ମୁମ୍ବାଇରେ ୧୯ମହଲା ବିଶିଷ୍ଟ ବିଳାସମୟ ହୋଟେଲ ତିଆରି କରିବେ ସଲମାନ

ମୁମ୍ବାଇ: ମୁମ୍ବାଇରେ ୧୯ମହଲା ବିଶିଷ୍ଟ ବିଳାସମୟ ହୋଟେଲ ତିଆରି କରିବେ ବଲିଉଡର ସୁପରଷ୍ଟାର ସଲମାନ ଖାନ। ସବୁବେଳେ ନିଜ ଫିଲ୍ମକୁ ନେଇ ଚର୍ଚ୍ଚାରେ ରହୁଥିବା ଦବଙ୍ଗ ଖାନ୍ ଏବେ ନିଜ ହୋଟେଲ ନିର୍ମାଣକୁ ନେଇ ଚର୍ଚ୍ଚାକୁ ଆସିଛନ୍ତି। କୁହାଯାଉଛି ଯେ ସଲମାନ ଖାନ ଏବଂ ତାଙ୍କ ପରିବାର ମୁମ୍ବାଇରେ ଏକ ହୋଟେଲ ନିର୍ମାଣ କରିବାକୁ ଯାଉଛନ୍ତି। ତାଙ୍କର ଏହି ହୋଟେଲ ୧୯ମହଲା ବିଶିଷ୍ଟ ହେବ, ଯେଉଁଥିରେ ସମସ୍ତ ପ୍ରକାର ସୁବିଧା ଉପଲବ୍ଧ ହେବ।

ରିପୋର୍ଟ ଅନୁଯାୟୀ, ମୁମ୍ବାଇର ବାନ୍ଦ୍ରା ଅଞ୍ଚଳର କାର୍ଟର ରୋଡରେ ଅଧା ନିର୍ମାଣ ହୋଇଥିବା କୋଠାକୁ ଭାଙ୍ଗି ହୋଟେଲ ନିର୍ମାଣ କରାଯିବ। ଏହି ସମ୍ପତ୍ତି ସଲମାନ ଖାନଙ୍କ ମା’ ସଲମା ଖାନଙ୍କ ନାମରେ ରହିଛି। ଏହା ପୂର୍ବରୁ ଏଠାରେ ଷ୍ଟାରଲେଟ କୋଅପରେଟିଭ ହାଉସିଂ ସୋସାଇଟି ଥିଲା, ଯାହାକୁ ଭାଙ୍ଗି ଖାନ ପରିବାର ୧୯ମହଲା ବିଶିଷ୍ଟ କୋଠା ନିର୍ମାଣ କରିବାକୁ ଯାଉଛନ୍ତି। ଏହି ବିଲ୍ଡିଂରେ ଖାନ ପରିବାରର ଆପାର୍ଟମେଣ୍ଟ ଥିବା ବେଳେ ପ୍ରାୟ ୧୫ବର୍ଷ ହେଲାଣି କାମ ଅଧାରେ ରହିଛି। ଏହି କୋଠାର ନିର୍ମାଣ ପ୍ରାୟ ୨୦ବର୍ଷ ପୂର୍ବେ ଆରମ୍ଭ ହୋଇଥିବା ବେଳେ ବର୍ତ୍ତମାନ ଖାନ ପରିବାର ବିଏମସିକୁ ଏହି ଅଧା ନିର୍ମାଣ ହୋଇଥିବା କୋଠାକୁ ଭାଙ୍ଗି ୧୯ମହଲା ବିଶିଷ୍ଟ ହୋଟେଲ ନିର୍ମାଣ ପାଇଁ ଯୋଜନା କରୁଥିବା କହିଛନ୍ତି।

ହୋଟେଲର ପ୍ରଥମ ଏବଂ ଦ୍ୱିତୀୟ ମହଲାରେ ଏକ କାଫେ ଏବଂ ରେସ୍ତୋରାଁ ନିର୍ମାଣ କରିବାର ଯୋଜନା ଥିବାବେଳେ ତୃତୀୟ ମହଲାରେ ଏକ ଜିମ୍ ଏବଂ ସୁଇମିଂ ପୁଲ୍ ନିର୍ମାଣ କରାଯିବ। ଚତୁର୍ଥ ମହଲା ସର୍ଭିସ ଫ୍ଲୋର ଭାବରେ ବ୍ୟବହୃତ ହେବ। ପଞ୍ଚମ ଏବଂ ଷଷ୍ଠ ମହଲାରେ କନଭେସନ ହଲ୍ ରହିବା ସହ ସପ୍ତମ ମହଲାରୁ ୧୯ ମହଲା ପର୍ଯ୍ୟନ୍ତ ରହିବା ପାଇଁ ରୁମ୍ ତିଆରି କରାଯିବ। ତେବେ କାମ କେବେ ଆରମ୍ଭ ହେବ, ତାହା ସାମ୍ନାକୁ ଆସିନାହିଁ।