ମୁମ୍ବାଇ: ଦମଦାର ତଥା ଭିନ୍ନ ଢଙ୍ଗର ଅଭିନୟ ପାଇଁ ବେଶ ଜଣାଶୁଣା ବଲିଉଡ ଅଭିନେତ୍ରୀ ରାଧିକା ଆପ୍ଟେ | ବିଭିନ୍ନ ସମୟରେ ରାଧିକା ଭିନ୍ନ ଭିନ୍ନ ଭୂମିକାରେ ଅଭିନୟ କରିଛନ୍ତି। ତେବେ ଖୁବ ଶୀଘ୍ର ରାଧିକା ଆପ୍ଟେ ଓଟିଟି ପ୍ଲାଟଫର୍ମ ଜ଼ୀ୫ ର ୱେବ୍ ସିରିଜ୍ ‘ମିସେସ ଅଣ୍ଡରକଭର’ରେ ନଜର ଆସିବେ | ଆଜି ରାଧିକାଙ୍କ ବହୁ ପ୍ରତୀକ୍ଷିତ ୱେବ୍ ସିରିଜ୍ ‘ମିସେସ ଅଣ୍ଡରକଭର’ର ଟ୍ରେଲର ରିଲିଜ ହୋଇଛି | ଏହି ଟ୍ରେଲରକୁ ଦେଖିବା ପରେ ଜଣାପଡୁଛି ଯେ ଏହି ସିରିଜର କାହାଣୀ ଏକ ସିରିଏଲ କିଲର ଉପରେ କେନ୍ଦ୍ରିତ ହୋଇଛି, ଯିଏ ଯୁବତୀମାନଙ୍କୁ ଶିକାର କରୁଛି | ସହରରେ ବଢୁଥିବା ଅପରାଧକୁ ଦେଖି ପୁଲିସ ହତ୍ୟାକାରୀକୁ ଧରିବା ପାଇଁ ଜଣେ ମହିଳା ଅଣ୍ଡରକଭର ଏଜେଣ୍ଟଙ୍କ ସାହାଯ୍ୟ ନେଇଛି |
Sambad is now on WhatsApp
Join and get latest news updates delivered to you via WhatsApp
ରାଧିକା ଆପ୍ଟେ ଏଥିରେ ଏଜେଣ୍ଟ ଭୂମିକାରେ ଅଭିନୟ କରିଥିବାବେଳେ ସମସ୍ୟାଟି ହେଉଛି ଯେ ୧୨ ବର୍ଷ ପୂର୍ବେ, ରାଧିକା ଅଣ୍ଡରକଭର ଏଜେଣ୍ଟ ବୃତ୍ତି ଛାଡ଼ି ଗୃହିଣୀ ହୋଇଯାଇଥିଲେ | ତେବେ ରାଧିକା କିପରି ପୁଣି ଏଜେଣ୍ଟ ହୁଅନ୍ତି ଏବଂ ସେହି ହତ୍ୟାକାରୀକୁ ଧରନ୍ତି, ତାହା ‘ମିସେସ ଅଣ୍ଡରକଭର’ରେ ଦେଖିବାକୁ ମିଳିବ | ତେବେ ଟ୍ରେଲର ରିଲିଜ୍ ହେବା ପରେ ଏହାକୁ ଦର୍ଶକ ଭରପୁର ପସନ୍ଦ କରୁଛନ୍ତି | ‘ମିସେସ ଅଣ୍ଡରକଭର’ର ଟ୍ରେଲର ରୋମାଞ୍ଚକର ହୋଇଥିବାବେଳେ ଏଥିରେ ଆପଣ ଆକ୍ସନ, ଥ୍ରୀଲର, କମେଡି ଏବଂ ଅନେକ ସସପେନ୍ସ ଦେଖିବାକୁ ପାଇବେ | ଏହି ୱେବ୍ ସିରିଜ୍ ୧୪ ଏପ୍ରିଲରେ ମୁକ୍ତିଲାଭ କରିବ | ରାଧିକା ଆପ୍ଟେଙ୍କ ବ୍ୟତୀତ ସୁମିତ ବ୍ୟାସ ଏବଂ ରାଜେଶ ଶର୍ମା ଏହି ୱେବ୍ ସିରିଜର ମୁଖ୍ୟ ଭୂମିକାରେ ଅଭିନୟ କରିଛନ୍ତି।