ଗୋଟିଏ ଗଲେ ୨-୪ଟା ପୁଅ ଆସିବେ, କାହା ପାଇଁ ଜୀବନ ହାରନାହିଁ: ରାକ୍ଷୀ ସାୱନ୍ତ

ମୁମ୍ବାଇ: ଅଭିନେତ୍ରୀ ତଥା ବିବାଦୀୟ ରାଣୀ ଭାବେ ଜଣାଶୁଣା ରାକ୍ଷୀ ସାୱନ୍ତ ଦୁଇଟି ବିବାହ କରିଥିଲେ। ପ୍ରଥମେ ରିତେଶ ଏବଂ ପରେ ଆଦିଲ ଖାନ ଦୁରାନୀଙ୍କ ସହିତ ତାଙ୍କର ବିବାହ ହୋଇଥିଲା। କିନ୍ତୁ ତାଙ୍କର ଉଭୟ ବିବାହ ଭାଙ୍ଗିଯାଇଥିଲା। ଏହି ସମୟରେ ଅଭିନେତ୍ରୀ ମଧ୍ୟ ତାଙ୍କ ମା’ଙ୍କୁ ହରାଇଥିଲେ। ଏହି ସମସ୍ତ ଝଟକାରୁ ତାଙ୍କୁ ବାହାରକୁ ଆସିବାକୁ କିଛି ଦିନ ଲାଗିଗଲା ସତ, କିନ୍ତୁ ସେ ହାର ନମାନି ସାହସର ସହିତ ଆଗକୁ ବଢ଼ିଥିଲେ। ସେ ନିଜକୁ ଅବସାଦଗ୍ରସ୍ତ ହେବାକୁ ଦେଇନଥିଲେ କିମ୍ବା କୌଣସି ଭୁଲ ପଦକ୍ଷେପ ନେଇ ନଥିଲେ। ଏବେ ଜିଆ ଖାନ ଆତ୍ମହତ୍ୟା ମାମଲାରେ ଅଭିନେତା ସୂରାଜ ପାଞ୍ଚୋଲିଙ୍କୁ ନିର୍ଦ୍ଦୋଷରେ ଖଲାସ କରାଯିବା ପରେ ଏହା ଉପରେ ପ୍ରତିକ୍ରିୟା ରଖିଛନ୍ତି ରାକ୍ଷୀ।

ରାକ୍ଷୀ ସାୱନ୍ତ କହିଛନ୍ତି, 'ମୁଁ ବୁଝିପାରୁ ନାହିଁ ଝିଅମାନେ ପ୍ରେମରେ ପଡ଼ିବା ପରେ କାହିଁକି ଆତ୍ମହତ୍ୟା କରନ୍ତି? ବନ୍ଧୁ, ଯଦି ଜଣେ ଯାଏ, ତେବେ ଦୁଇ କିମ୍ବା ଚାରି ଜଣ ଆସିବେ। ଯଦି ଷ୍ଟେସନ୍ ସୁରକ୍ଷିତ ଅଛି ତେବେ ୧୦୦ଟ୍ରେନ ଅତିକ୍ରମ କରିବ। ଏହା ପରେ ଯେତେବେଳେ ତାଙ୍କୁ ସୂଜର ପାଞ୍ଚୋଲି ନିର୍ଦ୍ଦୋଷରେ ଖଲାସ ହେବା ଖବର ବିଷୟରେ ପଚରାଯାଇଥିଲା ସେ କହିଥିଲେ, 'ସୂରଜ ପଞ୍ଚୋଲି ମୋ ଭାଇ। ଦେଖନ୍ତୁ, ସତ କ’ଣ ଆମେ ଜାଣି ନାହେଁ। କିନ୍ତୁ ପ୍ରକୃତରେ ଜିଆ ଖାନଙ୍କ ପାଇଁ ମୋର ସମବେଦନା ରହିଛି। ଦେଶର ପ୍ରତ୍ୟେକ ଝିଅ ପ୍ରେମରେ ପଡ଼ନ୍ତି। ମୋ ସହିତ ମଧ୍ୟ ଅନେକ ଦୁଃଖଦ ଘଟଣା ଘଟିଥିଲା। ହେଲେ ସବୁ ଭୁଲି ମୁଁ ଏବେ ହସୁଛି। କାରଣ ଜୀବନ କେବଳ ଗୋଟିଏ, ବାରମ୍ବାର ମିଳିବ ନାହିଁ। ସେଥିପାଇଁ ପୁଅ ହେଉ କି ଝିଅ କାହା ପାଇଁ ଜୀବନ ହାରନାହିଁ।