ନିର୍ବାଚନ ଲଢ଼ିବେ ଆରୟନ ଖାନଙ୍କୁ ଗିରଫ କରିଥିବା ଆଇଆରଏସ ଅଧିକାରୀ ସମୀର ୱାଙ୍ଖେଡେ

ମୁମ୍ବାଇ: ବଲିଉଡ ଅଭିନେତା ଶାହାରୁଖ ଖାନଙ୍କ ପୁଅ ଆରୟନ ଖାନଙ୍କୁ ଗିରଫ କରିଥିବା ଆଇଆରଏସ ଅଧିକାରୀ ସମୀର ୱାଙ୍ଖେଡେ ପୁଣି ଥରେ ଚର୍ଚ୍ଚାକୁ ଆସିଛନ୍ତି। ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋର ଜୋନାଲ ଅଫିସର ସମୀର ୱାଙ୍ଖେଡେ ଚାକିରି ଛାଡି ନିର୍ବାଚନରେ ​​ପ୍ରତିଦ୍ୱନ୍ଦ୍ୱିତା କରିବେ ବୋଲି କୁହାଯାଉଛି। ସୂଚନାନୁସାରେ, ଶିବସେନା ସିନ୍ଦେ ଦଳ ତାଙ୍କୁ ମୁମ୍ବାଇର ଧାରାବୀ ଆସନରୁ ଟିକେଟ ଦେବାକୁ ଯାଉଛି। ଗତ ବିଧାନସଭା ନିର୍ବାଚନରେ ​​କଂଗ୍ରେସର ବର୍ଷା ଗାଇକୱାଡ ଏହି ଆସନ ଜିତିଥିଲେ।

୨୦୦୮ବ୍ୟାଚ୍ ଅଧିକାରୀ ସମୀର ୱାଙ୍ଖେଡେ ମୁମ୍ବାଇରେ ମୁତୟନ ହୋଇଥିଲେ। ସେ ଇନକମ ଟ୍ୟାକ୍ସ ଏୟାର ଇଣ୍ଟେଲିଜେନ୍ସ ୟୁନିଟ୍ ଏବଂ ଜାତୀୟ ଅନୁସନ୍ଧାନ ଏଜେନ୍ସିରେ ମଧ୍ୟ ଅନେକ ଗୁରୁତ୍ୱପୂର୍ଣ୍ଣ ପଦବୀରେ କାମ କରିସ‌ାରିଛନ୍ତି। ଟିକସ ବିଭାଗରେ କାର୍ଯ୍ୟ କରୁଥିବାବେଳେ ସମୀର ୱାଙ୍ଖେଡେ ଟିକସ ଫାଙ୍କିବା ମାମଲାରେ ୨୫୦୦ଲୋକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଆରମ୍ଭ କରିଥିଲେ। ସେଥିମଧ୍ୟରୁ ୨୦୦ରୁ ଅଧିକ ବଲିଉଡ ସହିତ ଜଡିତ ଥିଲେ। ତାଙ୍କର ଏହି କାର୍ଯ୍ୟ ଦ୍ବାରା ପ୍ରାୟ ୮୭କୋଟି ଟଙ୍କାର ଆୟକର ପାଇଥିଲେ ସରକାର। ୨୦୧୯ରେ ସମୀର ୱାଙ୍ଖେଡେ ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋର ଜୋନାଲ ନିର୍ଦ୍ଦେଶକ ଭାବରେ ନିଯୁକ୍ତ ହୋଇଥିଲେ। ଏହା ପରେ ତାଙ୍କ ରାଡାରରେ ଅନେକ ବଲିଉଡ କଳାକାର ମଧ୍ୟ ଆସିଥିଲେ। 

ଯେତେବେଳେ ଅଭିନେତା ସୁଶାନ୍ତ ସିଂ ରାଜପୁତଙ୍କ ଆତ୍ମହତ୍ୟା ପରେ ନିଶା ସେବନ ମାମଲା ସାମ୍ନାକୁ ଆସିଲା । ସମୀର, ସୁଶାନ୍ତଙ୍କ ପ୍ରେମିକା ତଥା ଅଭିନେତ୍ରୀ ରିୟା ଚକ୍ରବର୍ତ୍ତୀ ଏବଂ ତାଙ୍କ ଭାଇ ଶୌଭିକ ଚକ୍ରବର୍ତ୍ତୀଙ୍କୁ ଗିରଫ କରିଥିଲେ। ଉଭୟଙ୍କୁ ଏନଡିପିଏସ୍ ଆକ୍ଟ ଅନୁଯାୟୀ ଗିରଫ କରାଯାଇଥିଲା। ନଭେମ୍ବର ୨୦୨୦ରେ ସମୀର ହାସ୍ୟ ଅଭିନେତ୍ରୀ ଭାରତୀ ସିଂ ଏବଂ ତାଙ୍କ ସ୍ୱାମୀଙ୍କ ବିରୋଧରେ ଡ୍ରଗ୍ ସେବନ ନେଇ ମାମଲା ଦାୟର କରିଥିଲେ। ଏହି ସବୁ ଘଟଣା ପ‌ରେ ଶାହାରୁଖ ଖାନଙ୍କ ପୁଅ ଆରୟନଙ୍କୁ ଗିରଫ କରିବା ପରେ ତାଙ୍କୁ ଚର୍ଚ୍ଚା ସାରା ଦେଶରେ ହୋଇଥିଲା। ଏତେ ବଡ଼ ବଡ଼ ମାମଲାକୁ ନେଇ ଚର୍ଚ୍ଚିତ ହୋଇସାରିଥିବା ସମୀର ରାଜନୀତିକୁ ଆସିବେ କି ନାହିଁ ତାହା ଆଗାମୀ ଦିନରେ ସ୍ପଷ୍ଟ ହେବ।