ନ୍ୟୁଜ୍‌ ରିଲ୍‌: କିସିକ୍‌ ଗାର୍ଲ ଶ୍ରୀଲୀଲା

‘ପୁଷ୍ପା: ଦି ରୁଲ୍‌’ର ‘କିସିକ୍’ ଗୀତରେ ମନଛୁଆଁ ନୃତ୍ୟକରି ଦର୍ଶକଙ୍କ ଦୃଷ୍ଟି ଆକର୍ଷଣ କରିଛନ୍ତି ଶ୍ରୀଲୀଲା। ‘ପୁଷ୍ପା-୨’ ରିଲିଜ୍‌ ପରେ ଚର୍ଚ୍ଚିତ ଚେହେରା ପାଲଟିଛନ୍ତି କନ୍ନଡ଼ ତଥା ତେଲୁଗୁ ଫିଲ୍ମ ଇଣ୍ଡଷ୍ଟ୍ରିର ଏହି ଲୋକପ୍ରିୟ ନାୟିକା। ‘କିସିକ୍‌‘ ଗୀତରେ ନାୟକ ଅଲ୍ଲୁ ଅର୍ଜୁନଙ୍କ ସହ ତାଙ୍କର ନୃତ୍ୟଶୈଳୀ ପ୍ରାୟ ସବୁ ଶ୍ରେଣୀର ଦର୍ଶକଙ୍କୁ ଅଭିଭୂତ କରିଛି। ମାତ୍ର ୨୩ବର୍ଷ ବୟସରେ ଦକ୍ଷିଣ ସିନେଶିଳ୍ପର ଅଧିକାଂଶ ସୁପର୍‌ଷ୍ଟାର୍‌ଙ୍କ ସହ କାମ କରିସାରିଥିବା ଶ୍ରୀଲୀଲା ଏବେ ଜଣେ ଆଗଧାଡ଼ିର ଅଭିନେତ୍ରୀ ଭାବେ ପରିଗଣିତ ହେଉଛନ୍ତି।

୨୦୦୧ ମସିହାରେ ଆମେରିକାର ମିସିଗାନ୍‌ର ଡେଟ୍ରଏଟ୍‌ରେ ଏକ ତେଲୁଗୁ ପରିବାରରେ ଶ୍ରୀଲୀଲାଙ୍କର ଜନ୍ମ। ପାଠ ପଢୁଥିବା ବେଳେ ୨୦୧୭ ମସିହାରେ ତେଲୁଗୁ ସିନେମା ‘ଚିତ୍ରାଙ୍ଗଦା’ ଜରିଆରେ ତାଙ୍କ ଅଭିନୟ ଜୀବନର ମୂଳଦୁଆ ପଡ଼ିଥିଲା। ତେବେ ୨୦୧୯ରେ କନ୍ନଡ଼ ଛବି ‘କିସ୍‌’ରୁ ନାୟିକା ଭାବେ କ୍ୟାରିୟର୍‌ ଆରମ୍ଭ କରିଥିଲେ ଭରତନାଟ୍ୟମ୍ ପ୍ରଶିକ୍ଷଣପ୍ରାପ୍ତ ଶ୍ରୀଲୀଲା। ‘ଆଦିକେଶବ’, ‘ଧମାକା’, ‘ସ୍କନ୍ଦ’, ‘ଗୁଣ୍ଟୁର କରମ’, ‘ମେଲି ସଣ୍ଡଦ’, ‘ଉସ୍ତାଦ ଭଗତ ସିଂହ’, ‘ଏକ୍‌ସଟ୍ରାଅର୍ଡିନାରି ମ୍ୟାନ୍’, ‘ରବିନହୁଡ୍’, ‘ଭିଡି ୧୨’, ‘ଭାଗବନ୍ତ କେଶରୀ’ ଆଦି ଫିଲ୍ମରେ ମହେଶବାବୁ ଓ ବାଲକ୍ରିଷ୍ଣଙ୍କ ଭଳି ଦକ୍ଷିଣୀ ସୁପର୍‌ଷ୍ଟାର୍‌ଙ୍କ ନାୟିକା ବନିଛନ୍ତି ସେ। ଚିତ୍ତାକର୍ଷକ ଅଭିନୟ ଓ ସୌନ୍ଦର୍ଯ୍ୟ ଭାରତୀୟ ସିନେମାରେ ତାଙ୍କୁ ଏକ ନୂଆ ପରିଚୟ ଦେଇଥିବା ବେଳେ ଏବେ ଅଫର୍‌ର ସୁଅ ଛୁଟିଥିବା ଜଣାଯାଇଛି। 
ଅଭିନୟରେ ଥିଲେ ହେଁ ପାଠପଢ଼ାରେ କିଛି କମ୍‌ ନୁହନ୍ତି ଶ୍ରୀଲୀଲା। ସେ ଜଣେ ଏମ୍‌ବିବିଏସ୍ ଡାକ୍ତର। ୨୦୨୧ରେ ଏମ୍‌ବିବିଏସ୍ ସାରିଥିଲେ ମଧ୍ୟ ଏବେ ସେ ଫିଲ୍ମରେ ସକ୍ରିୟ ଅଛନ୍ତି। ଉଲ୍ଲେଖଯୋଗ୍ୟ, ତାଙ୍କ ମା’ ଡ. ସ୍ବର୍ଣ୍ଣଲତା ଜଣେ ଜଣାଶୁଣା ପ୍ରସୂତୀ ଓ ସ୍ତ୍ରୀରୋଗ ବିଶେଷଜ୍ଞ।