ଆଧୁନିକତାକୁ ପ୍ରାଥମିକତା ଦିଆଯାଇ ରାମାୟଣକୁ ବିକୃତ କରାନଯାଉ; ‘ଆଦିପୁରୁଷ’ ଟ୍ରେଲର୍‌ ଦେଖି ମତ ରଖିଲେ ସୁନୀଲ ଲାହିରୀ

ମୁମ୍ବାଇ: ‘ରାମାୟଣ’ କାହାଣୀ ଆଧାରିତ ତଥା ସାଉଥ୍ ସୁପରଷ୍ଟାର ପ୍ରଭାସ ଓ ବଲିଉଡ୍ ନାୟିକା କ୍ରିତି ସାନନଙ୍କ ଅଭିନୀତ ଫିଲ୍ମ ‘ଆଦିପୁରୁଷ’ ଏ ବର୍ଷର ବହୁ ପ୍ରତୀକ୍ଷିତ ଫିଲ୍ମ ମଧ୍ୟରୁ ଗୋଟିଏ । ଦର୍ଶକ ରାମାୟଣର କାହାଣୀକୁ ବଡ଼ ପରଦାରେ ଦେଖିବାକୁ ଖୁବ୍‌ ଉତ୍ସୁକ ଅଛନ୍ତି। ତେବେ ଏହି ଫିଲ୍ମ ପାଇଁ ଉତ୍ସୁକ ଥିବା ଦର୍ଶକଙ୍କ ପାଇଁ ଖୁସି ଖବର। କାରଣ ଫିଲ୍ମଟିର ଟ୍ରେଲର୍‌ ରିଲିଜ୍‌ ହୋଇଯାଇଛି। ରାମାୟଣ ଉପରେ ଆଧାରିତ ନିର୍ଦ୍ଦେଶକ ଓମ୍‌ ରାଉତ୍‌ଙ୍କ ଏହି ଫିଲ୍ମଟି ଆଗାମୀ ଜୁନ୍‌ ୧୬ ତାରିଖରେ ରିଲିଜ୍‌ ହେବ।

www.aajtak.in

ତେବେ ଏହାର ଟ୍ରେଲ୍‌ର ରିଲିଜ୍‌ ହେବା ପରେ ଏହା ଉପରେ ନିଜର ପ୍ରତିକ୍ରିୟ‌ା ରଖିଛନ୍ତି ରାମାନନ୍ଦ ସାଗରଙ୍କ ‘ରାମାୟଣ’ରେ ଲକ୍ଷ୍ମଣ ଭୂମିକା ନିଭାଇଥିବା ସୁନୀଲ ଲାହିରୀ। ସେ ନିଜର ମତ ରଖି କହିଛନ୍ତି, ‘ମୁଁ ଜାଣୁଛି ଟ୍ରେଲର୍‌ ପୂର୍ବ ଅପେକ୍ଷା ଭଲ ହୋଇଛି। ମାତ୍ର ମୋତେ ଲାଗୁଛି ଏଥିରେ ସମସ୍ତେ ଅତ୍ୟାଧୁନକତାକୁ ପ୍ରାଥମିକତା ଦେଉଛନ୍ତି। ସମସ୍ତଙ୍କ ଚିନ୍ତାଧାରା ଭିନ୍ନ। ସେମାନେ ନିଜ ହିସାବରେ ରାମାୟଣକୁ ଦେଖାଇ ପାରନ୍ତି। ଏବେ ଯେହେତୁ ଫିଲ୍ମ ଦେଖିନି ତ ତାଙ୍କ ଚିନ୍ତାଧାରାକୁ ନେଇ ମୁଁ ବିଚାର କରିପାରିବି ନାହିଁ। ମୁଁ ପୂର୍ବରୁ ବି କହିଛି କି ରାମାୟଣକୁ ନେଇ ଯେଉଁ ଭାବପ୍ରବଣତା ଲୋକଙ୍କ ମନରେ ଅଛି, ତାହାକୁ ଅଧିକ ବିକୃତ ନକରିବା ଭଲ। ଏହା ଏକ ସ୍ବାଭାବିକ କଥା କି, ଆପଣ ଏମିତି କରିବେ ତ ଦର୍ଶକମାନେ ଆଘାତ ପାଇବେ।’