ନୂଆବର୍ଷର ନୂଆ ନାୟକ

୨୦୨୫ରେ ଜଣେ ନୂଆ ନାୟକଙ୍କୁ ବଡ଼ ପରଦାରେ ଦେଖିବାକୁ ପାଇବେ ଦର୍ଶକ। ତାଙ୍କ ଅଭିନୀତ ଦୁଇଟି ଓଡ଼ିଆ ଛବି ୨୦୨୫ରେ ମୁକ୍ତିଲାଭ କରିବ ବୋଲି ଆଶା କରାଯାଉଛି। ସେ ହେଉଛନ୍ତି ନବାଗତ ପ୍ରେମ୍। ପ୍ରେମ୍‌ଙ୍କ ଅଭିନୀତ ‘ଚୁଇଙ୍ଗମ୍’ ଓ ‘ସ୍କୁଲ୍ ଡାଏରୀ’ ମୁକ୍ତି ପ୍ରତୀକ୍ଷାରେ ରହିଛି। ‘ରକ୍‌ଷ୍ଟାର୍’, ‘ଟିକେ ଖରା ଟିକେ ଛାଇ’ ଓ ‘କଟିପତଙ୍ଗ୍’ ଫେମ୍ କୁମାର ସରୋଜଙ୍କ ନିର୍ଦ୍ଦେଶିତ ‘ଚୁଇଙ୍ଗମ୍’ ହେଉଛି ପ୍ରେମ୍‌ଙ୍କର ଡେବ୍ୟୁ ସିନେମା। ଏଥିରେ ତାଙ୍କ ବିପକ୍ଷରେ ନାୟିକା ସାଜିଛନ୍ତି ନିଶିତା ପ୍ରଧାନ। ଜିତେନ୍ଦ୍ର ବରାଳ ଏହାର ସଂଳାପ ରଚନା କରିଥିବା ବେଳେ ସ୍ବର ସଂଯୋଜନା କରିଛନ୍ତି ପ୍ରଶାନ୍ତ ପାଢ଼ୀ। ସାମାଜିକ ସନ୍ଦେଶ ଥିବା ଭିନ୍ନ ସ୍ବାଦର ପ୍ରେମ କାହାଣୀ ‘ଚୁଇଙ୍ଗମ୍’ର ପ୍ରଯୋଜକ ହେଲେ ଶାରଦା ପ୍ରସନ୍ନ ମିଶ୍ର ଓ ଶ୍ରୀଲେଖା ମିଶ୍ର। 

ନାୟକ ପ୍ରେମ୍‌ଙ୍କ ଅଭିନୀତ ଅନ୍ୟ ସିନେମା ହେଲା ‘ସ୍କୁଲ୍‌ ଡାଏରୀ’। ଏହାର କାହାଣୀ ସ୍କୁଲ୍‌ ସମୟର ଏକ ତ୍ରିକୋଣ ପ୍ରେମ ଉପରେ ଆଧାରିତ। ଏଥିରେ ବି ସାମାଜିକ ବାର୍ତ୍ତା ରହିଛି। ଏହି ସିନେମାରେ ପ୍ରେମ୍‌ଙ୍କ ବିପକ୍ଷରେ ଅଛନ୍ତି ଦୁଇ ନାୟିକା ଅକ୍ଷିତା ଓ ଦିବ୍ୟା। ସମ୍ବିତ୍‌ ବାରିକ ଓ ଲଗ୍ନା ସ୍ବାଇଁଙ୍କ ପ୍ରଯୋଜିତ ଏହି ଓଡ଼ିଆ ଛବିର ସଂଳାପକାର ହେଲେ ଡକ୍ଟର ରଜନୀରଂଜନ। ସମ୍ବିତ୍‌ ବାରିକ ଏହାର ନିର୍ଦ୍ଦେଶନା ଦେଇଥିବା ବେଳେ ସଂଗୀତରେ ଅଛନ୍ତି ପ୍ରଶାନ୍ତ ପାଢ଼ୀ।