ସାତ୍ ସୱାଲ୍: ସଂପର୍କ ଦୁର୍ବଳ ଥିଲେ ତୃତୀୟ ବ୍ୟକ୍ତି ପ୍ରବେଶ କରନ୍ତି

ଅଭିନୟର ଅ ଆ ସେ ଆରମ୍ଭ କରିଥିଲେ ଗୀତିନାଟ୍ୟରୁ। ଅଭିନୟ ନିଶା ତାଙ୍କୁ ଟାଣିନେଲା ଉତ୍କଳ ସଂଗୀତ ମହାବିଦ୍ୟାଳୟକୁ। ସେଠାରେ ନାଟକ ବିଭାଗରେ ପ୍ରଶିକ୍ଷଣ ନେଇ ମ୍ୟୁଜିକ୍‌ ଭିଡିଓ ଓ ଧାରାବାହିକରେ ଅଭିନୟ ଆରମ୍ଭ କଲେ। ଚଳିତବର୍ଷ ‘ୱାଇଫ୍’ ସିନେମାରେ ଏକ ବଳିଷ୍ଠ ଚରିତ୍ରରେ ଦେଖିବାକୁ ମିଳିଛି ତାଙ୍କୁ। ଅଭିନେତ୍ରୀ ଲକ୍ଷ୍ମୀପ୍ରିୟା ସେନାପତିଙ୍କ ସହ ଅଳ୍ପ ଆଳାପ।

ବନ୍ଦନା ମିଶ୍ର୍ର

‘ୱାଇଫ୍’ ସିନେମାରେ ଆପଣ ସ୍ବାମୀ-ସ୍ତ୍ରୀଙ୍କ ମଧ୍ୟରେ ଜଣେ ତୃତୀୟ ବ୍ୟକ୍ତିର ଭୂମିକା ନିଭାଇଛନ୍ତି। ଏହି ଚରିତ୍ର କରିବା ପରେ ବାସ୍ତବ ଜୀବନରେ ସମାଲୋଚିତ ହେବାକୁ ପଡୁଛି କି?
କିଛି ଲୋକ ମୋତେ ଏ ବିଷୟରେ କହିଛନ୍ତି। ଯେହେତୁ ଏହା ମୋର ପ୍ରଥମ ସିନେମା ତ ମୋତେ କେତେଜଣ କହିଛନ୍ତି କି ତୁ ଏକ ଭଲ ଚରିତ୍ରରୁ କ୍ୟାରିୟର୍ ଆରମ୍ଭ ନକରି ଏଭଳି ‘ଆଣ୍ଟି ହିରୋଇନ୍’ ଭୂମିକା କାହିଁକି ନିଭାଇଲୁ। ମାତ୍ର ମୁଁ ଜଣେ କଳାକାର ହିସାବରେ ସବୁ ଚରିତ୍ରକୁ ଉଚିତ ସମ୍ମାନ ଦିଏ। 

ଓଲିଉଡ୍‌ର ଆଗଧାଡ଼ିର ନାୟିକା ବର୍ଷା ପ୍ରିୟଦର୍ଶନୀଙ୍କ ସହ ପ୍ରତିଦ୍ବନ୍ଦ୍ବିତା କରିବା ପରି ଚରିତ୍ରଟି ଯେତେବେଳେ ଆପଣଙ୍କୁ ମିଳିଲା ମନରେ ଭୟ ଥିଲା ନା ଉତ୍ସାହ?
ତାଙ୍କ ସହ କାମ କରିବା ସୁଯୋଗ ପାଇ ମୁଁ ଉତ୍ସାହିତ ତ ଥିଲି, ମନରେ ଭୟ ବି ଥିଲା। ମାତ୍ର କାମ କରିବା ପରେ ଭୟ ସବୁ ଦୂର ହୋଇଗଲା। ବର୍ଷା ମ୍ୟାମ୍ ଏତେ ମେଳାପୀ ଯେ ମୁଁ ଜଣେ ନବାଗତା ବୋଲି ମୋତେ ଭାବିବାକୁ ଦେଇନାହାନ୍ତି। ଜୟଦୀପ ଭାଇ ବି ବହୁତ ସମର୍ଥନ ଦେଇଛନ୍ତି। ସେମାନେ ସବୁ ମୋଠାରୁ ସିନିୟର୍। ହେଲେ ମୋତେ ଜଣେ ନୂଆ କଳାକାର ବୋଲି କେବେ ବି ଅନୁଭବ କରାଇ ନାହାନ୍ତି।

ଆପଣଙ୍କ ସିନେମାରୁ ଆମେ ଦେଖିଲୁ ଯେ ପରକୀୟା ପ୍ରୀତି ପାଇଁ ଦାମ୍ପତ୍ୟ ପ୍ରଭାବିତ ହେଉଛି। ବାସ୍ତବ ଜୀବନରେ ସ୍ବାମୀ-ସ୍ତ୍ରୀଙ୍କ ଭିତରେ ଫାଟର କାରଣ କ’ଣ ହୋଇପାରେ ବୋଲି ଭାବୁଛନ୍ତି?
ପରକୀୟା ପ୍ରୀତି କେବେ ବି ଗୋଟାଏ କାରଣ ନୁହେଁ। ଯେଉଁଠି ସଂପର୍କର ମୂଳଦୁଆ ମଜଭୁତ ସେଠି ତୃତୀୟ ବ୍ୟକ୍ତି ପ୍ରବେଶ କରିପାରନ୍ତି ନାହିଁ। ମୁଁ ବିଶ୍ବାସ କରେ କି, ତୃତୀୟ ବ୍ୟକ୍ତି ସେତେବେଳେ ସଂପର୍କକୁ ପ୍ରବେଶ କରନ୍ତି, ଯେତେବେଳେ ସଂପର୍କ ଦୁର୍ବଳ ଥାଏ। ଗୋଟେ ଦୃଢ଼ ବା ଶକ୍ତ ସଂପର୍କକୁ ଜଣେ ବାହାର ଲୋକ କେବେ ବି ଭାଙ୍ଗିପାରେନା। ଯଦି ସଂପର୍କ ଭାଙ୍ଗେ ତ ସ୍ବାମୀ ଓ ସ୍ତ୍ରୀଙ୍କ ପାଇଁ ହିଁ ଭାଙ୍ଗିଥାଏ। 

ପ୍ରେମ ବିବାହ କରିବେ ନା ବ୍ୟବସ୍ଥିତ?
ମୁଁ ପ୍ରେମ ବିବାହ କରିବାକୁ ପସନ୍ଦ କରିବି, ଯଦିଓ ଏଯାଏ କାହାକୁ ବିବାହ କରିବି ମନସ୍ଥ କରିନି।

ବ୍ୟବସ୍ଥିତ ବିବାହ କାହିଁକି ଆପଣଙ୍କର ପସନ୍ଦ ନୁହେଁ?
ଜଣେ ଅଜଣା ପୁଅକୁ ବିବାହ କଲେ ସେ କିପରି ହେବେ ମୁଁ ଜାଣେନି। ବେଳେ ବେଳେ ବହୁତ ଭଲ ପିଲା ବି ମିଳିଯା’ନ୍ତି, ମାତ୍ର ବେଳେ ବେଳେ ଖରାପ ସାଥୀଟିଏ ପାଇଁ ପୂରା ଜୀବନ ନଷ୍ଟ ହୋଇଯାଏ। ତେଣୁ ପୂର୍ବରୁ ପରିଚୟ ଥିବା ଜଣଙ୍କୁ ହିଁ ବିବାହ କରିବି।

ପ୍ରେମ ବିଷୟରେ ଏତେ ଭଲ କଥା କହୁଛନ୍ତି ମାନେ ପ୍ରେମ କରିଛନ୍ତି ନିଶ୍ଚୟ?
ଆଜ୍ଞା। ମୁଁ ଅତୀତରେ ପ୍ରେମ କରିଛି ଏବଂ ସେ ସଂପର୍କ ମୋର ଭାଙ୍ଗିଯାଇଛି। ଆମ ଦୁଇଜଣଙ୍କ ଆପୋସ ବୁଝାମଣାରେ ହିଁ ସଂପର୍କ ଭାଙ୍ଗିଛି। ପୁଣି ଥରେ ସେଠି ତ ଗଢ଼ିବାର କୌଣସି ସମ୍ଭାବନା ନାହିଁ। ମାତ୍ର ଯେବେ ବି ବିବାହ କରିବି ଭଲ ଭାବେ ଜାଣିଥିବା ଜଣେ ପୁରୁଷଙ୍କୁ ହିଁ ବିବାହ କରିବି। ତେବେ ନିଜ ବୟସର ପିଲାକୁ ନୁହେଁ; ଅତି କମରେ ମୋଠାରୁ ୩ ବର୍ଷ ବଡ଼ ପୁଅକୁ ବାହାହେବାକୁ ଚାହିବି।

ଅଭିନୟରେ ଆପଣ ନୂଆ। ଅନେକ ସ୍ବପ୍ନ ଦେଖିଥିବେ। ଯଦି ଆପଣଙ୍କୁ ସୁଯୋଗ ମିଳେ ତେବେ ଓଡ଼ିଆ ଚଳଚ୍ଚିତ୍ରର ଶୀର୍ଷସ୍ତରୀୟ ଅଭିନେତ୍ରୀ ହେବାକୁ ପସନ୍ଦ କରିବେ ନା ହିନ୍ଦୀ ସିନେମାରେ ସାଧାରଣ ଚରିତ୍ର ମିଳିଲେ ତାକୁ ଅଗ୍ରାଧିକାର ଦେବେ?
ମୁଁ ଓଡ଼ିଆ ସିନେମାରେ କାମ କରିବାକୁ ପସନ୍ଦ କରିବି। କେବଳ ଅଭିନେତ୍ରୀ ନୁହେଁ, ମୁଁ ଜଣେ ଭଲ କଳାକାର ହେବାକୁ ଚାହେ। ମୋତେ ଯାହା ବି ଭଲ ଚରିତ୍ର ମିଳିବ ମୁଁ କରିବି। ଓଡ଼ିଆ ସିନେମା ଶିଳ୍ପକୁ ବାହାରେ ପରିଚୟ ଦେବା ମୋର ସ୍ବପ୍ନ।