ସଲ୍‌ମାନଙ୍କ ବିରୋଧରେ ପୂର୍ବ ପ୍ରେମିକା ଆଣିଲେ ଗମ୍ଭୀର ଅଭିଯୋଗ, କିଛି ସମୟ ପରେ ଡିଲିଟ୍‌ କଲେ ପୋଷ୍ଟ୍‌

ମୁମ୍ବାଇ: ବଲିଉଡ୍‌ ସୁପର୍‌ଷ୍ଟାର୍‌ ସଲ୍‌ମ‌ାନ ଖାନ୍‌ ଅନେକ ଅଭିନେତ୍ରୀଙ୍କ ସହ ପ୍ରେମ ସଂପର୍କରେ ରହି ଆସିଛନ୍ତି। ହେଲେ କାହାକୁ ବି ସେ ଆଜି ପର୍ଯ୍ୟନ୍ତ ନିଜର ଘରଣୀ ସଜେଇ ପାରିନାହାନ୍ତି। ଆପଣ ଜାଣିଥିବେ ନିଶ୍ଚୟ ଯେ ସଲ୍‌ମାନଙ୍କ ପ୍ରେମିକାଙ୍କ ତାଲିକାରେ ଗୋଟାଏ ସମୟରେ ସୋମି ଅଲ୍ଲୀଙ୍କ ନାମ ବି ଥିଲା।

ଅଭିନେତ୍ରୀ ସୋମି ଅଲ୍ଲୀ ପୁଣି ଥରେ ଏବ‌େ ଚର୍ଚ୍ଚାକୁ ଆସିଛନ୍ତି। ସେ ସଲ୍‌ମାନଙ୍କ ବିରୋଧରେ ପୁଣି ଏକ ଅଭିଯୋଗ ଆ‌ଣିଛନ୍ତି। ପୂର୍ବରୁ ସେ ସଲ୍‌ମାନଙ୍କ ବିରୋଧରେ ଅନେକ ଅଭିଯୋଗ ଆଣିଥିବା ବେଳେ ଏବେ ସେ ସଲ୍‌ମାନଙ୍କୁ ଜଣେ ‘ୱମେନ୍‌ ବିଟର୍‌’(ମହିଳାଙ୍କୁ ବାଡ଼ଉଥିବା ବ୍ୟକ୍ତି) ବୋଲି କହିଛନ୍ତି।

ସେ କହିଛନ୍ତି ଯେ ତାଙ୍କ ସହ ସଂପର୍କରେ ଥିବା ବେଳେ ସଲ୍‌ମାନ ତାଙ୍କୁ ବର୍ଷ ବର୍ଷ ଧରି ମାରଧର କରୁଥିଲେ। ଏପରିକି ସଲ୍‌ମାନ ତାଙ୍କ ଶରୀରରେ ସିଗାରେଟ୍‌ ଚେଙ୍କ ବି ଲଗେଇ ଦେଇଥିଲେ।

ସେ ସଲ୍‌ମାନ ଓ ତାଙ୍କର ଏକ ଫଟୋ ସେୟାର କରି ଏହି ଅଭିଯୋଗ ଆଣିଥିଲେ। ଫଟୋରେ ସଲ୍‌ମାନ ସୋମିଙ୍କୁ ଏକ ଗୋଲାପ ଦେଉଥିବାର ଦୃଶ୍ୟ ଦେଖିବାକୁ ମିଳିଥିଲା। ମାତ୍ର ଆପଣଙ୍କୁ ଜଣାଇ ଦେଉଛୁ ‌ଯେ ସେ ଏହି ପୋଷ୍ଟ୍‌ କରିବାର କିଛି ସମୟ ମଧ୍ୟରେ ତାହାକୁ ପୁଣି ଥରେ ଡିଲିଟ୍‌ କରି ଦେଇଛନ୍ତି।

ସୋମି ତାଙ୍କ ପୋଷ୍ଟ୍‌ରେ ମହିଳାଙ୍କୁ ମାରପିଟ କରୁଥିବା ସଲ୍‌ମାନଙ୍କ ପରି ଜଣେ ଅଭିନେତାଙ୍କୁ ସମର୍ଥନ କରୁଥିବା ଅନ୍ୟ ଅଭିନେତା ଓ ଅଭିନେତ୍ରୀମାନଙ୍କୁ ଲାଜ ଲାଗିବା କଥା ବୋଲି ଉଲ୍ଲେଖ କରିଥିଲେ।