ହତ୍ୟା ଧମକ ପାଇଁ ‘ରେସ୍-୩’ର ସୁଟିଂ ଅଧାରୁ ବନ୍ଦ କରି ଘରକୁ ଗଲେ ସଲମାନ
ମୁମ୍ବାଇ : ବଲିଉଡର ଟାଇଗର ସଲମାନ ଖାନ କିଛି ଦିନ ପୂର୍ବେ ଯୋଧପୁରରେ ଚାଲିଥିବା ତାଙ୍କ ମାମଲାର ଶୁଣାଣି ପାଇଁ ର୍କୋଟରେ ହାଜର ହୋଇଥିଲେ । ଘଟଣାଚକ୍ରରେ ସେ ଦିନ କୋର୍ଟକୁ ଆସିଥିବା ଗ୍ୟାଙ୍ଗଷ୍ଟର୍ ଲରେନ୍ସ ବିଷ୍ଣୋଇ ତାଙ୍କୁ ହତ୍ୟ ଧମକ ଦେଇଥିଲା । ପରେ ସଲମାନଙ୍କୁ ଯୋଧପୁର କୋର୍ଟରୁ କଡ଼ା ସୁରକ୍ଷାର ସହ ମୁମ୍ବାଇକୁ ଅଣାଯାଇଥିଲା ।
ତେବେ ମଙ୍ଗଳବାର ଦିନ ସଲମାନ ଫିଲ୍ମସିଟି ଷ୍ଟୁଡିଓରେ ତାଙ୍କର ଆଗାମୀ ଚଳଚ୍ଚିତ୍ର ‘ରେସ-୩’ର ସୁଟିଂ କରୁଥିଲେ । ଠିକ ସେହି ସମୟରେ ଏକ ଡ଼ର୍ଜନରୁ ଅଧିକ ପୁଲିସ କର୍ମଚାରୀ ସେଟ୍ରେ ପହଞ୍ଚି ଚଳଚ୍ଚିତ୍ରର ପ୍ରଯୋଜକ ରମେଶ ତୌରାନିଙ୍କୁ ସଟିଂ ଅଟକାଇବା ଲାଗି କହିବା ସହ ସହ ସଲମାନ ଖାନଙ୍କୁ ତୁରନ୍ତ ତାଙ୍କ ଘର ପାଇଁ ଯିବାକୁ ପଡ଼ିବ ବୋଲି କହିଥିଲେ । ପୁଲିସ ପକ୍ଷରୁ କୁହାଯାଇଥିଲା କି କିଛି ଦୁର୍ବୃତ୍ତ ଷ୍ଟୁଡିଓ ଭିତରକୁ ପଶି ଆସିଛନ୍ତି। ସେମାନେ ହୁଏତ ସଲମାନଙ୍କୁ କ୍ଷତି ପହଞ୍ଚାଇ ପାରନ୍ତି। ଏହାପରେ ସଲମାନଙ୍କୁ ଅନ୍ୟ ଏକ ଗାଡ଼ିରେ ୬ ପୁଲିସ କର୍ମଚାରୀଙ୍କ ସହ ଘରକୁ ଫେରିବାକୁ ପଡ଼ିଥିଲା।
“ଏହା ପ୍ରଥମ ଥର ନୁହଁ, ସଲମାନ ଏବଂ ତାଙ୍କର ପରିବାର ସଦସ୍ୟଙ୍କ ବିରୋଧରେ ଏପରି ଅନେକ ବାର ଧମକ ଆସିଛି। କିନ୍ତୁ ଅଭିନେତା ଜଣଙ୍କ ପ୍ରାୟତଃ ବିନା ସୁରକ୍ଷାରେ ମୁମ୍ବାଇରେ ବୁଲାବୁଲି କରୁଥିବାର ଦେଖାଯାଇଥାନ୍ତି । ଏଣୁ କୌଣସି ଅଘଟଣରୁ ବଞ୍ଚିବା ପାଇଁ ତାଙ୍କର ସୁରକ୍ଷାକୁ ବଢ଼ାଇବା ପାଇଁ ଆମେ ଚିନ୍ତାକରୁଛୁ” ବୋଲି କହିଛନ୍ତି ଜନୈକ ବରିଷ୍ଠ ପୁଲିସ କର୍ମଚାରୀ ।
ଅନ୍ୟ ପକ୍ଷରେ ‘ରେସ-୩’ର ପ୍ରଯୋଜକ ରମେଶ ତୌରାନି ଫିଲ୍ମସିଟି ଷ୍ଟୁଡିଓରେ ସୁରକ୍ଷା ବ୍ୟବସ୍ଥାକୁ ମଧ୍ୟ ବଢ଼ାଇଛନ୍ତି।
