ନୂଆଦିଲ୍ଲୀ: ବଲିଉଡର ଜଣେ ଅଭିନେତା, ନିର୍ଦ୍ଦେଶକ ଓ ପ୍ରଯୋଜକ ଭାବେ ଲୋକପ୍ରିୟତା ସାଉଁଟି ଥିବା ସତୀଶ କୌଶିକଙ୍କର ମାର୍ଚ୍ଚ ୯ ତାରିଖରେ ପରଲୋକ ହୋଇଥିଲା। ହୃଦଘାତରେ ତାଙ୍କର ମୃତ୍ୟୁ ହୋଇଥିବା ପ୍ରାରମ୍ଭିକ ବ୍ୟବଚ୍ଛେଦ ରିପୋର୍ଟରୁ ଜଣାପଡ଼ିଛି।

Advertisment

ସତୀଶଙ୍କ ମୃତ୍ୟୁ ପରଠାରୁ ତାଙ୍କୁ ନେଇ ବିଭିନ୍ନ ପ୍ରକାର ଖବର ପ୍ରତିଦିନ ସାମ୍ନାକୁ ଆସୁଛି।
ନିକଟରେ ସତୀଶଙ୍କ ମୃତ୍ୟୁ ପୂର୍ବର ଏକ ଭିଡିଓ ଭାଇରାଲ ହେଉଛି। ଏହି ଭିଡିଓ ଦେଖି ତାଙ୍କ ପ୍ରଶଂସକ ଦୁଃଖରେ ଭାଙ୍ଗି ପଡ଼ିଛନ୍ତି। କାରଣ ଭିଡିଓରେ ସତୀଶ ଯେଭଳି ମଜାମସ୍ତି କରୁଛନ୍ତି କେହି ସ୍ବପ୍ନରେ ସୁଦ୍ଧା ଭାବି ନଥିଲେ ଯେ ଆଗାମୀ ସମୟରେ ତାଙ୍କ ପାଇଁ କାଳ ଏପରି ଭାବେ ଜଗି ବସିଛି। ଯିଏକି ତାଙ୍କୁ ସବୁଦିନ ପାଇଁ ଏହି ସଂସାରରୁ ଟାଣି ନେଇଯିବ।

ଏହି ଭିଡିଓକୁ ସତୀଶଙ୍କ ବନ୍ଧୁ ବିକାଶ ମଲ୍ଲୁ ସୋସିଆଲ ମିଡିଆରେ ସେୟାର କରିଛନ୍ତି। ଏଥିରେ ସତୀଶ ତାଙ୍କ ସାଙ୍ଗସାଥୀଙ୍କ ସହିତ ହୋଲିର ଆନନ୍ଦ ନେଇ ନାଚୁଥିବା ଦେଖିବାକୁ ମିଳୁଛି।

ଅନ୍ୟପକ୍ଷରେ ସତୀଶଙ୍କୁ ଟଙ୍କା ପାଇଁ ହତ୍ୟା କରାଯାଇଛି ବୋଲି ଅଭିଯୋଗ ହେଉଛି। ଏହି ଅଭିଯୋଗକୁ ଖଣ୍ଡନ କରି ସତୀଶଙ୍କ ପତ୍ନୀ କହିଥିଲେ , ‘ଏବେ ଯେଭଳି ସମୟ ଚାଲିଛି ଦୟାକରନ୍ତୁ, ମୁଁ ସମସ୍ତଙ୍କୁ ଅନୁରୋଧ କରୁଛି କି କିଛି ନଜାଣି ନଶୁଣି ମିଥ୍ୟା ପ୍ରଚାର କରନ୍ତୁ ନାହିଁ। ସତୀଶଙ୍କୁ ଟଙ୍କା ପାଇଁ ହତ୍ୟା କରାଯାଇନାହିଁ। ତାଙ୍କର ମୃତ୍ୟୁ ହୃଦଘାତରୁ ହୋଇଛି ଏହା ହିଁ ସ୍ପଷ୍ଟ।’