ଶୀର୍ଷକ ଭୂମିକାରେ ସସ୍ମିତା

ଓଲିଉଡ୍‌ର ଜଣାଶୁଣା ନାୟିକା ସସ୍ମିତା ଏବେ ଛୋଟ ପରଦାକୁ ମୁହାଁଇଛନ୍ତି। ହଁ, ତାଙ୍କୁ ଦର୍ଶକ ଖୁବ୍ ଶୀଘ୍ର ‘ତରଙ୍ଗ’ ଟିଭିରେ ପ୍ରସାରିତ ହେବାକୁ ଥିବା ମେଗା ଧାରାବାହିକ ‘ବଡ଼ବୋହୂ’ର ମୁଖ୍ୟ ଭୂମିକାରେ ଦେଖିବାକୁ ପାଇବେ। ଏଥିରେ ଶୀର୍ଷକ ଚରିତ୍ରରେ ନଜର ଆସିବେ ସସ୍ମିତା। ‘ବଡ଼ବୋହୂ’ ହେଉଛି ତାଙ୍କର ପ୍ରଥମ ଧାରାବାହିକ। ଏଥିରେ ନାୟକ ଶ୍ରେୟାନଙ୍କ ବିପକ୍ଷରେ ତାଙ୍କୁ ଦେଖିବାକୁ ମିଳିବ। ଏହା ଆଗରୁ ଶ୍ରେୟାନ୍ ନଜର ଆସିଥିଲେ ‘ଷ୍ଟାର୍ କିରଣ’ ଚାନେଲରେ ପ୍ରସାରିତ ମେଗା ଧାରାବାହିକ ‘ତୁ କହିବୁ ନା ମୁଁ’ରେ। ପୂର୍ବରୁ ଶ୍ରେୟାନ-ସସ୍ମିତାଙ୍କ ଯୋଡ଼ିକୁ ଦର୍ଶକ ଟେଲି ସିନେମା ‘ରୋମିଓ ରୋବଟ୍’ରେ ପସନ୍ଦ କରିଥିଲେ। ‘ବଡ଼ବୋହୂ’ରେ ଅନ୍ୟମାନଙ୍କ ମଧ୍ୟରେ ସ୍ନିଗ୍ଧା ମହାନ୍ତି ଓ ମହାପ୍ରସାଦ କର ବି ଗୁରୁତ୍ବପୂର୍ଣ୍ଣ ଭୂମିକାରେ ଅଛନ୍ତି।

ସୂଚନାଯୋଗ୍ୟ, ସୁଧାଂଶୁ ମୋହନ ସାହୁଙ୍କ ନିର୍ଦ୍ଦେଶିତ ‘ହାପିଲକି’ ଛବିରୁ ସସ୍ମିତା ନାୟିକା କ୍ୟାରିଅର୍ ଆରମ୍ଭ କରିଥିଲେ। ଏଥିରେ ତାଙ୍କୁ ମିଳିଥିଲା ସମ୍ବିତଙ୍କ ସାଥ୍। ତା’ପରେ ସେ ଏସ୍ ଦିଲୀପ ପଣ୍ଡାଙ୍କ ନିର୍ଦ୍ଦେଶିତ ‘ଓମ୍ ସ୍ୱାହା’ରେ ବି ନାୟିକା ବନିଥିଲେ। ଏଣେ ତାଙ୍କ ଅଭିନୀତ ‘ଶ୍ରୀମାନ୍ ଶ୍ରୀଯୁକ୍ତ’ ମୁକ୍ତି ପ୍ରତୀକ୍ଷାରେ ରହିଛି। ଏଥିରେ ପ୍ରଥମ ଥର ପାଇଁ ସାନୁ-ସସ୍ମିତାଙ୍କ ଯୋଡ଼ିକୁ ଦେଖିବାକୁ ପାଇବେ ସିନେପ୍ରେମୀ।