ଋଷି କପୁର ଏବଂ କମଲ ହାସନଙ୍କ ଅଭିନୀତ ସିନେମା ‘ସାଗର୍’ର ଟାଇଟଲ କିପରି ମିଳିଥିଲା ?
ପ୍ରଖ୍ୟାତ ନିର୍ଦ୍ଦେଶକ ରମେଶ ସିପ୍ପୀ ଓ ଜାଭେଦ୍ ଅଖ୍ତର୍ ସ୍କ୍ରିପ୍ଟ ପ୍ରସ୍ତୁତି ପରେ ଫିଲ୍ମରେ କେଉଁଠାରେ ଗୀତ ରଖାଯିବ ସେ ସଂପର୍କରେ ଆଲୋଚନା କରିଲେ । ବେଶ୍ କିଛି ଘଣ୍ଟାର ମାନସିକ କସରତ୍ ପରେ ଫିଲ୍ମ ପାଇଁ ଗୀତର ସିକ୍ୱେନ୍ସଗୁଡିକ ଠିକ୍ ହୋଇଥିଲା । ଏଥିରେ ନିର୍ଦ୍ଦେଶକ ରମେଶ୍ ସ୍କ୍ରିପ୍ଟ ଅପେକ୍ଷା ଲେଖକ ଜାଭେଦ୍ ଅଖ୍ତରଙ୍କ ଭୂମିକା ଥିଲା ଗୁରୁତ୍ୱପୂର୍ଣ୍ଣ । ଏହାପରେ ସେ ଦୁହେଁ ଫିଲ୍ମର ଟାଇଟଲ୍ କ’ଣ ରଖାଗଲେ ଭଲ ହେବ ବୋଲି ଚିନ୍ତା କଲେ ।
Sambad is now on WhatsApp
Join and get latest news updates delivered to you via WhatsApp
ରମେଶ ସିପ୍ପୀ ଇଂରାଜୀ ଅକ୍ଷର ‘s’ (ଏସ୍)ରୁ ଫିଲ୍ମର ଟାଇଟଲ୍ ରଖିବାକୁ ଚାହୁଁଥିଲେ, କାରଣ ଏହି ଅକ୍ଷର ତାଙ୍କ ପାଇଁ ଲକି ବୋଲି ସେ ମନେ କରୁଥିଲେ । ଲେଖକ ଜାଭେଦ୍ ‘ ଏସ୍’ ଅକ୍ଷରରୁ ଆରମ୍ଭ ହେଉଥିବା କେତୋଟି ଟାଇଟଲ୍ର ପ୍ରସ୍ତାବ ରଖିଲେ, ମାତ୍ର ତାହା ରମେଶ୍ ସିପ୍ପୀଙ୍କ ମନକୁ ପାଇ ନଥିଲା । ସେ କହିଥିଲେ ଫିଲ୍ମର ମ୍ୟୁଜିକ୍ ଓ ଲିରିକ୍ସ୍ ଲେଖା ସରିବା ପରେ ସେଥିରୁ କୌଣସି ଭଲ ଶଦ୍ଦ ବା ଲାଇନ୍କୁ ନେଇ ଟାଇଟଲ୍ ରଖାଯାଇପାରେ ।
ତା’ପରେ ରମେଶ୍ ତାଙ୍କର ପୂର୍ବ ସିନେମା ଗୁଡିକରେ ସଙ୍ଗୀତ ନିର୍ଦ୍ଦେଶକ ଆର୍.ଡି.ବର୍ମନ୍ ଙ୍କୁ ଏହି ଫିଲ୍ମରେ ସ୍ୱର ସଂଯୋଜନା କରିବାକୁ ଚୁକ୍ତିବଦ୍ଧ କଲେ । ଦୁହେଁ ମ୍ୟୁଜିକ୍ ସିଟିଂ ପୂର୍ବରୁ ଗୀତ ଲେଖିବା ଲାଗି କାହାଙ୍କୁ ଦାୟିତ୍ୱ ଦିଆଯିବ, ସେ ସଂପର୍କରେ ଆଲୋଚନା କରିଲେ । ରମେଶ ସିପ୍ପୀ ଚାହୁଁଥିଲେ ପୂର୍ବ ସିନେମାର ଗୀତିକାର ଆନନ୍ଦ ବକ୍ସି ଗୀତ ଲେଖନ୍ତୁ । ହଠାତ୍ ରମେଶ୍ ଆର୍.ଡି ବର୍ମନଙ୍କୁ ଫିଲ୍ମର ଟାଇଟଲ୍କୁ ନେଇ ଏବେ ବି ସସ୍ପେନ୍ସ ରହିଛି ବୋଲି କହିଲେ । ସେ ଆହୁରି ମଧ୍ୟ କହିଲେ ଯେ ଲେଖକ ଜାଭେଦ୍ ଅଖ୍ତର କେତେଟି ଟାଇଟଲ୍ ର ପ୍ରସ୍ତାବ ଦେଇଥିଲେ, ହେଲେ ତା’ ତାଙ୍କୁ ଠିକ୍ ଲାଗିଲାନି । ଏକଥା ଶୁଣିବା ପରେ ଆର୍ .ଡି ରମେଶଙ୍କୁ ଫିଲ୍ମର ଗୀତିକାର ଭାବେ ଜାଭେଦ୍ ଙ୍କୁ ଚୁକ୍ତିବଦ୍ଧ କରିବାକୁ ପରାମର୍ଶ ଦେଲେ । ଏହି କାହାଣୀ ଭିତରେ ସେ ଅଛନ୍ତି । ତା’ଛଡା ସେ ଜଣେ ଭଲ ଉର୍ଦ୍ଦୁ ଶାୟର୍ । ଏଣୁ ତାଙ୍କୁ ଏହି ଗୁରୁତ୍ୱ ଦିଆଯାଏ । କଥାଟା ରମେଶ ଙ୍କୁ ଠିକ୍ ଲାଗିଲା । ସେ ଦୁହେଁ ସାଙ୍ଗ ହୋଇ ଜାଭେଦ୍ ଅଖତର୍ ଙ୍କ ପାଖକୁ ଗଲେ ଓ ନାମକରଣ ହୋଇ ନଥିବା ଏହି ଫିଲ୍ମ ର ଗୀତ ଲେଖିବାକୁ ଅନୁରୋଧ କଲେ । ଜାଭେଦ୍ ପ୍ରଥମେ କୁଣ୍ଠାବୋଧ କରୁଥିଲେ ବି ପରେ ରାଜି ହେଲେ ।
ଫିଲ୍ମର ମ୍ୟୁଜିକ୍ ସିଟିଂ ଆରମ୍ଭ ହୁଏ । ନାୟକ-ନାୟିକା ଙ୍କ ଉପରେ ଏକ ସୁନ୍ଦର ରୋମାଣ୍ଟିକ୍ ଗୀତର ଧୂନ୍ ପ୍ରସ୍ତୁତିରେ ଲାଗି ପଡ଼ିଲେ ଆର୍.ଡି.ବର୍ମନ୍ । ସେଥି ମଧ୍ୟରୁ ଶେଷରେ ଯେଉଁଟି ଶୁଣାଇଲେ, ତାହା ରମେଶ ଙ୍କ ମନକୁ ପାଇଲା । ତା’ପରେ ସେହି ଟିଉନ୍ ମାପରେ ଜାଭେଦ୍ ଙ୍କୁ ଗୀତ ଲେଖିବାକୁ କୁହାଗଲା । ସେ ପାଞ୍ଚ ମିନିଟ୍ ଚିନ୍ତା କରିବା ପରେ ଲେଖିଥିଲେ-‘ ସାଗର୍ କିନାରେ ଦିଲ୍ ୟେ ପୁକାରେ, ତୁ ଯୋ ନେହିଁ ତୋ ମେରା କୋଇ ନେହିଁ ହୋ ।’….ଲିରିକ୍ସ ଶୁଣିବା ପରେ ଆର୍.ଡି.ଗୀତଟିକୁ ହାର୍ମୋନିୟମ୍ ଧରି ଗାଇଲେ । ଏହି ଗୀତର ମୁଖୁଡାଟା ନିର୍ଦ୍ଦେଶକଙ୍କ ମନକୁ ଏତେ ଛୁଇଁଲା ଯେ ସେ ସେଇଠି ନିଷ୍ପତ୍ତି ନେଲେ ଏହି ଫିଲ୍ମର ଟାଇଟଲ ରଖିବେ ‘ ସାଗର୍ ’ ।