ଭୁବନେଶ୍ବର: ବିଶ୍ବ ପାଇଁ ପାଣି ସଞ୍ଚୟର ବାର୍ତ୍ତା ନେଇ ଓ ଏ ସଂକ୍ରାନ୍ତରେ ଜନସଚେତନତା ସୃଷ୍ଟି ପାଇଁ ‘ପାଣି’ ନାମରେ ଏକ ଆଲବମ୍ ମୁକ୍ତିଲାଭ କରିଛି। ପରିଚୟ ଗ୍ରୁପ୍ ତରଫରୁ ପ୍ରସ୍ତୁତ କରାଯାଇଥିବା ଏହି ଭିନ୍ନସ୍ବାଦର ଆଲବମ୍ ନିକଟରେ ଲୋକାର୍ପିତ ହୋଇଛି।
‘ପାଣି’ର ସଙ୍ଗୀତ ସଂଯୋଜନା ଓ ନିର୍ଦ୍ଦେଶନା ଭାର ଅଜୟ କୁମାର ଦାଶ ବହନ କରିଥିବା ବେଳେ ଗୀତରଚନା କରିଛନ୍ତି ତାପସ ଓ ଭିଜୁଆଲ୍ ନିର୍ଦ୍ଦେଶନା ଦେଇଛନ୍ତି ଆଦର୍ଶ। ଏଥିରେ ରାଜ୍ୟର ଜଣାଶୁଣା କଣ୍ଠଶିଳ୍ପୀ ସୌରଭ, ଗୌତମ, ଅନ୍ତରା, ସ୍ବପ୍ନା, ଅରୋଶିଷ ଓ ଭାଗ୍ୟଶ୍ରୀ କଣ୍ଠଦାନ କରିଛନ୍ତି । ଏହି ଆଲବମ୍ଟି ପସନ୍ଦଯୋଗ୍ୟ ହୋଇଛି।
ପରିଚୟ ନାମରେ ଏକ ସଙ୍ଗୀତ ଅନୁଷ୍ଠାନ ବିଗତ ୪ ବର୍ଷ ହେଲା କାର୍ଯ୍ୟକରୁଛି। ଅଜୟ କୁମାର ଦାଶ ଓ ସ୍ବପ୍ନା ପାତ୍ରଙ୍କ ମିଳିତ ଉଦ୍ୟମରେ ଗଢାଯାଇଛି ଏହି ଅନୁଷ୍ଠାନ । ପରିଚୟ ତରଫରୁ ନୂତନ ପିଢିର ଯୁବକଯୁବତୀ ଓ ଛୋଟ ପିଲାଙ୍କୁ ହିନ୍ଦୁସ୍ତାନୀ ଶାସ୍ତ୍ରୀୟ ସଂଗୀତ ଓ ଓଡ଼ିଶୀ ସଙ୍ଗୀତ ଶିକ୍ଷା ପ୍ରଦାନ କରାଯାଉଛି। ପ୍ରତିବର୍ଷ ଅନୁଷ୍ଠାନ ତରଫରୁ କଳାକାରମାନଙ୍କୁ ନେଇ ବିଭିନ୍ନ ପୁରୁଣା ଗୀତ ପରିବେଷଣ କରାଯାଇ ପ୍ରତିଭାବାନ ଶିଳ୍ପୀଙ୍କୁ ପୁରସ୍କୃତ କରାଯାଇଥାଏ। ଏହି କାର୍ଯ୍ୟକ୍ରମ କଳାକାରମାନଙ୍କୁ ଉତ୍ସାହ ଦେବା ସହ ଆଗକୁ ବଢିବାରେ ସାହାଯ୍ୟ କରିଥାଏ ।