେ ତାହା ସାମ୍ନାକୁ ଆସିନାହିଁ ।