୪୮ ବର୍ଷ ବୟସରେ ପାଦଦେଲେ ପଙ୍କଜ ତ୍ରିପାଠୀ; ସିନେ ଇଣ୍ଡଷ୍ଟ୍ରୀରେ ୨୦ ବର୍ଷ

ମୁମ୍ବାଇ: ୬ ଥର ଫିଲ୍ମଫେୟାର ଆୱାର୍ଡ ପାଇଁ ମନୋନୀତ ହୋଇଥିବା ଓ ଥରେ ଫିଲ୍ମଫେୟାର ଜିତିଥିବା ପଙ୍କଜ ତ୍ରିପାଠୀଙ୍କୁ ଆଜି ୪୮ ବର୍ଷ ବୟସ ହୋଇଛି। ବିହାରର ଏକ ଛୋଟ ଜିଲ୍ଲାରୁ ଆସି ପଙ୍କଜ ତ୍ରିପାଠୀ ଏକଦା ଏକ ହୋଟେଲରେ କାମ କରୁଥିଲେ। କେବଳ ଏତିକି ନୁହେଁ, ହୋଟେଲରେ କାମ କରିବା ସହିତ ପଙ୍କଜ ତ୍ରିପାଠୀ କଲେଜ ପଢିଲା ବେଳେ ରାଜନୀତିରେ ମଧ୍ୟ ସକ୍ରିୟ ଥିଲେ। 'ସ୍ତ୍ରୀ' ଫିଲ୍ମର ରୁଦ୍ର ହୁଅନ୍ତୁ, 'ଫୁକ୍ରେ' ଫିଲ୍ମର ପଣ୍ଡିତ ହୁଅନ୍ତୁ କିମ୍ବା 'ମିର୍ଜାପୁର'ର କାଲିନ୍ ଭାୟା, ପଙ୍କଜ ତ୍ରିପାଠୀ ପ୍ରତ୍ୟେକ ଚରିତ୍ରରେ ନିଖୁଣ ଅଭିନୟ କରି ଦର୍ଶକଙ୍କ ମନ ଜିତିପାରିଛନ୍ତି। ପଙ୍କଜ ତ୍ରିପାଠୀଙ୍କ ଜନ୍ମଦିନରେ ବଲିଉଡ ତାରକାଙ୍କ ସମେତ ପ୍ରଶଂସକମାନେ ତାଙ୍କୁ ଜନ୍ମଦିନର ଶୁଭେଚ୍ଛା ଜଣାଇଛନ୍ତି। ନିଜ ଅଭିନୟରେ ସମସ୍ତଙ୍କୁ ଆପଣାର କରିଦେଇଥିବା ପଙ୍କଜ ତ୍ରିପାଠୀଙ୍କୁ ଆଜି କୌଣସି ପରିଚୟର ଆବଶ୍ୟକତା ନାହିଁ। ୨୮ ସେପ୍ଟେମ୍ବର ୧୯୭୬ରେ ବିହାରର ଗୋପାଳଗଞ୍ଜରେ ଜନ୍ମଗ୍ରହଣ କରିଥିବା ଏହି କଳାକାରଙ୍କ ନାମ ଆଜି ସମସ୍ତଙ୍କ ମୁହଁରେ ଅଛି। 

ନିଜେ ସଫଳତା ହାସଲ କରିଥିବା ଏହି ଅଭିନେତା ଏକ ଟିଭି ସାକ୍ଷାତକାରରେ ନିଜ ପରିବାର ବିଷୟରେ ଖୋଲାଖୋଲି ଭାବେ କହିଥିଲେ। ଯେଉଁଠାରେ ସେ ତାଙ୍କ ପିତାଙ୍କୁ ମନେ ପକାଇ କାନ୍ଦି ପକେଇଥିଲେ। ସେ କହିଥିଲେ ଯେ, ତାଙ୍କ ବାପା ମା ତାଙ୍କୁ ଏଠାରେ ପହଞ୍ଚାଇବା ପାଇଁ ବହୁତ କଠିନ ପରିଶ୍ରମ କରିଛନ୍ତି | ସେ ଜଣେ ଅଭିନେତା ହେବା ଦିନଠାରୁ ତାଙ୍କ ବାପା ତାଙ୍କୁ 'ପଙ୍କଜ ଜୀ' ବୋଲି କହିବା ଆରମ୍ଭ କରିଥିଲେ। ପଙ୍କଜ ତାଙ୍କ ସଫଳତା ପାଇଁ ତାଙ୍କ ବାପା ମାଙ୍କୁ ସମସ୍ତ ଶ୍ରେୟ ପ୍ରଦାନ କରନ୍ତି।

ପଙ୍କଜ ତ୍ରିପାଠୀ ଦର୍ଶକଙ୍କ ନଜରରେ ଆସିଥିଲେ ଯେତେବେଳେ 'ଗ୍ୟାଙ୍ଗସ୍ ଅଫ୍ ୱାସେପୁର' ମୁକ୍ତିଲାଭ କରିଥିଲା। ​​ଏହି ଚଳଚ୍ଚିତ୍ରରେ ଦର୍ଶକ ତାଙ୍କୁ ହୃଦୟରୁ ଗ୍ରହଣ କରିଥିଲେ ଏବଂ ଖୁବ ବହୁତ ପ୍ରଶଂସା କରିଥିଲେ। ଏହା ପରେ ସେ ଅନେକ ଚଳଚ୍ଚିତ୍ରରେ ବିଭିନ୍ନ ଚରିତ୍ରରେ ଅଭିନୟ କରିଥିଲେ। ଚଳଚ୍ଚିତ୍ର ବ୍ୟତୀତ ପଙ୍କଜ ତ୍ରିପାଠୀ ୱେବ୍ ସିରିଜରେ ମଧ୍ୟ କାମ କରିଛନ୍ତି। 'ମିର୍ଜାପୁର' ୱେବ୍ ସିରିଜରେ ତାଙ୍କୁ କାଲିନ୍ ଭାୟା ନାମ ଦିଆଯାଇଥିଲା, ଯାହା ଦର୍ଶକଙ୍କୁ ଖୁବ ପସନ୍ଦ ଆସିଥିଲା। ପାଟନାରେ ପାଠପଢା ଶେଷ କରିବା ପରେ ପଙ୍କଜ ଥିଏଟରରେ ଅଭିନୟ କରୁଥିଲେ। ଏହା ପରେ ସେ ନ୍ୟାସନାଲ ସ୍କୁଲ ଅଫ୍ ଡ୍ରାମାରେ ଅଭିନୟ ଶିଖିଥିଲେ।

୨୦୦୪ ମସିହାରେ ଚଳଚ୍ଚିତ୍ର 'ରନ୍' ସହିତ ଚଳଚ୍ଚିତ୍ର କ୍ୟାରିୟର ଆରମ୍ଭ କରିଥିବା ପଙ୍କଜ ତ୍ରିପାଠୀ ପରେ 'ଓମକାରା' ଚଳଚ୍ଚିତ୍ରରେ ମଧ୍ୟ ଅଭିନୟ କରିଥିଲେ। ଅଭିନେତା ତାଙ୍କ କାମ ପାଇଁ ଅନେକ ପୁରସ୍କାର ମଧ୍ୟ ପାଇଥିଲେ। ଅଭିନେତା ୧୫ ଜାନୁଆରୀ ୨୦୦୪ରେ ମ୍ରିଦୁଲାଙ୍କୁ ବିବାହ କରିଥିଲେ। ନିକଟରେ ତାଙ୍କୁ 'ସ୍ତ୍ରୀ ୨'ରେ ଦେଖିବାକୁ ମିଳିଥିଲା। ଗ୍ୟାଙ୍ଗସ୍ ଅଫ୍ ୱାସେପୁର, ମାସାନ୍, କ୍ରିମିନାଲ୍ ଜଷ୍ଟିସ୍, ଲୁଡୋ, ମିମି, ଗୁରୁଗାଓଁ ଏବଂ ସାକ୍ରେଡ୍ ଗେମ୍ସ ଭଳି ଅନେକ ପ୍ରୋଜେକ୍ଟରେ ଅଭିନୟ କରି ସେ ଦର୍ଶକଙ୍କ ମନ ଜିତି ପାରିଛନ୍ତି ।