ବିଗ୍ ବସ୍-୧୬ରୁ ବଲିଉଡ୍ ଯିବେ ଅଭିନେତ୍ରୀ: ‘ଏଲଏସଡି-୨’ରୁ ଡେବ୍ୟୁ କରିବେ ନିମ୍ରିତ୍ କୌର ଆଲୁୱାଲିଆ

ମୁମ୍ବାଇ: ଲୋକପ୍ରିୟ ରିୟାଲିଟି ସୋ’ ବିଗ୍ ବସ୍-୧୬ରୁ ବଲିଉଡ ଯିବେ ଅଭିନେତ୍ରୀ ନିମ୍ରିତ୍ କୌର ଆଲୁୱାଲିଆ। ଗୋଟିଏ ହିଟ୍ ଧାରାବାହିକ ପରେ ବିଗ୍ ବସ୍ ଭଳି ରିୟାଲିଟି ସୋ’କୁ ଆସିଥିଲେ ନିମ୍ରିତ୍। ଏବେ ଏହି ସୋ’ ପରେ ସେ ବଲିଉଡରେ ପ୍ରବେଶ କରିବେ ବୋଲି ଜଣାପଡ଼ିଛି। ଏକତା କପୁରଙ୍କ ଏଲଏସଡି-୨(ଲଭ୍, ସେକ୍ସ ଔର ଧୋକା-୨)ରୁ ନିମ୍ରିତ୍ କୌର ଆଲୁୱାଲିଆ ବଲିଉଡରେ ଡେବ୍ୟୁ କରିବେ ବୋଲି ଚର୍ଚ୍ଚା ହେଉଛି।

ଚର୍ଚ୍ଚା ହେଉଛି ଯେ, ଏକତା କପୁର ଓ ଫିଲ୍ମ ନିର୍ମାତା ଦିବାକର ବାନାର୍ଜୀ ବିଗ୍ ବସ୍-୧୬ ସେଟ୍କୁ ଯିବା ସହ ନିମ୍ରିତ୍ କୌର ଆଲୁୱାଲିଆଙ୍କୁ ଏଲଏସଡି-୨ରେ କାଷ୍ଟ କରିବା ନେଇ ଘୋଷଣା କରିବେ। ଏହା ସହ ନାଗିନ-୭ ପାଇଁ ଏକତା, ପ୍ରତିଯୋଗୀ ପ୍ରିୟଙ୍କା ଚହର ଚୌଧୁରୀଙ୍କୁ ବାଛି ସାରିଥିବା କୁହାଯାଉଛି।

ତେବେ ଏହି ରିୟଲିଟି ସୋ’ର ଅଂଶ ହେବା ପୂର୍ବରୁ ନିମ୍ରିତଙ୍କୁ ‘ଛୋଟି ସରଦାରନୀ’ ରେ ଦେଖିବାକୁ ମିଳିଥିଲା। କିନ୍ତୁ ମଝିରେ ସେ ସୋ’ରୁ ବିଦାୟ ନେଇଥିଲେ। 'ବିଗ୍ ବସ୍ ୧୬'ରେ ନିମ୍ରତ କହିଥିଲେ ଯେ, ସେ କିଛି ସମୟ ପାଇଁ ଅବସ‌ାଦଗ୍ରସ୍ତ ଥିଲେ। ଏଥିପାଇଁ ତାଙ୍କୁ ଔଷଧ ନେବାକୁ ପଡ଼ୁଥିଲା। ହେଲେ ଏବେ ସେ ଠିକ ଅଛନ୍ତି। ତେବେ ପ୍ରିୟଙ୍କା ଓ ନିମ୍ରିତଙ୍କୁ ନେଇ ମିଳୁଥିବା ଏଖବରରେ କେତେ ସତ୍ୟତା ରହିଛି, ତାହା ଆଉ ମାତ୍ର କିଛି ଦିନ ମଧ୍ୟରେ ସ୍ପଷ୍ଟ ହେବ।