ଏହି କାରଣ ପାଇଁ ଜେଲ୍ ଯିବାକୁ ବାଧ୍ୟ ହୋଇଥିଲେ ଶାହାରୁଖ୍
ମୁମ୍ବାଇ : ବଲିଉଡ୍ର ବାଦ୍ଶାହା ଶାହାରୁଖ୍ ଖାନ୍ ଏକ ସାକ୍ଷାତକାରରେ ଜେଲ୍ ଯିବା ସମୟକୁ ମନେ ପକାଇଛନ୍ତି । ବିଶ୍ୱର ଲୋକପ୍ରିୟ ଟିଭି ଉପସ୍ଥାପକ ଡେଭିଡ୍ ଲେଟରମ୍ୟାନଙ୍କୁ ସାକ୍ଷାତକାର ଦେଇ ସେ ଗୋଟେ ଦିନ ଜେଲ୍ରେ ରହିଥିଲେ ବୋଲି ଜଣାଇଛନ୍ତି । ନେଟ୍ଫ୍ଲିକ୍ସରେ ପ୍ରସାରିତ ହେଉଥିବା ଅନ୍ ମାଇଁ ନେକ୍ସଟ୍ ଗେଷ୍ଟରେ ପହଞ୍ଚି ସେ ନିଜର ପୁରୁଣା ଦିନକୁ ମନେ ପକାଇଥିଲେ । ଶାହାରୁଖ୍ଙ୍କ ବିରୋଧରେ ଏକ ପତ୍ରିକାର ସମ୍ପାଦକ ବିବାଦୀୟ କଥା ଲେଖିଥିବାରୁ ଦୁହିଁଙ୍କ ମଧ୍ୟରେ କଥା କଟାକଟି ହୋଇଥିଲା । ଏମିତି କି ଦୁହେଁ ମାର୍ପିଟ୍ କରିବା ଉପରକୁ ଆସି ଯାଇଥିଲେ ।
Sambad is now on WhatsApp
Join and get latest news updates delivered to you via WhatsApp
୯୦ଦଶକରେ ଘଟିଥିବା ସେହି ଘଟଣାକୁ ମନେ ପକାଇ ଶାହାରୁଖ୍ କହିଥିଲେ କି, ସେ ସମୟରେ ମୁଁ ନୂଆ କରି ଫିଲ୍ମ ଇଣ୍ଡଷ୍ଟ୍ରିରେ ପାଦ ଦେଉଥିଲି । ଏକ ପତ୍ରିକାର ମୋତେ ନେଇ ଭୁଲ ତଥ୍ୟ ଦିଆଯାଇଥିଲା । ଫିଲ୍ମରେ ଅନ୍ତରଙ୍ଗ ଦୃଶ୍ୟରେ କାମ କରିବା ପାଇଁ ନିର୍ଦ୍ଦେଶକ ମୋତେ ତାଙ୍କ ପତ୍ନୀଙ୍କ ସହ ସାରା ରାତି ରହିବା ପାଇଁ କହିଥିବା କଥା ପତ୍ରିକାରେ ଲେଖାଯାଇଥିବା ଜାଣି ମୁଁ ରାଗି ଯାଇଥିଲି । ତୁରନ୍ତ ମୁଁ ପତ୍ରିକାର ସମ୍ପାଦକଙ୍କୁ ଫୋନ କରିବା ସହ ଏଭଳି କରିବାର କାରଣ ପଚାରିଥିଲି । ସେ ମୋତେ ଏହାକୁ ହାଲୁକାରେ ନେବା ପାଇଁ କହିଥିଲେ । ଯାହା ପାଇଁ ମୁଁ ତାଙ୍କ ଅଫିସ ଯାଇ ପାଟିତୁଣ୍ଡ କରିଥିବାରୁ ମୋତେ ଗୋଟେଦିନ ଜେଲ୍ରେ ରହିବାକୁ ପଡ଼ିଥିଲା ।