ପ୍ରତୀକ୍ଷାର ଅନ୍ତ ଘଟିଲା, ରିଲିଜ ହେଲା 'ସାଲାର'ର ଟ୍ରେଲର

ମୁମ୍ବାଇ: ପ୍ରତୀକ୍ଷାର ଅନ୍ତ ଘଟିଲା। ରିଲିଜ ହେଲା 'ସାଲାର'ର ଟ୍ରେଲର। ତେଲୁଗୁ ସୁପରଷ୍ଟାର ପ୍ରଭାସଙ୍କ ବହୁ ପ୍ରତୀକ୍ଷିତ ଚଳଚ୍ଚିତ୍ର ‘ସାଲାର୍‌’ର ଟ୍ରେଲର ରିଲିଜ୍ ହୋଇସାରିଛି। ଜୁଲାଇରେ ଟିଜର ରିଲିଜ୍ ହେବା ପରେ ଟ୍ରେଲର ରିଲିଜକୁ ଅପେକ୍ଷା କରି ରହିଥିଲେ ଦର୍ଶକ। ଆଜି ସନ୍ଧ୍ୟା ୭ଟା ୧୯ରେ ଟ୍ରେଲର ରିଲିଜ୍ ହେବା ପରେ ଫିଲ୍ମକୁ ନେଇ ଦର୍ଶକଙ୍କ ଉତ୍ସାହ ବଢ଼ିଛି।

ପ୍ରଭାସଙ୍କ ବ୍ୟତୀତ ମଲୟାଲମ୍ ସୁପରଷ୍ଟାର ପୃଥ୍ବୀରାଜ ମଧ୍ୟ ଏହି ଫିଲ୍ମରେ ନଜର ଆସିବେ। ଏହା ତାଙ୍କର ତେଲୁଗୁ ଡେବ୍ୟୁ ହେବ। ଏମାନଙ୍କ ବ୍ୟତୀତ ଶ୍ରୁତି ହସନ, ଜଗପତି ବାବୁ, ଈଶ୍ୱରୀ ରାଓ ଏବଂ ଶ୍ରୀୟା ରେଡ୍ଡୀ ମଧ୍ୟ ଏଥିରେ ପ୍ରମୁଖ ଭୂମିକାରେ ନଜର ଆସିବେ। ଟ୍ରେଲରରୁ ଜଣାପଡ଼ିଛି ଯେ, ଏହା ହେଉଛି ଦୁଇ ସାଙ୍ଗଙ୍କ କାହାଣୀ, ଯେଉଁମାନେ ପରେ ପରସ୍ପରର ଶତ୍ରୁ ପାଲଟିଯାଉଛନ୍ତି। ଏହାର କାହାଣୀ 'କେଜିଏଫ' ଠାରୁ ବହୁତ ଭିନ୍ନ। 'ସାଲାର'ରେ ବନ୍ଧୁତା ଉପ‌ରେ ଗୁରୁତ୍ବ ଦିଆଯାଇଛି।

ଏହି ଚଳଚ୍ଚିତ୍ର ଆସନ୍ତା ମାସ ଡିସେମ୍ବର ୨୨ରେ ପ୍ରେକ୍ଷାଳୟରେ ମୁକ୍ତିଲାଭ କରିବ। ଫିଲ୍ମଟିରେ ଆକ୍ସନ ସହ ରୋମାଞ୍ଚ ବି ଦେଖିବାକୁ ମିଳିବ । କିଙ୍ଗ ଶାହରୁଖ ଖାନଙ୍କ ଫିଲ୍ମ 'ଡଙ୍କି' ସହ ରିଲିଜ୍ ହେବ 'ସାଲାର'। ଦର୍ଶକ କେଉଁ ଫିଲ୍ମକୁ ଅଧିକ ଭଲପାଇବା ଦେବେ, ତାହା ଦେଖିବାକୁ ବାକି ରହିଲା।