ଦିବ୍ୟାଙ୍ଗ ଭାଇର ଇଚ୍ଛା ପୂରଣ କରିବା ପାଇଁ ଶାହାରୁଖ୍ଙ୍କୁ ଟୁଇଟ୍ କରୁଥିଲେ ଯୁବକ, ୧୫୦ଟି ଟୁଇଟ୍ ପରେ ନିଜର ପ୍ରତିକ୍ରିୟା ରଖିଲେ ଶାହାରୁଖ୍
ମୁମ୍ବାଇ : ବଲିଉଡ୍ର କିଙ୍ଗ୍ଖାନ୍ ଶାହାରୁଖ୍ ଖାନ୍ଙ୍କ ଭାରତରେ ଏବଂ ଭାରତ ବାହାରେ କେତେ ପ୍ରଶଂସକ ଅଛନ୍ତି, ତାହା ସମସ୍ତଙ୍କୁ ଜଣା । ଅନେକ ସମୟରେ ଲୋକେ ତାଙ୍କ ଘର ବାହାରକୁ ଯାଇ ତାଙ୍କୁ ଦେଖା କରିବାକୁ ଚେଷ୍ଟା କରୁଥିବା ବେଳେ ଶାହାରୁଖ୍ ମଧ୍ୟ ସମୟ ବାହାର କରି ନିଜ ପ୍ରଶଂସକମାନଙ୍କ ଇଚ୍ଛା ପୂରଣ କରିଥାନ୍ତି । ଏ ମଧ୍ୟରେ ଶାହାରୁଖ୍ଙ୍କୁ ଭେଟିବା ପାଇଁ ଜଣେ ଯୁବକ ୧୫୦ଟି ଟୁଇଟ୍ କରିଥିବା ଜଣା ପଡ଼ିଛି । ୧୫୦ଦିନ ପର୍ଯ୍ୟନ୍ତ ଟୁଇଟ୍ କରିବା ପରେ ଶେଷରେ ଶାହାରୁଖ୍ ତାଙ୍କ ଟୁଇଟ୍ର ଜବାବ ରଖିଥିବା ଦେଖା ଯାଇଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଅମ୍ରିତଙ୍କ ବଡ଼ ଭାଇ ରାଜୁ ଶାହାରୁଖ୍ ଖାନ୍ଙ୍କ ବଡ଼ ପ୍ରଶଂସକ ହୋଇଥିବା ବେଳେ ଶାହାରୁଖ୍ ତାଙ୍କୁ ଆସି ଥରେ ଭେଟନ୍ତୁ ବୋଲି ଭିଡିଓ ଟୁଇଟ୍ କରି ଅନୁରୋଧ କରିଛନ୍ତି ଅମ୍ରିତ୍ । ଭିଡିଓରେ, ରାଜୁ ଦିବ୍ୟାଙ୍ଗ ହୋଇଥିବାରୁ ଖଟରୁ ଉଠି ପାରୁ ନ ଥିବା ଦେଖା ଯାଇଛି । ଅମ୍ରିତ୍ ରାଜୁଙ୍କ ପରିଚୟ ଦେଇ, ସେ ଶାହାରୁଖ୍ଙ୍କ କେତେ ବଡ଼ ପ୍ରଶଂସକ ତାହା କହୁଛନ୍ତି । ଏହା ସହ ବଡ଼ ଭାଇର ଇଚ୍ଛା ପୂରଣ କରିବା ପାଇଁ ସେ ୧୫୦ଦିନ ହେଲା ଶାହାରୁଖ୍ଙ୍କୁ ଟୁଇଟ୍ କରି ଆସୁଥିବା କହିଛନ୍ତି ।
Sorry Amrit I hadn’t seen your video. Please give my regards to mummyji & I will figure out & speak to RAJU soon. https://t.co/hBQvmLqHgQ
— Shah Rukh Khan (@iamsrk) 26 February 2019
ଭିଡିଓରେ, “ଶାହାରୁଖ୍ ଭାଇ ମୁଁ ଆପଣଙ୍କୁ ୧୫୦ଦିନ ହେଲା ଟୁଇଟ୍ କରି ଆସୁଛି । ଇଏ ହେଉଛନ୍ତି ମୋର ବଡ଼ ଭାଇ ରାଜୁ । ସେ ଆପଣଙ୍କ ବହୁତ ବଡ଼ ପ୍ରଶଂସକ ଏବଂ ଆପଣଙ୍କୁ ଭେଟିବାକୁ ଚାହୁଁଛି । ଆପଣ ସମୟ ବାହାର କରି ରାଜୁ ନିଶ୍ଚୟ ଦେଖା କରିବାକୁ ଆସିବେ” ବୋଲି କହୁଛନ୍ତି ଅମ୍ରିତ୍ ।
ଅମ୍ରିତ୍ଙ୍କ ଭିଡିଓ ଆସିବା ପରେ ଶାହାରୁଖ୍ ଟୁଇଟ୍ରେ ନିଜର ପ୍ରତିକ୍ରିୟା ରଖି, “କ୍ଷମା କରିବେ । ମୁଁ ଆପଣଙ୍କ ଭିଡିଓ ଦେଖି ନଥିଲି । ମମ୍ମି ଜୀଙ୍କୁ ମୋର ପ୍ରଣାମ ଜଣାଇବ । ମୁଁ ଖୁବ୍ ଶୀଘ୍ର ରାଜୁଙ୍କ ସହ କଥା ହେବି” ବୋଲି ଲେଖିଛନ୍ତି ଶାହାରୁଖ୍ ।