ନୂଆଦିଲ୍ଲୀ: ଅଭିନେତା ସଲମାନ ଖାନ ତାଙ୍କର ଉଦାରତା ପାଇଁ ବେଶ୍‌ ଜଣାଶୁଣା। ସୋସିଆଲ୍‌ ମିଡିଆରେ ଭାଇଜାନଙ୍କ ଭିଡିଓ ପ୍ରାୟତଃ ଭାଇରାଲ୍‌ ହୋଇ ଚାଲିଥାଏ। ଅଧିକାଂଶ ସମୟରେ ତାଙ୍କୁ ତାଙ୍କ ପ୍ରଶଂସକମାନଙ୍କ ଇଚ୍ଛା ପୂରଣ କରୁଥିବାର ଦେଖିବାକୁ ମିଳିଥାଏ। ତେବେ ନିକଟ‌ରେ ଆଇଆଇଏଫ୍‌ଏ-୨୦୨୩ର ଏକ ଭିଡିଓ ଭାଇରାଲ୍‌ ହେବାରେ ଲାଗିଛି। ଭାଇରାଲ୍‌ ହୋଇଥିବା ଭିଡିଓରେ ସଲମାନ ଖାନ ଏକ ମାଆଙ୍କ ଅନୁରୋଧ କ୍ରମେ ଏକ ଛୋଟ ପିଲାଙ୍କ ସହ ଫଟୋ ଉଠାଉଥିବାର ନଜର ଆସିଛନ୍ତି।

Advertisment

ଭିଡିଓରେ ଦେଖିବାକୁ ମିଳିଛି ଯେ  ସଲମାନ ଖାନ କଡ଼ା ସୁରକ୍ଷା ବଳୟ ମଧ୍ୟରେ ମଞ୍ଚ ଛାଡ଼ି ଚାଲି ଚାଲି ଯାଉଛନ୍ତି। ପଛରୁ ଜଣେ ମହିଳା ପ୍ରଶଂସକ ସଲ୍‌ମାନଙ୍କୁ ତାଙ୍କ ପିଲାଙ୍କ ସହ ଏକ ଫଟୋ କ୍ଲିକ୍ କରିବାକୁ ଅନୁରୋଧ କରୁଛନ୍ତି। ପ୍ରଶଂସକଙ୍କ ସ୍ୱର ଶୁଣି ସଲମାନ ଖାନ ମୁଁ ଆସୁଛି ବୋଲି କହୁଛନ୍ତି। କିନ୍ତୁ ମହିଳା ଜଣକ ସଲ୍‌ମାନଙ୍କ ଲଗାତର ‘ପ୍ଲିଜ୍‌ ସଲ୍‌ମାନ ମୋ ପୁଅ ସହ ଥରେ ହାତ ମିଳାଇ ଦିଅ’ ବୋଲି ବିକଳ ହୋଇ କହୁଛନ୍ତି। ସେହି ସମୟ‌ରେ ସଲ୍‌ମାନ ବୁଲି ପଡ଼ି ପଛକୁ ଚାଲି ଚାଲି ଆସୁଛନ୍ତି ଓ ପିଲାଟି ସହ ଫଟୋ ପୋଜ୍‌ ବି ଦେଉଛନ୍ତି। ସଲ୍‌ମାନଙ୍କ ଏହି ଆଚରଣ ସୋସିଆଲ୍‌ ମିଡିଆ ବ୍ୟବହାରକାରୀଙ୍କୁ ଖୁବ୍ ଭଲଲାଗିଛି।

ଭିଡିଓଟି ସୋସିଆଲ୍‌ ମିଡିଆରେ ଭାଇରାଲ୍‌ ହେବା ପରେ ବିଭିନ୍ନ ଲୋକ ବିଭିନ୍ନ ପ୍ରକାରର କମେଣ୍ଟ୍‌ ସବୁ ଦେଇଛନ୍ତି। ଜଣେ ବ୍ୟବହାରକାରୀ ଲେଖିଛନ୍ତି, ‘ସଲ୍‌ମାନ ହେଉଛନ୍ତି ସର୍ବୋତ୍ତମ ବ୍ୟକ୍ତି’। ଅନ୍ୟ ଜଣେ ବ୍ୟବହାରକାରୀ ହାର୍ଟ ଇମୋଜି ଦେଇଛନ୍ତି ସଲ୍‌ମାନଙ୍କ ଉଦେଶ୍ୟରେ।